توتەنشە جاعداي كەزىندە ەڭ اۋىر جۇك ارقالايتىن ماماندىق يەلەرىنىڭ كوش باسىندا پوليتسەيلەر مەن دارىگەرلەر تۇراتىنى داۋسىز. جاپپاي كارانتين ەنگىزىلىپ, توتەنشە جاعداي ءتارتىبى بارىنشا كۇشەيتىلگەن الماتى قالاسىندا پوليتسيا قىزمەتكەرلەرى قايدا تۇرىپ جاتىر؟
ءتارتىپ بارشاعا ورتاق. بۇگىندە 700-گە جۋىق پوليتسيا قىزمەتكەرى قالاداعى جاتاقحانالارعا ورنالاسقان. ولاردىڭ دەنى شاھاردان تىس جەردە تۇراتىن ساقشىلار. بۇل كارانتيندىك رەجيمگە بايلانىستى ۆيرۋستىڭ تارالماۋى ء ۇشىن قولعا الىنىپ وتىر. ءتارتىپ ساقشىلارى تۇراتىن جاتاقحانالاردا تۇرمىسقا قاجەتتى بارلىق جاعداي جاسالعان.
– ءبىزدىڭ قالامىز كارانتين رەجيمىندە بولعاندىقتان, كەز كەلگەن تۇرعىن جۇقپالى اۋرۋدىڭ قوزدىرعىشى بولا الادى. توتەنشە جاعدايدا قۇقىق قورعاۋ جۇيەسىنىڭ جۇمىسى كۇشەيىپ, پوليتسيا قىزمەتكەرلەرىنىڭ حالىقپەن بايلانىسى – جۇمىستىڭ اجىراماس بولىگى بولىپ تابىلادى. پوليتسيا جۇمىسىنىڭ ەرەكشەلىگىنە بايلانىستى قالانىڭ سىرتىندا تۇراتىن ءتارتىپ ساقشىلارىن ۋاقىتشا تۇرعىن ۇيمەن قامتاماسىز ەتۋ تۋرالى شەشىم قابىلداندى. مەملەكەت ەسەبىنەن ءبىزدىڭ قىزمەتكەرلەرگە بارلىق جاعداي جاسالدى. كارانتين كەزىندە الماتىنىڭ بارلىق پوليتسيا قىزمەتكەرلەرى كازارمالىق رەجيمدە – قالادا بولادى, – دەيدى الماتى قالالىق پوليتسيا دەپارتامەنتى باسشىسىنىڭ ورىنباسارى ابدۋالي ناشاربەكوۆ.