قازاق – قيىندىقتى, تاعدىردىڭ تەپەرىشىن كورۋدەي-اق كورگەن حالىق. تاريح سولاي دەيدى, تاريحتىڭ تامسىلىنە سۇيەنگەن جۇبان اقىن ونى پوەزيا تىلىندە «مىڭ ءولىپ, مىڭ تىرىلگەن» دەپ ورنەكتەيدى. بىراق, بۇگىنگى بۋىن نارىقتىق ەكونيميكاعا اياق باسقان كەزدەگى داعدارىستان باسقا قيىندىقتى باستان كەشكەن جوق. ارينە, حالىق باس كوتەرگەن ءتۇرلى وقيعالار حالىق اراسىنا ۇرەي ورناتقانى راس, بىراق ولار – ءتۇبى مەن تامىرى, ماقساتى مەن مۇددەسى جاعىنان بۇكىل الەمدىك, جالپى حالىقتىق قاسىرەتكە اينالعان, جولىنداعىنى جالماي ورتشە ورشەلەنە ورمەلەپ كەلە جاتقان ەمى جوق ىندەتتەن مۇلدەم بولەك باعىتتاعى وقيعالار بولاتىن, ياعني باسى مەن اياعى بار. بۇگىنگى الەم ەلدەرىن ابىگەرگە ءتۇسىرىپ مىڭداعان ادامدى باۋداي تۇسىرگەن اۋرۋدىڭ باسى قايدان شىعىپ جاتىر, سوڭى قاشان بولادى - بەيمالىم. ەل كوڭىلىندە ۇرەي دە بار, جاقسىلىققا دەگەن ءۇمىت تە بار. ايتەۋىر ءبىر كۇنى جاقسى جاڭالىقتىڭ جارق ەتىپ جەر بەتىنە جايىلا تارالاتىنىنا سەنەدى.
الايدا, ەل اراسىنداعى جەلدەي ەسكەن قاۋەسەت اڭگىمەلەر ونسىز دا جۇقارعان جۇيكەنى, كۇيزەلگەن كوڭىلدى جەرىنە جەتكىزىپ جۇدەتە تۇسەتىن ءتۇرى بار. اۋزى جەڭىل, قولى ۇزىن, ادىمى الاپات اقپاراتتىق تەحنولوگيانىڭ مۇمكىندىگىن پايدالانعان ايتقىشتار ايتىپ جاتىر-ايتىپ جاتىر. جامان نيەتتەرى جوق, تۇپكى ويلارى حالىقتى سابىرعا شاقىرۋ, وقشاۋلانۋ ەرەجەلەرىن ساقتاۋعا ۇندەۋ, وزدەرىنشە اقىل, كەڭەس بەرۋ ەكەندىگى انىق, ايتسە دە اڭگىمەسىنىڭ «اياعىن» الشايتا تىرەپ, «قولىن» ارىگە سوزىپ, تۇزدىقتاپ-ۋىتتاپ, سالماقتاندىرىپ-ماڭىزداندىرىپ, ءتىپتى ساياسيلاندىرىپ زارەنى ۇشىراتىنىن قايتەرسىڭ؟! ءوزى ۇركەيىن دەپ تۇرعان حالىق ءىشى دۇربەلەڭ, دۇكەندەردە - دۇرمەك.
ۇيقىدان ويانا سالا ۇيالى تەلەفونىما سارت ەتە قالعان «سوڭعى حابارعا» قۇلاق توستىم. «مەن ءبىر حابار ەستىدىم جاڭا, كەشە اقتاۋ قالاسىنداعى اناۋ شاعىن اۋداننان شىققان كوروناۆيرۋس جۇقتىرعان ادام ءبىر رەت اۋرۋحاناعا بارىپ, قويىلعان دياگنوزدىڭ ەمىنەن باس تارتىپ ۇيگە بارامىن دەپ كەتىپ قالعان, قايتا كەلىپ ونى جەدەل جاردەممەن الىپ كەتكەن دەيدى. سول ادامنىڭ ۇيالى تەلەفونىن ۇقك ادامدارى تەكسەرگەن دەيدى, ءبىر دوسىم ايتادى, سونىڭ اعاسىنىڭ دوسى ۇقك-دە قىزمەت ىستەيدى ەكەن. تەلەفونىنىڭ مارشرۋتىن تەكسەرسە, ونىڭ جۇرمەگەن جەرى جوق دەيدى, سارى بازار, «اقتاۋ» جانە «بايتەرەك» ساۋدا ورتالىقتارىن ارالاعان, ناۋرىز ايىنىڭ سوڭعى كۇندەرى تۋعان كۇنىن اتاپ وتكەن ەكەن, قىسقاسى ءبىراز اداممەن بايلانىس جاساپ ۇلگەرگەن. بولجام بويىنشا ماڭعىستاۋ ينفەكتسيا جۇقتىرۋ جاعىنان نۇر-سۇلتان مەن الماتىدان سوڭعى ءۇشىنشى ورىندا تۇرۋى مۇمكىن دەيدى» دەگەن ول حالىقتى ۇيدەن شىقپاۋعا, ساق بولۋعا شاقىرادى. ويى-ماقساتى دۇرىس, بىراق حالىق ونى ءدال ءوزى ويلاعانداي قابىلداي قويا ما؟ ۇرەيلەنىپ, اشۋلانىپ, بوقتاپ, تىلدەپ جاتقاندار قانشاما؟
سونىمەن قاتار, ءوزى ايتىپ وتىرعانداي, قۇزىرلى ورىنداردىڭ اقپاراتى اۋىل اراسىندا, اۋىزەكى ءتىلدىڭ ۇشىندا قايدان ءجۇر؟ ونى ايتاتىن دا, ساقتاندىرۋ شارالارىن جۇرگىزەتىن دە ورىندار بار. ال ادامدار اركىم وزىنە, بالا-شاعا, وتباسىنا يە بولىپ, سولارمەن ساقتىق شارالارىن قامتاماسىز ەتسە, وقشاۋلانۋعا قوسقان ۇلەس سول بولار ەدى. سونداي-اق ۇقك-ءنىڭ اقپاراتى قىز-قىرقىن, ايەل-بالا-شاعانىڭ اۋزىندا قايدان ءجۇر, كىم تاراتتى؟ ءتيىستى ورىندار ماسەلەنىڭ انىق-قانىعىن تەكسەرىپ, اتالعان حابارلاماعا ساي حالىققا ناقتى اقپاراتتى بەرەدى دەگەن ويدامىز. قاۋىپسىزدىكتى قامتاماسىز ەتەتىن ورگاننىڭ اقپاراتىن حالىققا تاراتقان تۇلعا انىقتالۋى ءتيىس جانە اۋزى جەڭىلدەردىڭ ەلدى بىلعاۋىنا جول بەرىلمەۋى ءتيىس.
اقىل ايتامىن دەپ حالىقتىڭ اراسىندا اجيوتاج تۋعىزىپ, ساقتاندىرامىن دەپ سەرگەلدەڭگە سالىپ قويۋدان ساقتانعان ءجون. قاۋەسەتتىڭ قارقىنى قاتتى, ول ءتىپتى تۇماۋدان بىرنەشە ەسە زور جىلدامدىقپەن تارايدى دەپ سيپاتتالعان كوروناۆيرۋستان دا ەكپىندى بولىپ تۇر.
...سويتسەم, الگى اقپارات «سوڭعى حابار» ەمەس ەكەن, بۇگىنگى كۇنگى حابارلار لەگىنىڭ باسى ەكەن, ايتارى بار حابارلار ءالى جالعاسۋدا... ءبىرى – قورقىتسا, ءبىرى ساقتاندىرادى, ءبىرى ەشقانداي كوروناۆيرۋس جوق دەپ جۇباتادى. ىلايىم, سولاي بولعاي!
ماڭعىستاۋ وبلىسى