بۇگىن قازاقتىڭ كورنەكتى جازۋشىسى, قازاقستان مەملەكەتتىك سىيلىعىنىڭ جانە م.اۋەزوۆ اتىنداعى ۇلتتىق سىيلىقتىڭ لاۋرەاتى, تۇركىستان قالاسى مەن بىرنەشە اۋداننىڭ قۇرمەتتى ازاماتى دۇكەنباي دوسجان ومىردەن ءوتتى.
دۇكەنباي دوسجان 1942 جىلى 9 قىركۇيەكتە قىزىلوردا وبلىسىنىڭ جاڭاقورعان اۋدانىنداعى قۇلانشى اۋىلىندا تۋعان. ەڭبەك جولىن 1964 جىلى قازمۋ-دى بىتىرگەننەن كەيىن الماتى وبلىستىق «جەتىسۋ» گازەتىندە ادەبي قىزمەتكەر بولىپ قىزمەت ەتۋدەن باستادى. ۇزاق جىلدار «جازۋشى» باسپاسىندا اعا رەداكتور,قازاقستان باسپا, پوليگرافيا جانە كىتاپ ساۋداسى ىستەرى جونىندەگى مەملەكەتتىك كوميتەتىندە ءبولىم مەڭگەرۋشىسى قىزمەتتەرىن اتقاردى.بۇدان كەيىنگى جىلدارى قازاقستان جازۋشىلار وداعىندا ادەبي كەڭەسشى, «جالىن» جۋرنالىندا ءبولىم مەڭگەرۋشىسى بولدى.
دۇكەنباي دوسجان قازاق ادەبيەتىنىڭ تاريحىندا 23 جاسىندا «جۋسان مەن گۇلدەر» اتتى رومان جازىپ, باسپادان شىعارعان اسا تالانتتى قالامگەر رەتىندە قالدى. سودان بەرى ونىڭ قۋاتتى قالامىنان 11 رومان, 22 حيكايات, 100-ءدىڭ ۇستىندە اڭگىمە تۋدى.
قالامگەر 1996 جىلى «قۇم كىتابى» ءۇشىن قازاقستان مەملەكەتتىك سىيلىعىن, 1974 جىلى «زاۋال» كىتابى ءۇشىن «مولودايا گۆارديا» باسپاسىنىڭ «قازىرگى زامانعى جاقسى رومان» سىيلىعىن, 1988 جىلى ۋكراينانىڭ «دنەپرو» باسپاسىنان شىققان «جىبەك جولى» رومانى ءۇشىن «تاريحي تاقىرىپتاعى جاقسى كىتاپ» سىيلىعىن الدى.
دۇكەنباي دوسجان سوڭعى جىلدارى بارىنشا ونىكتى جازىپ جۇرگەن جازۋشىلارىمىزدى ءبىرى ەدى. ول قازىرگى زامانعى الەمدىك پروزا ۇلگىسىمەن قالام تارتا باستاعان دا ساناۋلى تۋىندىگەرلەرىمىزدىڭ ءبىرى بولدى.
ءبىز ارعى-بەرگى قازاق ادەبيەتىنىڭ كورنەكتى وكىلدەرىنىڭ ءبىرى بولىپ تابىلاتىن بەلگىلى جازۋشىنىڭ وتباسىنا وسى وقيعاعا بايلانىستى قايعىرىپ, كوڭىل ايتامىز.
«ەگەمەن-اقپارات».