نوسەرلەتە جاۋعان جاڭبىر سالدارىنان تۇركىستان وبلىسىنىڭ تولەبي, قازىعۇرت, سايرام, بايدىبەك اۋداندارىندا سۋ تاسقىنى ورىن الىپ, بىرقاتار اۋىلدار زارداپ شەكتى. ەڭ كوپ زارداپ شەككەن تولەبي اۋدانى بولىپ وتىر.
وبلىس اكىمى ومىرزاق شوكەەۆ تولەبي اۋدانىنداعى سەلدەن زارداپ شەككەن اۋماقتاردى ارالاپ, تۇرعىندارمەن كەزدەستى. اۋداندا كۇنى كەشە تولاسسىز جاۋعان نوسەر جاۋىننىڭ اسەرىنەن وزەندەردىڭ سۋ دەڭگەيى كوتەرىلگەن. ارىق-اتىز, قىر-سايلاردان جينالىپ اققان جاڭبىر سۋىنان 6 ەلدى مەكەندەگى 215 تۇرعىن ۇيلەردىڭ اۋلاسىنا سۋ كىردى.
«تەك 40 مينۋتتىڭ ىشىندە 1 ايلىق جاڭبىر جاۋعان. بۇل سوڭعى جىلدارى العاش رەت ورىن العان تابيعي قۇبىلىس. قاۋىپسىز اۋماققا كوشىرىلگەندەرىڭىز دۇرىس بولدى. ۇيلەردى پوليتسيا قىزمەتكەرلەرى كۇزەتەدى. ۋايىمداماڭىزدار. سامان ءۇي قۇلاسا, وزدەرىڭىز ءۇشىن قاۋىپتى. بارلىق اۋداندار كومەككە كەلىپ جاتىر» دەدى ومىرزاق ەستاي ۇلى اۋدان تۇرعىندارىمەن كەزدەسۋىندە.
سونداي-اق وبلىس اكىمى جەدەل قۇرىلعان شتاب وتىرىسىن وتكىزدى. اۋداندا زارداپ شەككەندەرگە شۇعىل كومەك كورسەتۋ, قاۋىپسىز جەرگە كوشىرىلگەندەردى قاجەتتى زاتتارمەن, ىستىق تاماق, كيىم-كەشەكپەن قاتاماسىز ەتۋ, بارلىق جاعدايلارىن جاساۋ اۋدان اكىمدىگىنە جۇكتەلدى. كورشى اۋداندار كومەككە كەلەتىن بولادى. قۇلايىن دەپ تۇرعان ۇيلەردەن م ۇلىكتەردى شىعارۋعا دا كومەكتەسۋ قاجەت. كەلتىرىلگەن زالالدى قىسقا مەرزىمدە قالپىنا كەلتىرۋ دە باستى مىندەتتەردىڭ ءبىرى رەتىندە ايتىلدى. جەدەل قۇرىلعان وبلىستىق شتابتى باسقارۋ وبلىس اكىمىنىڭ ورىنباسارى مەيىرجان مىرزاليەۆكە جۇكتەلدى.
تۇركىستان وبلىسى