ينەنىڭ جاسۋىنداي بولسا دا جاقسىلىق جاساۋ ىزگىلىكتىڭ بەلگىسى. مۇنداي يگى امالدىڭ ەل باسىنا قاتەر تونگەندە ورنى تىپتەن بولەك. الماتى تۇرعىندارىن قولداۋ ماقساتىندا «راۋزا ادە» ءدارىحانالار جەلىسى ازاماتتارعا مەديتسينالىق بەتپەردەلەردى تەگىن ۇلەستىردى. ءدارىحانانىڭ باستاماسىن قالا بيلىگى دە قولداعان.
قازىرگى ۋاقىتتا جۇرتقا اۋاداي قاجەت بولىپ تۇرعان قورعانىش داكەسى ءدارىحانانىڭ 9 بولىمشەسىندە تاراتىلدى. تارتىپكە ساي جان باسىنا 3 مەديتسينالىق بەتپەردەدەن ۇلەستىرىلدى.
ء«بىر كۇندە 20 مىڭعا تارتا مەديتسينالىق ماسكا تاراتتىق. حالىققا وسىنداي توتەنشە جاعداي كەزىندە كومەكتەسكىمىز كەلدى. ەگەر بىزگە بەتپەردە تاعى ءتۇسىپ جاتسا, اكتسيانى ودان ارى قاراي دا جالعاستىراتىن ويىمىز بار», – دەيدى ءدارىحانا قىزمەتكەرلەرى.
تۇرعىندار اكتسيا ۇيىمداستىرۋشىلارىنا ءوز ريزاشىلىقتارىن ءبىلدىردى.
«جايباراقات كەزدە ەلەي بەرمەيتىن قاراپايىم قۇرالعا قول جەتكىزۋ قيىن بولىپ قالار دەپ كىم ويلاعان. باستاپقى كۇندەرى ماسكا تابا الماي ابىگەرگە تۇسكەنىمىز راس. ءتىپتى كوپ جەرلەردە الاقانداي ماتانىڭ باعاسىن شارىقتاتىپ جىبەرگەندەر دە بولدى. ءدارىحانانىڭ بۇل باستاماسى كوڭىل قۋانتادى», دەيدى قالا تۇرعىنى نۇركەن ءابجامالوۆ.
ءدارىحانا ۇجىمى كەلۋشىلەردىڭ ءبىر-بىرىنە ينفەكتسيا جۇقتىرماۋىن دا نازارعا الىپ, ارنايى شارا قابىلداعان. قايىرىمدىلىق اكتسياسىنىڭ ۋاقىتى تاڭعى توعىزدان كەشكى جەتىگە دەيىن جالعاسادى. مەديتسينالىق بەتپەردەلەردىڭ بار-جوعىن تۇرعىندار ءدارىحانا جەلىسىنىڭ عالامتوردا كورسەتىلگەن تەلەفون نومىرلەرىنە حابارلاسۋ ارقىلى بىلە الادى.