الەۋمەتتىك جەلىدە ءتارتىپ ساقشىلارىن بالاعاتتاعان ازامات جاۋاپقا تارتىلدى. بۇل تۋرالى الماتى قالالىق پوليتسيا دەپارتامەنتىنىڭ وكىلدەرى حابارلادى. ەر ادام ءوز ارەكەتى ءۇشىن جۇرتتان كەشىرىم دە سۇراعان.
«مەن قازاقستان رەسپۋبليكاسىنىڭ بارلىق ازاماتتارىنان جانە پوليتسيا قىزمەتكەرلەرىنەن كەشىرىم سۇرايمىن. سىزدەردەن مەنى ءتۇسىنىپ, كەشىرگەندەرىڭىزدى قالايمىن. مەن قر زاڭناماسىندا كورسەتىلگەندەي زاڭ الدىندا تولىق جاۋاپ بەرۋگە دايىنمىن», – دەدى ول.
«جۇرگىزىلگەن مونيتورينگ بارىسىندا ازاماتتىڭ پوليتسيا قىزمەتكەرلەرىن قورلاۋ فاكتىسى انىقتالدى. ول ءوزىنىڭ ينستاگرام پاراقشاسىندا ءتارتىپ ساقشىلارىنا ارنالعان بىلاپىت سوزدەرى بار مونولوگىن جاريالاعان. بىرنەشە رەت كامەراعا جاعىمسىز ءسوز ايتقان. بۇل جىگىت قر قىلمىستىق كودەكسىنىڭ 378-بابىمەن بيلىك وكىلىن قورلاعانى ءۇشىن جازالانادى. بۇل فاكت سوتقا دەيىنگى تەرگەۋدىڭ بىرىڭعاي رەەسترىنە تىركەلگەن. قىلمىستىق ءىستى پد تەرگەۋ باسقارماسى جۇرگىزەدى. بۇگىن ول قاماۋعا الىنىپ, قىلمىستىق جاۋاپكەرشىلىككە تارتىلدى», – دەدى الماتى قالالىق پوليتسيا دەپارتامەنتى باسشىسىنىڭ ورىنباسارى رۋستام ابدراحمانوۆ.