ەلىمىزدەگى كارانتين رەجيمى مادەني مەكەمەلەردىڭ جۇمىسىن توقتاتقانىمەن, حالىقتىڭ ونەردەن قول ءۇزىپ قالماۋى ءۇشىن بىرقاتار ونەر وشاقتارى ء وز كورەرمەنىن قاشىقتىقتان-اق ءان-جىرمەن سۋسىنداتىپ وتىر. ايتالىق, الماتىداعى جامبىل اتىنداعى قازاق مەملەكەتتىك فيلارمونياسى ءوزىنىڭ تىڭدارماندارى ءۇشىن ونلاين كونتسەرتتەر قويۋدا.
الەۋمەتتىك جەلىدەگى ۇيىمنىڭ Instagram جانە Facebook رەسمي پاراقشالارى ارقىلى تىكەلەي ەفيردە 30 - ناۋرىز كۇنى باقىتجان بايقاداموۆ اتىنداعى مەملەكەتتىك حور كاپەللاسىنىڭ ارتىستەرى جىگەر ساحانوۆ پەن جاننات راقمەتوۆانىڭ كونتسەرتى ءوتتى.
بۇگىن, ياعني 31 - ناۋرىز كۇنى قازاقستاننىڭ مادەنيەت قايراتكەرى ەرجان اليمبەتوۆتىڭ "كۇي سويلەسىن" كونتسەرتى جەلى ارقىلى كورەرمەنگە جول تارتتى.
يگى شارا الداعى كۇندەرى جالعاسا بەرمەك. تىڭدارماندار ءساۋىردىڭ 4 كۇنى قازاقستان رەسپۋبليكاسىنىڭ مەملەكەتتىك ۇرمەلى اسپاپتار وركەسترىنىڭ ءسوليسى يگور بلاگودارنىيدىڭ, 12 - ءساۋىر كۇنى قازاقستاننىڭ ەڭبەك سىڭىرگەن قايراتكەرى گۇلجان ۇزەنباەۆانىڭ (فورتەپيانو), 15 - ءساۋىر حالىقارالىق بايقاۋلاردىڭ لاۋرەاتى ەركەبۇلان ساپارباەۆتىڭ (سكريپكا) كونتسەرتىن تاماشالاي الادى. باستالۋى 17:00-دە.