اراب چەمپيوناتى «يسلامدى» قابىلدادى (ۆيدەو)

ايتا كەتكەن ءجون, رەسەيدىڭ «زەنيت» فۋتبول كلۋبىنداعى سىناق مەرزىمى ءساتسىز اياقتالعان باۋىرجان بىردەن اراب فۋتبول كلۋبىمەن 5 ايعا كەلىسىمشارتقا وتىرعان ەدى.

ول ءبىرىنشى اقپان كۇنى العاشقى دەبيۋتتىك ويىنىن وتكىزدى. ويىنعا تەك 71-مينۋتتا ارالاستى. احمەت ۆەرمەننىڭ ورنىنا شىققان باۋىرجان يسلامحان ويىن الاڭىندا ەمىن-ەركىن كوسىلدى. باۋىرجاننىڭ ارالاسۋىمەن ويىننىڭ  ەڭ ءبىر شيەلەنىسكەن ساتتەرىندە كوممەنتاتوردىڭ «يسلام, يسلام, يسلام» دەگەن جانايقايى كورەرمەندى ەرىكسىز ەلەڭدەتىپ قويدى. باۋىرجاننىڭ دوپتى الىپ جۇرگەن ءار قوزعالىسىنان ءۇمىتى زور جانكۇيەرلەرگە قوسىلىپ, كوممەنتاتور كەي كەزدە «يسلام, يسلام, حان, حان, يسلام حان» دەپ جانۇشىرا سويلەگەندە ءوزىڭنىڭ دە دەلەبەڭ قوزىپ, ويىنعا بەرىلىپ كەتەسىڭ. «ال-ۆاسلعا» قارسى وسى ويىندا «ال-اين» 5:0 ەسەبىمەن جەڭىس تۋىن جەلبىرەتتى. بۇل ويىندا باۋىرجان ناتيجەلى پاسپەن كوزگە ءتۇستى. ودان كەيىنگى ەكىنشى ويىندا الاڭعا 46-مينۋتتا شىعىپ, قاۋىپتى شابۋىلمەن كوزگە ىلىكتى. جانكۇيەرلەر اراسىندا ونىڭ ويىن مانەرىن مەسۋت وزيلگە ۇقساتاتىندار دا بار. قاي ويىندا بولماسىن جەرگىلىكتى جانكۇيەرلەر جاڭا فۋتبولشىنى جاقسى قارسى العانعا ۇقسايدى. كلۋب باسشىلىعى مەن جانكۇيەرلەردىڭ جىلى شىرايلى قابىلداۋىنا باۋىرجان ريزاشىلىعىن ءبىلدىردى دە.

- ەڭ الدىمەن, مەنى جاقسى قابىلداعانى ءۇشىن ء«ال-اين» فۋتبول كلۋبىنا كوپ راحمەت ايتامىن. سىزدەردىڭ العاشقى كۇننەن بەرگى قولداۋلارىڭىزدىڭ ارقاسىندا, ءوزىمدى ۇيدە جۇرگەندەي سەزىندىم. ۇمىتتەرىڭدى اقتاۋعا بار كۇشىمدى سالامىن. الدا ءبىزدى كوپتەگەن ماڭىزدى ويىن كۇتىپ تۇر. سىزدەردى فۋتبول الاڭىنداعى ونەرىممەن قۋانتامىن دەپ ۇمىتتەنەمىن. كلۋبتىڭ امبيتسياسى قانشالىقتى جوعارى ەكەنىن بىلەمىن. العا قويعان ماقساتتارىمىزعا بىرگە قول جەتكىزىپ, «ال-ءايندى» ودان ءارى داڭققا بولەيتىن بولامىز, - دەپ جازدى يسلامحان ينستاگرام جەلىسىندەگى پاراقشادا.

ال 11 اقپان كۇنى يسلامحان ء «ال-اين» كومانداسىنىڭ ساپىندا ازيا چەمپيوندار ليگاسىنداعى العاشقى ماتچىن وتكىزدى. توپتىق كەزەڭنىڭ ءبىرىنشى ويىنىندا ء «ال-اين» يراننىڭ «سەپاحان» كومانداسىن قابىلداعان بولاتىن. باۋىرجان ويىننىڭ العاشقى مينۋتىنان باستاپ سوڭىنا دەيىن الاڭدا ونەر كورسەتتى. كەزدەسۋ 4:0 ەسەبىمەن قوناقتاردىڭ پايداسىنا شەشىلدى. جەرلەسىمىز وينايتىن اراب فۋتبول كلۋبى جەڭىلىسە دە, باۋىرجاننىڭ ويىنى جايلى اۋىز تولتىرىپ ايتۋعا بولاتىنداي. وزگەشە ويىن ءستيلى مەن شەشىم قابىلداۋداعى شەبەرلىگى كىسى سۇيسىنەرلىك فۋتبولشىمىز بىرنەشە مارتە ءساتتى پاس شىعارىپ بەرگەنىمەن ارىپتەتەرى قارسىلاستىڭ قاقپاسىنان ساڭىلاۋ تابا المادى. سىرتتاي قاراعاندا باۋىرجاننىڭ وزىنە دە ساتتىلىك جەتىسپەي جۇرگەندەي كورىنەدى. بىراق, ودان قازاقتار دا, ارابتار دا زور ءۇمىت كۇتەدى.  

بۇعان دەيىن دە فۋتبولشىمىز الماتىنىڭ «قايراتىندا» جۇرگەندە يا بولماسا ۇلتتىق قۇراما كەزدەسۋلەرىندە الاڭعا شىقسا ەرەكشە ويىنىمەن ەلىتىپ اكەتەتىن. سوندىقتان دا بولار كوپشىلىك ونىڭ ويىنىن ۇناتادى. اركەز قولداۋ بىلدىرەدى. ويتكەنى, ول ەل نامىسى سىنعا تۇسكەن ءار ويىندا دەمىكپەي, بار شەبەرلىگىن سالىپ وينايتىن بىردەن ءبىر فۋتبولشىمىز. سوندىقتان كاسىبي مانسابىنا ءساتتى جالعاسسا ەكەن دەيمىز. جورتقاندا جولىڭ بولسىن, باۋىرجان!

مىنا ۆيدەودان اراب كوممەنتاتورىنىڭ باۋىرجان يسلامحاندى "يسلام, يسلام..." دەپ جانۇشىرا قولداعان ءساتىن تاماشالاي الاسىز.