بۇگىن شىمكەنت قالاسىندا قازاقستاننىڭ ەكولوگيا, گەولوگيا جانە سۋ شارۋاشىلىعى ءمينيسترى م.مىرزاعاليەۆ وزبەكستاننىڭ سۋ شارۋاشىلىعى ءمينيسترى ش.حامراەۆپەن كەزدەسىپ, ەكى ەل اراسىنداعى بىرقاتار ماسەلەلەردى تالقىلادى.
كەزدەسۋ بارىسىندا قوس مينيسترلىكتىڭ وكىلدەرىنەن قۇرالعان توپ ساردوبا سۋ قويماسىنىڭ كەلەشەگىنە قاتىستى پىكىر-ۇسىنىستارىن ورتاعا سالدى. سونىمەن بىرگە وتىرىستىڭ كۇن تارتىبىندە وزبەكستاننىڭ پىسكەم جانە چاتكال وزەندەرىنىڭ بويىنان گەس سالۋ ماسەلەسى دە قارالدى. ەكى ەلدىڭ مينيسترلەرى ءوز سوزدەرىندە بارلىق ماسەلەنى ورتاق تۇسىنىستىكپەن, بىرلەسە شەشۋگە مۇددەلى ەكەندىكتەرىن ءبىلدىردى. جيىنعا قاتىسقان تۇركىستان وبلىسى ماقتاارال, سارىاعاش, كەلەس اۋداندارىنىڭ اكىمدەرى كانالدى تازالاۋ ماسەلەسىن كوتەردى. جيىننىڭ نەگىزگى بولىگى جۋرناليستەردىڭ قاتىسۋىنسىز, جابىق ەسىك جاعدايىندا جالعاستى.
اقپارات قۇرالدارىنا سۇحبات بەرگەن ەكولوگيا, گەولوگيا جانە سۋ شارۋاشىلىعى ۆيتسە-ءمينيسترى ەرلان نىسانباەۆتىڭ ايتۋىنشا, قازىرگى تاڭدا قازاقستان ساردوبا سۋ قويماسىنىڭ ەرتەڭىنە قاتىستى ناقتى ءبىر شەشىمگە كەلمەگەن. ء«بىز بۇگىن وزبەكتەردىڭ وسىعان قاتىستى جوسپارلارىن تىڭدايمىز. وسىدان كەيىن شەشىم قابىلدايتىن بولامىز», دەدى ۆيتسە-مينيستر.
سونداي-اق ۆيتسە-مينيستر قازىرگى تاڭدا شاردارا سۋ قويماسىنا, دوستىق كانالىنا ەشقانداي قاۋىپ ءتونىپ تۇرماعانىن ءمالىم ەتتى.
تۇركىستان وبلىسى