پوليتسيا دەپارتامەنتى حابارلاعانداي, 24 جاستاعى ەر ادام ەسىرتكىنى پالاۋدىڭ ىشىنە جاسىرىپ تۇرمەدەگى تانىسىنا جىبەرمەك بولعان. سوت-حيميالىق ساراپتاماسىنىڭ قورىتىندىسىنا سايكەس, تاركىلەنگەن زات – جالپى سالماعى 67 گرامم بولاتىن «گاشيش» ەسىرتكىسى بولىپ شىقتى.
«قاسكوي سي-18 عيماراتىنا سالەمدەمە جىبەرگەن كەزدە ۇستالدى. وسىلايشا, ۇستالعان ادامدارعا ەسىرتكى تاپسىرۋ ارەكەتى توقتاتىلدى. جەتكىزۋشى الماتى قالاسىندا تۇراتىن ن.ەسىمدى ەر ادام. وعان قاتىستى قر اقبك-ءنىڭ 296-بابى 2 ءبولىمى (ەسىرتكى, پسيحوتروپتىق زاتتاردى, ولاردىڭ انالوگتارىن, پرەكۋرسورلارىن ساتۋ ماقساتىنسىز زاڭسىز دايىنداۋ, وڭدەۋ, يەمدەنۋ, ساقتاۋ, تاسىمالداۋ) بويىنشا سوتقا دەيىنگى تەرگەۋ جۇرگىزىلىپ جاتىر. ن. ۋاقىتشا ۇستاۋ يزولياتورىنا ورنالاستىرىلدى», – دەدى الماتى قالالىق پد ەسىرتكى بيزنەسىنە قارسى كۇرەس باسقارماسىنىڭ باسشىسى ەرلان الماعامبەتوۆ.