بىرىككەن ۇلتتار ۇيىمىنىڭ شەشىمىمەن ءال-فارابي اتىنداعى قازۇۋ بۇۇ-نىڭ تۇراقتى دامۋ جونىندەگى «اكادەميالىق ىقپال» باعدارلاماسىنىڭ جاھاندىق حابىنا ءتورتىنشى مەرزىم قاتارىنان باسشىلىق ەتەدى. بۇل – تۇراقتى دامۋ ماقساتتارىن جۇزەگە اسىرۋعا ۇلكەن ۇلەس قوسىپ وتىرعان جەتەكشى قازاقستاندىق ۋنيۆەرسيتەتتىڭ تابىستى قىزمەتىنىڭ حالىقارالىق جوعارى دەڭگەيدە مويىندالۋىنىڭ دالەلى.
بۇۇ-نىڭ تۇراقتى دامۋ جونىندەگى «اكادەميالىق ىقپال» باعدارلاماسى – سەگىزىنشى باس حاتشى پان گي مۋننىڭ باستاماسى. 2014 جىلدان باستاپ الەمدىك حابتى باسقارعان قازۇۋ, حالىقارالىق دەڭگەيدە وسىنداي جوعارى مارتەبەگە يە بولعان تمد-داعى العاشقى جانە جالعىز جوعارى وقۋ ورنى. قازۇۋ – بۇۇ-نىڭ 10 دۇنيەجۇزىلىك حابتارىنىڭ ءبىرى. ول الەمدىك اكادەميالىق قوعامداستىقتى ۇيلەستىرىپ, عالامشار رەسۋرستاردى ساقتاۋعا, ساپالى ءبىلىم مەن يگىلىككە قول جەتكىزۋدى قامتاماسىز ەتۋگە, يننوۆاتسيالاردى دامىتۋعا, ەكوجۇيەلەردى ساقتاۋعا باعىتتالعان ادامزاتتىڭ تۇراقتى دامۋىنىڭ 17 ماقساتىن ىسكە اسىرۋعا بەلسەندى تارتۋدا.
قازۇۋ – الەمنىڭ تۇراقتى دامۋىنىڭ وزەكتى ماسەلەلەرىن شەشۋگە باعىتتالعان بىرقاتار ءىرى حالىقارالىق ءىس-شارالاردىڭ باستاماشىسى. ۋنيۆەرسيتەت قر تۇڭعىش پرەزيدەنتى نۇرسۇلتان نازارباەۆتىڭ «جاسىل كوپىر» جانە «G-Global» باستامالارىن قولداۋ ماقساتىندا تمد جوعارى وقۋ ورىندارىنىڭ اراسىندا العاش بولىپ «RIO+20» جاھاندىق سامميتىندە سەكتسياسىن اشتى. ازيا ۋنيۆەرسيتەتتەرى رەكتورلارىنىڭ تۇراقتى دامۋ ماسەلەلەرى بويىنشا ءىىى فورۋمىن ۇيىمداستىردى.
2018 جىلى استانا ەكونوميكالىق فورۋمى اياسىندا قازۇۋ بۇرىنعى بۇۇ باس حاتشىسى پان گي مۋننىڭ تىكەلەي قاتىسۋىمەن ونىڭ اتىنداعى تۇراقتى دامۋ ينستيتۋتىن اشتى. حالىقارالىق اكادەميالىق ۇيىم رەتىندە, ينستيتۋتتىڭ قىزمەتى ءبىلىم بەرۋ, زەرتتەۋ جانە مادەني-گۋمانيتارلىق سالالاردا حالىقارالىق ىنتىماقتاستىق پەن كۇش-جىگەردى بىرىكتىرىپ, تۇراقتى دامۋ ماقساتتارىن ىسكە اسىرۋ ءۇشىن ارىپتەستىكتى ىلگەرىلەتۋگە باعىتتالعان.
قازۇۋ جاھاندىق حابتى باسقارا وتىرىپ, «ۋنيۆەرسيتەت 4.0» – جاڭا بۋىن جوو مودەلىن جاساپ ىسكە اسىرۋدا. ول تەحنولوگيالىق جانە رۋحاني-ادامگەرشىلىك پلاتفورمالاردىڭ سيمبيوزىنا نەگىزدەلگەن جانە الەمنىڭ جاۋاپتى ازاماتتارىن قالىپتاستىرۋعا باعىتتالعان. «وركەنيەتتەر اليانسىمەن» بىرلەسە وتىرىپ مودەل نيۋ-يورك قالاسىنداعى بۇۇ شتاب-پاتەرىندە تانىستىرىلدى جانە بولاشاعى كەمەل, ءارى وزەكتى باستاما رەتىندە الەمنىڭ جوعارى وقۋ ورىندارى اراسىندا كەڭ تاراتۋعا ۇسىنىلدى.
قازىرگى ۋاقىتتا ۋنيۆەرسيتەتتە تۇراقتى دامۋ بويىنشا, سونداي-اق حالىقارالىق جۋرناليستيكا جانە قوعامدىق مەديا اتتى يۋنەسكو كافەدرالارى تابىستى جۇمىس ىستەۋدە. سونىمەن قاتار, كولۋمبيا ۋنيۆەرسيتەتىمەن (اقش) بىرلەسىپ, «MDP Global Classroom» تۇراقتى دامۋ بويىنشا ماماندار دايارلاۋ باعدارلاماسى جەمىستى جۇزەگە اسىرىلۋدا. قازۇۋ «بۇۇ مودەلى – جاڭا جىبەك جولى» اتتى دۇنيەجۇزىلىك ستۋدەنتتىك جوبانىڭ بەلسەندى قاتىسۋشىسى.
جاھاندىق حاب رەتىندە قازۇۋ-دىڭ قىزمەتى بۇۇ باسشىلارى تاراپىنان جوعارى باعا الىپ حالىقارالىق مويىنداۋىنا يە بولدى. بۇۇ نيۋ-يورك قالاسىنداعى شتاب-پاتەرىنەن جۋىردا قازۇۋ-عا جولداعان حاتىندا «اكادەميالىق ىقپال» باعدارلاماسىنىڭ جەتەكشىسى رامۋ داموداران ۋنيۆەرسيتەتتىڭ شىن مانىندە تۇراقتى الەم قۇرۋداعى ماڭىزدى ميسسياسىن اتاپ ءوتىپ, وعان جەمىستى جانە ءتيىمدى جۇمىسى ءۇشىن العىس ءبىلدىردى.