الماتىدا تاۋ بوكتەرى وپىرىلدى

ابىروي بولعاندا وقىس وقيعادان زارداپ شەككەندەر جوق. 7200 تەكشە مەتر توپىراق پەن تاۋ جىنىسى وزەن ارناسىن بوگەمەي, كىشى الماتى ارناسىنا تۇسكەن.

«كوشكىن 14-15 ءساۋىر كۇندەرى تولاسسىز جاۋعان جاڭبىردىڭ سالدارىنان بولدى. «قازسەلقورعاۋ» رمقك مالىمەتىنشە, كوشكىن قاۋپى ءالى دە ساقتالادى. كەشەن اۋماعىندا ورنالاسقان سپورت زال, باسسەين جانە عيماراتتار قيراۋى مۇمكىن», - دەپ مالىمدەدى تجد ءباسپاسوز قىزمەتى.

ماماندار قايتا كوشكىن بولۋى ىقتيمال دەگەن ۋچاسكەلەردى انىقتاپ, اتالعان اۋماقتىڭ اينالاسى جولاق لەنتامەن قورشالعانىن ايتتى. سونداي-اق مەكەمە يەسىنە قاۋىپتى ايماققا ادامداردى جىبەرمەۋگە جانە عيماراتتارعا كىرۋگە شەكتەۋ قويۋ تۋرالى ەسكەرتۋ جاسالعان.

 – جالپى الماتى اۋماعىندا 41 قاۋىپتى نۇكتە بار. بىلتىرعى جىلى قالاداعى قاۋىپتى اۋدانداردى قۇجاتتاندىرۋ ءۇشىن بيۋدجەتتەن 35 ميلليون تەڭگە بولىنگەن. قازىر سول جۇمىستار جۇرگىزىلۋدە. بيىلعى ناۋرىز ايىنان باستاپ مەدەۋ جانە بوستاندىق اۋداندارىندا جالپى كولەمى 7 220 تەكشە مەتر 4 كوشكىن تىركەلدى. ولار: «يۋبيلەينىي» شاعىن اۋدانىنداعى سۇلۋساي تاس جولىندا (كولەمى 15 تەكشە مەتر); كۋرورتنايا كوشەسى, 75 (كولەمى 3 تەكشە مەتر); بوستاندىق اۋدانىنداعى م. جۇماباەۆ كوشەسى 21-ءۇي (كولەمى 2 تەكشە مەتر); «تاۋ-كۇنى» وقۋ-ساۋىقتىرۋ كەشەنىنىڭ اۋماعىندا (كولەمى 7 200 تەكشە مەتر), –  دەيدى جاۋاپتى ماماندار.