ايداي الەمگە اۋىز سالعان الاپات اجداھا ايبارىنا مىنگەن شاقتا, الماتى كوشەلەرىن كەزگەن ءۇيسىز-كۇيسىزدەر قايدا كەتتى دەگەن زاڭدى سۇراق تۋىندايدى. باسقالار بالا-شاعاسىنىڭ قاسىندا وقشاۋلانىپ وتىرعاندا, تىرشىلىك تاقتاسىنان ءتۇرلى جولمەن تايعاناپ كەتكەن تاعدىر يەلەرى قاۋىپتەن قالاي قورعانىپ جاتىر؟
شىنىندا, جىلى ۇيدە, وتباسى جانىندا وتىرعان ءبىز وسى جونىندە ويلانىپ كوردىك پە؟ قالىپتى كەزدە ساياباقتار مەن ۆوكزال ماڭىن تورۋىلداپ جان باعاتىن عارىپتەر قايدا بارىپ باس ساۋعالادى؟ بۇل سۇراققا قالا اكىمى باقىتجان ساعىنتاەۆ جاۋاپ بەردى. ونىڭ سوزىنشە, وسىناۋ قيىن-قىستاۋ ساتتە شاھار بيلىگى ءوز ازاماتتارىن نازاردان تىس قالدىرعان جوق.
– تۇرعىلىقتى مەكەنجايى جوق ادامدارعا قاتىستى ساۋالدار كوپ بولدى. ولار دالادا قالدى, ەشكىمگە كەرەگى جوق, ءتىپتى قالانىڭ سىرتىنا شىعارىپ جىبەردى دەگەن قاۋەسەت تە تاراعان بولاتىن. بۇل ماسەلە ءبىزدىڭ نازاردان تىس قالعان جوق. ءبىز ولاردىڭ قوزعالىسىن ۇدايى باقىلاپ وتىرمىز, – دەگەن اكىم اتالعان جاندارعا ارناپ 300 ورىندىق شاتىر قالاشىق قۇرىلعانىن مالىمدەدى.
اكىم تىلگە تيەك ەتكەندەي, عارىپتەرگە ارنالعان قالاشىقتا ولارعا كەرەۋەت, توسەك جاي, كيىم-كەشەك, ازىق-ت ۇلىك, جارىق سەكىلدى جانعا قاجەت جاعدايدىڭ ءبارى جاسالىپتى. ونداعىلار بەي-بەرەكەت كوشە كەزىپ, ىندەت تارالۋىنا سەبەپكەر بولماس ءۇشىن شاتىر قالاشىقتىڭ اينالاسى بەرىك قۇرساۋمەن قورشالدى. بىرقاتارى قالاداعى قارتتار ۇيىنە ورنالاستىرىلعان. كوڭىل قۋانتارلىعى سول, قالا بيلىگى ولاردىڭ اراسىنان «ەڭبەگىن ساۋىپ» ازدى-كوپتى ناپاقا تابۋعا نيەت بىلدىرگەندەردى جۇمىسپەن قامتۋدىڭ جول كارتاسىنا سايكەس قىزمەتكە قابىلداپ جاتقانىن ايتتى. بۇل ءوز كەزەگىندە, عارىپ جانداردى قالىپتى ومىرگە بەيىمدەۋدىڭ ايقىن جولى.
الماتى