قازاق سپورتىنا ولشەۋسىز ۇلەس قوسقان بەكەت ماحمۇتوۆ ومىردەن ءوتتى

بەكەت ماحمۇتوۆ  1996 جىلدان 2006 جىل ارالىعىندا حالىقارالىق بوكس اسسوتسياتسياسىنىڭ (ايبا) العاشقى ۆيتسە-پرەزيدەنتى بولدى. سونداي-اق  اتالعان ۇيىمنىڭ قارجىلىق كوميسسياسىنىڭ توراعاسى, ايبا-نىڭ ازيا كونتينەنتتىك بيۋروسىنىڭ پرەزيدەنتى قىزمەتىن اتقاردى. سول كەزدە بىرقاتار قازاقستاندىق ازاماتتار  ايبا-ڭ ءارتۇرلى كوميسسيالارىنا تورەشىلىك ەتتى, تەحنيكالىق, بيزنەس-كوميسسيادا, جاستار جانە باسقا سالادا جۇمىستار اتقاردى.

بەكەت ساپاربەك ۇلى باسقارۋشىلىق كەزەڭىندە قازاقستان بوكس قۇراماسى ءۇش رەت – اتلانتا-1996, سيدنەي-2000 جانە افينا-2004 وليمپياداسىندا ۇزدىك ۇشتىككە ءىلىندى.ول 2009-2012 جىلدارى قازاقستان دزيۋدو فەدەراتسياسىنىڭ پرەزيدەنتى بولدى. سونداي-اق ازيا دزيۋدو وداعىنىڭ ۆيتسە-پرەزيدەنتى قىزمەتىن اتقاردى. قاي جەردە قىزمەت اتقارسا دا, ول قازاق سپورتىنىڭ تورتكۇل دۇنيەگە تانىلۋىنا وراسان زور ەڭبەك ءسىڭىردى.قازاقستاندا ەرەسەكتەر اراسىنداعى العاشقى الەم چەمپيونى – ماكسيم راكوۆ, ال 2010 جىلى قازاقستاندىق دزيۋدوشى ەلدوس سمەتوۆ جاستار اراسىندا ءبىرىنشى رەت الەم چەمپيونى اتاندى. اتالعان جاستاردىڭ جەتىستىگىنىڭ ناتيجەسىندە  الەم بىرىنشىلىگىندە ءبىزدىڭ كوماندامىز جالپى  كوماندالىق ەسەپتە ەكىنشى ورىندى يەلەندى.بەكەت ساپاربەك ۇلى 1999 جىلى «قۇرمەت» وردەنىمەن ماراپاتتالسا, 2000 جىلى «قازاقستاننىڭ ەڭبەگى سىڭگەن قايراتكەرى» اتاعىن الدى.