مەملەكەتتىك كوميسسيانىڭ شەشىمىنە سايكەس 20 ءساۋىر, ياعني بۇگىنگى كۇننەن باستاپ الماتى قالاسىنداعى ساقتىق تالاپتارىنا ساي دەپ تانىلعان كاسىپورىندار ءوز جۇمىسىن باستادى.
قالاداعى بىرقاتار ونەركاسىپتىك كاسىپورىنداردىڭ, قۇرىلىس كومپانيالارىنىڭ, سونداي-اق الدىن الا جازىلۋ بويىنشا نوتاريۋستاردىڭ جانە ناۋرىزباي اۋدانىنداعى حقكو ءبىر بولىمشەسىنىڭ (تەك قانا بيزنەسكە قىزمەت كورسەتۋ ءۇشىن) قىزمەتكە كىرىسۋىنە رۇقسات بەرىلدى.
شاھاردا جۇمىسپەن قامتىلعانداردىڭ جالپى سانى بىرتىندەپ ءوسىپ, اي كولەمىندە تاعى دا 90 مىڭ ادامعا كوبەيمەك. كاسىپورىنداردى ىسكە قوسۋ ءىسى دە جۇمىس ەرەكشەلىگىنە بايلانىستى, كەزەڭ-كەزەڭمەن جۇزەگە اساتىن بولادى.
باسقا دا كاسىپورىنداردى ىسكە قوسۋ تەك اۋديت جۇرگىزىلگەننەن كەيىن جانە ۇجىمداردىڭ دايىندىعى مەن سانيتارلىق-ەپيدەميولوگيالىق تالاپتارعا سايكەستىگى تۋرالى وڭ شەشىم شىعارىلعاننان كەيىن عانا مۇمكىن بولادى.
ءاۋديتتى جەرگىلىكتى اتقارۋشى ورگانداردىڭ وكىلدەرىنەن, سەس جانە «اتامەكەن» ۇكپ قىزمەتكەرلەرىنەن تۇراتىن جۇمىس توپتارى جۇرگىزەتىن بولادى. سونداي-اق ىسكە قوسىلعاننان كەيىن جۇمىس ىستەپ تۇرعان كاسىپورىندار ارناۋلى مونيتورينگتان ءوتىپ, تالاپتار ساقتالماعان جاعدايدا, قىزمەتىن توقتاتۋى مۇمكىن.
قىزمەتكەرلەردى COVID-19 ينفەكتسياسىنان قورعاۋ جونىندەگى ءىس-شارالاردىڭ تولىق تىزبەسى قالانىڭ بارلىق ونەركاسىپ جانە قۇرىلىس نىساندارى ءۇشىن ازىرلەندى. جۇمىس بەرۋشىلەر قاتاڭ سانيتارلىق نورمالاردىڭ ساقتالۋىنا دەربەس جاۋاپكەرشىلىكتە بولادى. سونىمەن قاتار, نىسانداردا قىزمەتكەرلەردىڭ جاي-كۇيىنە ساۋالناما جۇرگىزىپ جانە ولاردى جۋرنالعا تىركەي وتىرىپ, سونداي-اق تەپلوۆيزورلاردىڭ كومەگىمەن بايلانىسسىز تەرمومەتريا ارقىلى كۇندەلىكتى اۋىسىم الدىنداعى مەديتسينالىق تەكسەرۋ جۇرگىزۋ تالاپ ەتىلەدى. بارلىق قىزمەتكەرلەردى مەديتسينالىق ماسكالارمەن جانە قولعاپتارمەن, دەزينفەكتسيالاۋشى مايلىقتارمەن نەمەسە تەرى انتيسەپتيكتەرىمەن, سانيتايزەرلەرمەن قامتاماسىز ەتۋ قاجەت.