بۇقارالىق اقپارات قۇرالدارىندا جانە الەۋمەتتىك جەلىلەردە تاراتىلعان الماتىدا تەز ارادا سالىناتىن كوروناۆيرۋستى ەمدەۋگە ارنالعان اۋرۋحانانىڭ سالىنۋ قۇنى 7,4 ميلليارد تەڭگەنى قۇرايدى دەگەن تۇرپاتتاعى اقپارات شىندىققا جاناسپايتىنى رەسمي تۇردە حابارلاندى.
كەلىسىم-شارت بويىنشا قۇرىلىستىڭ جالپى قۇنى ققس-مەن 5,5 ملرد. تەڭگەنى قۇرايدى. بۇل رەتتە قۇرىلىس كومپانياسى جەدەل قۇرىلىس جۇمىستارىندا قولدانىلاتىن open book ءپرينتسيپى بويىنشا جۇمىس ىستەيدى. قۇرىلىس جۇرگىزەتىن مەكەمە بارلىق اعىمداعى شىعىستاردى ەسەپتەيدى جانە تاپسىرىس بەرۋشىگە ەسەپ بەرەدى. بۇل رەتتە ول شارت سوماسىنان اسپاۋى ءتيىس.
قازىرگى ۋاقىتتا قۇرىلىسى ءالى اياقتالماعان, بىراق قۇرىلىس سالۋشىنىڭ الدىن-الا مالىمەتتەرى بويىنشا جۇمىس بارىسىندا ايتارلىقتاي ۇنەمدەۋگە قول جەتكىزىلدى. سونىڭ ەسەبىنەن مەديتسينالىق قۇرال-جابدىقتار ساتىپ الىنادى. سونىمەن بىرگە, قۇرىلىس جۇرگىزۋشى جۇمىستى وزىندىك قۇنى بويىنشا ورىنداۋعا مىندەتتەلدى. ناقتى دەرەكتەر نىسان اياقتالعاننان كەيىن حابارلانادى.
ەسكە سالساق, الماتىدا پرەزيدەنت جانىنداعى توتەنشە جاعدايدى قامتاماسىز ەتۋ جونىندەگى مەملەكەتتىك كوميسسيانىڭ شەشىمىمەن الدىن-الا دايىندالعان جۇقپالى اۋرۋلار اۋرۋحاناسىنىڭ قۇرىلىسى جۇرگىزىلۋدە. اۋرۋحانا 280 كەرەۋەتكە ارنالعان. سونىڭ ىشىندە 28 كەرەۋەت ينتەنسيۆتى تەراپيا بولىمشەسىنە ارنالادى.
ناۋقاستار «لەگىن» ءبولۋ قاعيداتىنا سايكەس اۋرۋحانا «تازا» جانە «جۇمىس ىستەيتىن» (ينفەكتسيالانعان) ايماقتارعا بولىنەدى. پالاتالاردا تەرىس قىسىمدى جانە اۋانى دەزينفەكتسيالاۋدى قامتاماسىز ەتەتىن جەلدەتكىش ورناتىلادى. پالاتالاردان, اكىمشىلىك بولمەلەردەن باسقا, زەرتحاناعا ارنالعان ەكى بولمە, كومپيۋتەرلىك توموگرافيا بولىمشەسىنە ارنالعان بولمە مەن رەنتگەن-كابينەت, زارارسىزداندىرۋ بولمەسى, ديزەل-گەنەراتورى بار رەزەرۆتىك ەنەرگيامەن قامتاماسىز ەتۋ كوزدەلگەن.
سونىمەن قاتار قازاقستان رەسپۋبليكاسىنىڭ قك-ءنىڭ 274-بابىنا سايكەس ادەيى جالعان اقپارات تاراتقانى ءۇشىن ايىپپۇل (5 مىڭ اەك-كە دەيىنگى مولشەردە), تۇزەۋ جۇمىستارى, قوعامدىق جۇمىستارعا تارتۋ, 5 جىلعا دەيىنگى مەرزىمگە باس بوستاندىعىن شەكتەۋ نەمەسە ايىرۋ تۇرىندەگى قىلمىستىق جاۋاپكەرشىلىك قاراستىرىلعانىن اتاپ وتكەن ءجون. توتەنشە جاعداي كەزىندە ادەيى جالعان اقپارات تاراتقانى ءۇشىن ءۇش جىلدان جەتى جىلعا دەيىنگى مەرزىمگە باس بوستاندىعىن شەكتەۋ نەمەسە ايىرۋ تۇرىندەگى قىلمىستىق جاۋاپكەرشىلىك كوزدەلگەن.