اۋماعى تۇتاستاي وقشاۋلانىپ, قاتاڭ كارانتين رەجيمىنە كوشكەن الماتىدا تازالىق جۇمىسى كۇنىنە ەكى مارتە, تاڭەرتەڭ جانە كەشكى ۋاقىتتاردا جۇرگىزىلىپ جاتىر. الماتى قالاسى بويىنشا تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداقاسىموۆا شاھار كوشەلەرى مەن اۋلالاردى زارارسىزداندىرۋعا 0,05% ناتري گيپوحلوريتى قولدانىلاتىنىن ايتتى.
«اتالعان دەزينفەكتسيا قۇرالى جاپپاي زارارسىزداندىرۋ ءۇشىن پايدالانۋعا رۇقسات بەرىلگەن. قۇرامىندا توكسين از. اۋرۋ وشاقتارىن دەزينفەكتسيالاۋعا 1% ەرىتىندىنى قولدانامىز. قولدانۋ كەزىندە بارلىق ساقتىق شارالارى جاسالادى», - دەيدى مولداقاسىموۆا.
بۇعان دەيىن قالالىق جاسىل ەكونوميكا باسقارماسى باسشىسىنىڭ ورىنباسارى دياس احمەتقاليەۆ 29 ميلليون شارشى مەتر جول, تروتۋار مەن جاياۋ جۇرگىنشىلەر جولى دەزينفەكتسيالىق قوسپامەن جۋىلاتىنىن مالىمدەگەن ەدى. سونداي-اق باسقارما وكىلى تۇرعىنداردان پايدالانىلعان مەديتسينالىق قالدىقتاردى ءارى قاراي زالاسىزداندىرۋ ماقساتىندا بولەك قاپشىقتارعا جيناپ, شىعارۋلارىن سۇراعان بولاتىن. مامانداردىڭ سوزىنشە, دەزينفەكتسياعا ارنالعان قوسپالاردىڭ ادام مەن جانۋارلاردىڭ دەنساۋلىعىنا مۇلدە زيانى جوق.