ماقتاارال اۋدانىندا تاسقىن سۋ سالدارىنان 11 ەلدى مەكەننىڭ ەگىستىكتەرى زاقىمدانعان. جالپى مىڭنان استام اۋىلشارۋاشىلىعى تاۋار وندىرۋشىلەر ءتىزىمى جاساقتالىپ, 7639 گەكتار ەگىستىكتىڭ شىعىنى 4 ملرد 1 ملن تەڭگە كولەمىندە ەسەپتەلگەن. ال مال شىعىنى 297-ءنى قۇرادى. بارلىق شىعىندار ەسەپتەلىپ, ۇكىمەتكە ۇسىنىلعان.
«كوميسسيا شەشىمى بويىنشا ءار داقىل تۇرىنە وراي وتەماقى جاسالادى. ال ۆەتەريناريالىق جاعداي بويىنشا 297 مال زارداپ شەككەن: 58 سيىر, 227 قوي-ەشكى, 16 جىلقى, 2 تۇيە جانە 227 ءۇي قۇستارى سۋعا اققان. مال شىعىنىن وتەۋ ءۇشىن نارىقتاعى باعا بويىنشا 32 ملن تەڭگە شىعىندى ەسەپتەپ, ۇكىمەتكە ۇسىنىپ وتىرمىز», دەدى اۋىل شارۋاشىلىعى باسقارماسىنىڭ باسشىسى نۇربەك بادىراقوۆ. باسقارما ماماندارى ولگەن ءار مالدىڭ فوتوسىن ءتۇسىرىپ, اكتىسىن دايىنداۋدا. مال مەن ەگىننىڭ وتەماقىلارى توتەنشە جاعدايعا بايلانىستى اشىلاتىن ازاماتتاردىڭ جەكە شوتتارىنا اۋدارىلادى. قوسىمشا شوت اشۋدىڭ قاجەتى جوق. سۋ تارتىلعاننان كەيىن اۋىل شارۋاشىلىعى مينيسترلىگىنەن ارنايى ماماندار كەلىپ, جەردىڭ قۇرامىن, زاقىمدانعان كۇيىن تەكسەرەدى.
تۇركىستان وبلىسى