ماقتاارال اۋدانى مىرزاكەنت كەنتىنىڭ شىعىس جاق بەتىندە توپان سۋدان زارداپ شەككەن تۇرعىندارعا ارنالىپ سالىنىپ جاتقان جاڭا شاعىناۋداندا Nur Otan پارتياسى اتىنان 20 ءۇي سوعىلادى. ياعني, ەلباسىنىڭ باستاماسى بويىنشا تۇڭعىش پرەزيدەنت قورى مەن «Birgemiz» قورى مىرزاكەنت ەلدى مەكەنىنە 20 ءۇي تۇرعىزۋ ءۇشىن 340 ملن تەڭگە ءبولۋ تۋرالى شەشىم قابىلداپ وتىر.
ماقتاارال اۋدانىنا ءىس ساپارمەن كەلگەن Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك كۇنى كەشە سول جيىرمانىڭ العاشقى ءۇيىنىڭ ىرگەتاسىن قالاۋ راسىمىنە قاتىستى. ايتا كەتەيىك, جاڭا شاعىن اۋداندا الداعى ەكى ايدا جاڭا 505 ءۇي بوي كوتەرەتىن بولادى. سونداي-اق, مۇندا 1500 ورىندىق مەكتەپ پەن 280 ورىندىق بالاباقشانىڭ قۇرىلىسى جۇرگىزىلمەك. بۇدان بولەك, ينفراقۇرىلىمدىق قاجەتتىلىكتەر ياعني, جول, سۋ, گاز قۇبىرلارى تارتىلىپ, ساۋلەتى كەلىسكەن شاعىن اۋدانعا اينالادى. باۋىرجان بايبەك اتاكەنت كەنتىندەگى ەۆاكۋاتسيالىق ورتالىقتارعا جايعاستىرىلعان دوستىق, جەڭىس, فيردوۋسي, جاڭاتۇرمىس جانە ورگەباس اۋىلدارىنىڭ تۇرعىندارىمەن كەزدەسىپ, ولاردىڭ سۇراقتارعا جان-جاقتى جاۋاپ بەردى.
ال اتاكەنت كەنتىندە ورنالاسقان وبلىستىق شتابتىڭ ورتالىقتاندىرىلعان قويماسىندا اۋدان حالقىنا كومەك قولىن سوزىپ جۇرگەن ەرىكتىلەرمەن كەزدەسىپ, پىكىر الماستى. ولاردىڭ ماقتاارالداعى اپاتتىڭ سالدارىن جويۋ باعىتىنداعى باستامالارىنا ريزاشىلىعىن ءبىلدىردى. بۇگىندە ورتالىقتاندىرىلعان قويمادا جينالعان 600 توننادان استام گۋمانيتارلىق كومەكتىڭ 150 تونناسى تۇرعىندارعا ۇلەستىرىلىپ بەرىلگەن.
تۇركىستان وبلىسى