الماتىداعى ىرگەلى مادەنيەت وشاقتارىنىڭ ءبىرى جامبىل اتىنداعى قازاق مەملەكەتتىك فيلارمونياسى تمد ەلدەرى بويىنشا ۇزدىك بەستىككە ەندى. بۇل تۋرستات تۋريستىك پورتالى جۇرگىزگەن پوست كەڭەستىك ەلدەردەگى ۇزدىك فيلارمونيالاردىڭ رەيتينگىن انىقتاۋ ناتيجەسىندە بەلگىلى بولعان.
اتالعان ساراپتاما كورەرمەننىڭ فيلارمونيادا وتەتىن كونتسەرتتەرگە بارۋى جانە ونىڭ سايتىنداعى جانە الەۋمەتىتك جەلىدەگى پاراقشالارىنداعى كلاسسيكالىق مۋزىكا كونتسەرتتەرىنىڭ ونلاين كورسەتىلىمىن تاماشالاۋى ءۇشىن جاسالعان.
العاشقى ۇزدىك بەستىككە ماسكەۋدەگى مەملەكەتتىك اكادەميالىق فيلارمونيا, شوستاكوۆيچ اتىنداعى سانكت-پەتەربۋرگ اكادەميالىق فيلارمونياسى, مينسكىدەگى بەلارۋس مەملەكەتتىك فيلارمونياسى, الماتىداعى جامبىل اتىنداعى قازاق مەملەكەتتىك فيلارمونياسى جانە باكۋدەگى ءمۇسلىم ماگوماەۆ اتىنداعى ازەربايجان مەملەكەتتىك اكادەميالىق فيلارمونياسى ەنگەن. باعالاۋ كەزىندە فيلارمونيانىڭ تانىمالدىعى مەن ونىڭ ونلاين كورسەتىلەتىن كونتسەرتتەرىنە تالداۋ جاسالىپ, سونىڭ ناتيجەسى ەسكەرىلگەن.
«تەرەڭنەن تامىر العان ونەر ۇجىمى الماتىنىڭ عانا ەمەس, تۇتاس قازاق مادەنيەتىنىڭ وتكەنى مەن بۇگىنىنىڭ ايناسى. قازاق رۋحانياتىنا قوماقتى ۇلەس قوسقان دارا دارىن يەلەرىنىڭ ءىزى قالعان ۇجىم حالىقتى ونەر كاۋسارىمەن سۋسىنداتىپ كەلەدى. ءبىزدىڭ ۇجىمدى قولداعان بارشا ونەر سۇيەر قاۋىمعا العىستان باسقا ايتارىمىز جوق» دەيدى جامبىل اتىنداعى قازاق مەملەكەتتىك فيلارمونياسىنىڭ ءباسپاسوز حاتشىسى مانار اليەۆا.