قوعام قايراتكەرلەرىمەن ونلاين رەجيمدە ديدارلاسقان الماتى اكىمى باقىتجان ساعىنتاەۆ شاھارداعى كوروناۆيرۋستىق ينفەكتسيامەن كۇرەس شارالارى تۋرالى ايتا كەلە, قالاداعى بارلىق تاۋەكەل توپتارىنا پتسر ادىسىمەن جەدەل-تەستىلەۋ باستالاتىنىن مالىمدەگەن ەدى.
بەينەجۇزدەسۋ بارىسىندا شاھار باسشىسى اكىمدىك پەن قالالىق جەدەل شتابتىڭ قىزمەتكەرلەرى, ونىڭ ىشىندە ءوزى دە تەست تاپسىرعانىن اتاپ ءوتتى.
«مەن جەدەل تەستتەن ءوتتىم. كورىپ وتىرعاندارىڭىزداي, سىزدەرمەن سويلەسىپ وتىرمىن, ياعني ناتيجەسى تەرىس», - دەدى باقىتجان ساعىنتاەۆ.
ىندەتكە بايلانىستى سوڭعى جاعدايلاردى سارالار بولساق, الماتىدا كوروناۆيرۋس جۇقتىرعان دارىگەرلەر سانىنىڭ ءوزى دەنەسىن دەرت دەندەگەن قاتارداعى تۇرعىندارمەن تەڭەسىپ قالدى. وسى رەتتە ەل اراسىندا ءتۇرلى ءدۇدامال پىكىرلەر ايتىلىپ جاتقانى ءمالىم. كوپشىلىكتىڭ كۇمان-كۇدىگىن تۋدىرعان بۇل سۇراققا جاۋاپ بەرگەن اكىم اتالعان جاعداي قاتاڭ باقىلاۋعا الىنعانىن, بۇعان قاتىستى ناقتى سالا ماماندارى جاۋاپ بەرەتىنىن تىلگە تيەك ەتتى.
سونداي-اق قالادا قىرۋار قارجىعا سالىنىپ جاتقان ۋاقىتشا ەمدەۋ ورتالىعىنىڭ بولاشاقتاعى ماڭىزى تۋرالى قويىلعان ساۋالعا نازار اۋدارعان ساعىنتاەۆ, ىندەت سەيىلگەننەن كەيىن اتالعان ورتالىق بۇزىلىپ تاستالمايتىنىن, باسقا دا قاجەتتى كادەگە جاراتىلاتىنىن ايتتى.
جۇقتىرۋدىڭ جاسىرىن وشاقتارىن انىقتاۋدىڭ جاڭا الگوريتمىنە سۇيەنە وتىرىپ, قالادا ەپيدەمياعا قارسى ءىس-شارالار كۇشەيتىلدى. باستى ماقسات – ەپيدەميولوگيالىق جاعدايدى تۇراقتى باقىلاۋدا ۇستاپ, ىندەتتىڭ ءورشۋ دەڭگەيىن تومەندەتۋگە نەگىزدەلىپ وتىر.