الماتى: جاستاردى جۇمىسپەن قامتۋ باستى نازاردا

شاھارداعى بارلىق 214 ينفراقۇرىلىمدىق جوبانى جۇزەگە اسىرۋعا 103,9 ملرد  تەڭگە ءبولۋ كوزدەلگەن.  الماتىدا الداعى ۋاقىتتا 26 مىڭعا جۋىق جۇمىس ورنى قۇرىلاتىن بولادى.

الەۋمەتتىك-مادەني وبەكتىلەردى, تكش وبەكتىلەرىن جانە كولىك ينفراقۇرىلىمىن كۇردەلى, ورتاشا جانە اعىمداعى جوندەۋ, قايتا جاڭارتۋ جانە سالۋ جۇمىستارى جوسپارلانعان.

سونىمەن قاتار, 125 جوبا ەلدىمەكەندەردى اباتتاندىرۋ اياسىندا ىسكە اسىرىلاتىن بولادى. بۇل – اۋلالاردى, جاياۋ جۇرگىنشىلەر ايماقتارىن, سكۆەرلەر مەن پاركتەردى قايتا جاڭعىرتۋ جانە اباتتاندىرۋ.

الماتى اكىمى ب. ساعىنتاەۆ تج رەجيمىن ەنگىزۋگە بايلانىستى جۇمىس ىستەمەيتىن قالالىقتاردى جۇمىسقا ورنالاستىرۋعا مۇمكىندىك بەرەتىن جوبالاردىڭ ساپالى جانە ۋاقتىلى جۇزەگە اسىرىلۋىن قامتاماسىز ەتۋدى تاپسىردى.

كەڭەستە جاڭا قۇرىلاتىن 26 مىڭ جۇمىس ورنىنىڭ 50% -ى جۇمىسسىز جاستارعا ارنالىپ, قالا حالقىن جۇمىسپەن قامتۋ ورتالىقتارى ارقىلى جۇزەگە اساتىنى اتاپ ءوتىلدى. جوبالار اياقتالعاننان كەيىن 2,4 مىڭنان استام تۇراقتى جۇمىس ورىندارى قۇرىلاتىن بولادى.

جۇمىسپەن قامتۋدىڭ جول كارتاسىن ىسكە اسىرۋ ناتيجەسىندە 47 جاڭا نىسان, ونىڭ ىشىندە 31 الەۋمەتتىك سالاداعى نىسان سالىناتىن بولادى. جۇمىسپەن قامتۋ ورتالىعىنىڭ سايتىندا (http://cz-almaty.kz/) ىزدەۋشىلەر مەن جۇمىس بەرۋشىلەرگە ءوتىنىم بەرۋگە بولادى. بۇگىنگى كۇنى 5964 ادام, ونىڭ ىشىندە 640 ادام – قۇرىلىس نىساندارىنداعى بوس جۇمىس ورىندارىنا رەزيۋمە بەردى.