كۇشەيتىلگەن كارانتين رەجىمى قالانىڭ ەكولوگيالىق احۋالىنا وڭ اسەرىن تيگىزىپ جاتىر.
مەگاپوليس ەكولوگياسىنا جاعىمسىز اسەر ەتەتىن نەگىزگى فاكتور – كولىك سانىنىڭ كوپتىگى. ستاتيستيكا بويىنشا, كۇنىنە جۇمىس بارىسىمەن شاھارعا 200 مىڭعا جۋىق كولىك كىرىپ-شىعادى. توتەنشە جاعدايعا بايلانىستى باسقا ايماقتار مەن الماتى وبلىسى اۋماعىنان كەلەتىن كولىكتەرگە شەكتەۋ قويىلعالى بەرى اۋا لاستانۋى اناعۇرلىم جاقسارعان.
كازگيدرومەتتىڭ سوڭعى مالىمەتتەرى بويىنشا, جالپى قالا اۋماعىنداعى اۋا ساپاسىن قاداعالايتىن مونيتورينگ زياندى بولشەكتەردىڭ 4-5 ەسەگە دەيىن ازايعانىن كورسەتكەن. دەگەنمەن شاھاردىڭ ورتاسىندا لاس اۋا ءالى دە بولسا ساقتالۋدا.
بۇعان دەيىن تابيعات جاناشىرلارى قالانىڭ اۋا كەڭىستىگىن قالىپتا ۇستاۋ ءۇشىن تىم بولماسا ايىنا ءبىر كۇن شاھاردا اۆتوكولىكسىز ءجۇرۋ اكتسياسىن وتكىزۋ تۋرالى ۇسىنىس بىلدىرگەن ەدى. الايدا بۇل ۇسىنىس قولداۋ تابا قويعان جوق.