بۇگىن الماتى قالالىق وڭىرلىك كوممۋنيكاتسيالار الاڭىندا وتكەن بريفينگتە الماتىنىڭ باس پوليتسەيى قانات تايمەردەنوۆ قالاداعى سوڭعى احۋالدارعا قاتىستى مالىمدەمە جاسادى.
الماتىدا جالپى كارانتين ەنگىزىلگەن ساتتەن باستاپ توتەنشە جاعداي رەجىمىن بۇزعانى ءۇشىن 1 مىڭ 965 ادام اكىمشىلىك جاۋاپكەرشىلىككە تارتىلىپتى. ونىڭ ىشىندە 577 قۇقىق بۇزۋشى اكىمشىلىك قاماۋعا الىنسا, 1 مىڭ 54 ادامعا ايىپپۇل سالىنعان. توتەنجە جاعداي تالابىن ەسكەرمەگەن 334 ادامعا ەسكەرتۋ جاسالىپتى. قالادا ورناتىلعان 41 توسقاۋىل بەكەتىندە 54 مىڭنان استام كولىك تەكسەرۋدەن وتكەن.
– وتكەن تاۋلىك ىشىندە قالا بويىنشا زاڭسىز جۇرگەنى ءۇشىن 34 جۇرگىزۋشى ۇستالدى, ونىڭ 30-ى اكىمشىلىك جاۋاپكەرشىلىككە تارتىلدى, 4 جۇرگىزۋشىگە قاتاڭ ەسكەرتۋ جاسالدى. قالادا جاياۋ پاترۋلدەۋگە 2 مىڭ 828 ادام قاتىستى, ونىڭ ىشىندە دەپارتامەنتتىڭ 1 مىڭ 616 قىزمەتكەرى, قورعانىس مينيسترلىگىنىڭ 138 اسكەري قىزمەتكەرى, ىشكى ىستەر مينيسترلىگى اكادەمياسىنىڭ 100 وقىتۋشىسى, ۋسسو-50, دۋيس-14 جانە ۇلتتىق ۇلاننىڭ 990 اسكەرى بار. بۇل جۇمىستارعا بارلىعى دەپارتامەنتتىڭ, ۇلتتىق ۇلان مەن قورعانىس مينيسترلىگىنىڭ جەكە قۇرامىنان 5 مىڭ 330 ادام جۇمىلدىرىلعان. جەدەل شتابتىڭ بۇيرىعىنا سايكەس پوليتسيا قىزمەتكەرلەرىنىڭ كۇشىمەن اعىمداعى جىلدىڭ 19 ناۋرىزىنان باستاپ كارانتيندىك ايماقتار -ينفەكتسيا وشاقتارىن قورشاۋعا الدى. قوعامدىق ءتارتىپتى ساقتاۋ ءۇشىن 481 پوليتسيا قىزمەتكەرى جۇمىلدىرىلدى», دەيدى الماتى قالالق پوليتسيا دەپارتامەنتىنىڭ باسشىسى قانات تايمەردەنوۆ.
قالانىڭ باس پوليتسەيى مالىمدەگەندەي, ءبىر تاۋلىك ىشىندە قالاعا 93 مىڭ 973 كولىك قۇرالى كىرگەن بولسا, كەرىسىنشە 72 مىڭ 413 كولىك قالادان شىققان. مەگاپوليستەگى قىلمىستىق احۋال تۇراقتى باقىلاۋدا. ماسەلەن ءبىر تاۋلىك ىشىندە قالادا 32 قىلمىس تىركەلىپ, ونىڭ 16-سى ء«ىزىن سۋىتپاي» اشىلعان. تايمەردەنوۆتىڭ سوزىنشە, بۇل قىلمىس كورسەتكىشى وسى جىلدىڭ 16 ناۋرىزىمەن سالىستىرعاندا 66,0% -عا از.