تۇركىستان وبلىسى تولەبي اۋدانىنىڭ ونەركاسىپ سالاسىندا جۇزەگە اسىرىلا باستاعان ءىرى جوبالاردىڭ ءبىرى - «لەنگىر ماشينا جاساۋ زاۋىتى». جالپى وندىرىستىك اۋماعى 13 مىڭ شارشى مەتردەن اساتىن كاسىپورىندا تولىقتاي قايتا قۇرۋ, جاڭارتۋ جۇمىستارى جۇرگىزىلۋدە. قۇرىلىس, تەمىر ونىمدەرى مەن بولشەكتەرىنە ماماندانعان زاۋىت تاپسىرىس بولعان جاعدايدا پوەزد ۆاگوندارى مەن بولشەكتەرىندە جاساپ شىعارا الادى. جوباعا 3-3,5 ملرد تەڭگە ينۆەستيتسيا تارتىلماق.
وتاندىق شيكىزات پايدالانىلىپ, وندىرىلگەن ونىمدەردى ەلىمىزدىڭ ىشكى نارىعىنا شىعارۋ جوسپارلانىپ وتىرعان كاسىپورىندا 150 ادامدى جۇمىسپەن قامتۋ كوزدەلىپ وتىر. توقىراۋ كەزىندە قاراۋسىز قالعان ماشينا جاساۋ زاۋىتى قايتا جاندانىپ, بيىل ىسكە قوسىلادى. وبلىس اكىمى ومىرزاق شوكەەۆ اۋدانعا ساپارىندا اتالمىش كاسىپورىندا بولدى, سونداي-اق «جۇمىسپەن قامتۋ جول كارتاسى» باعدارلاماسى اياسىندا جۇزەگە اسىرىلاتىن جوبالارمەن تانىستى. اۋدان ورتالىعىنداعى «جاستىق» ستاديونىندا كۇردەلى جوندەۋ جۇمىستارى جۇرۋدە. ءبىلىم ۇيالارى جاڭارتىلىپ, 20 پاتەرلى 9 تۇرعىن ءۇي بوي كوتەردى.
سونداي-اق وبلىس اكىمى اباي قۇنانباي ۇلىنىڭ 175 جىلدىق مەرەيتويىنا وراي اۋدان ورتالىعىندا ورناتىلاتىن ەسكەرتكىش جوباسىمەن تانىستى. بيىكتىگى 3,5 مەتر مىستان قۇيىلعان ەسكەرتكىش دەمەۋشىلەر تاراپىنان جۇزەگە اسۋدا. ۇلى ويشىلدىڭ ءمۇسىنى جاڭادان بوي كوتەرەتىن اباي اللەياسىندا ورناتىلادى. بۇدان بولەك, دەمەۋشىلەر ەسەبىنەن تاريحي تۇلعا تولە ءبيدىڭ 7 مەترگە جەتەتىن ەڭسەلى ەسكەرتكىشى بوي كوتەرەدى. اۋدانعا ساپارىندا ومىرزاق ەستاي ۇلى كوكسايەك ەلدى مەكەنىندەگى جەكە شارۋا قوجالىعىمەن تانىستى. ناۋرىز ايىندا ىسكە قوسىلعان شارۋا قوجالىعى 4 گەكتار جەرگە قىزاناق, قيار, ءسابىز, قۇلپىناي, بولگار بۇرىشى سىندى كوكونىستەردى ەگەدى. اۋدان اكىمى باۋىرجان وماربەكوۆتىڭ بايانداۋىنشا, بيىل اۋداندا ەگىلەتىن ەگىس كولەمى 65684 گەكتارعا جەتكەن. بۇدان بولەك, وبلىس اكىمىنىڭ تاپسىرماسىنا سايكەس ءبىر القاپتان 2-3 ءونىم الۋ بويىنشا 105 جوبا ىسكە اسىپ, جاڭا جۇمىس ورىندارى اشىلعان. تامشىلاتىپ سۋعارۋ تەحنولوگياسى مەن قارقىندى جەمىس-جيدەكتىڭ كولەمى 35 گەكتارعا, سۋارمالى جەردىڭ كولەمى 80 گەكتارعا ارتىپ, اۋىلشارۋاشىلىق تەحنيكالارى 4 بىرلىككە جاڭالانعان.
تۇركىستان وبلىسى