اق جايىقتا اقبوكەننىڭ جاۋى كوپ...

قىرۋار قاراجات ءبولىنىپ, مەملەكەتتىك قورعاۋعا الىنعانىمەن, جەز كيىكتىڭ جاۋى دا از ەمەس. «وحوتزووپروم» ءوب رەسپۋبليكالىق مەكەمەسىنىڭ كۇندەلىكتى تاراتاتىن اقپاراتىنا قاراساڭىز, مايدان دالاسىنىڭ مالىمەتتەرىنە ۇقسايدى.

«2020 جىلعى 30 قاڭتار كۇنى 19.15. ساعات شاماسىندا «وحوتزووپروم» ءوب رمقك باتىس ايماقتىق فيليالىنىڭ ينسپەكتورلارى مەن باتىس قازاقستان وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ قىزمەتكەرلەرى بىرلەسكەن رەيدتىك ءىس-شارا جۇرگىزۋ بارىسىندا باتىس قازاقستان وبلىسى جاڭاقالا اۋدانىنىڭ اۋماعىندا اتىپ ءولتىرىپ, ءمۇيىزىن كەسىپ العان 50-گە جۋىق كيىك ۇشاسىن تاپتى. وقيعا ورنىنا جاڭاقالا اۋداندىق پوليتسيا ءبولىمىنىڭ جەدەل-تەرگەۋ توبى شاقىرتىلدى».

«2020 جىلعى 3 اقپاندا ساعات 00:05 شاماسىندا ءبوف ورال جانە بوكەيوردا تپ ينسپەكتورلارى, بقو جانىبەك اۋدانىنىڭ اۋماعىندا قورعاۋ ءىس-شارالارىن جۇرگىزۋ كەزىندە جانىبەك اۋدانىنىڭ كۇيگەنكول اۋىلدىق وكرۋگى قۇرساي جەرىندە اتقا مىنگەن ازاماتتار ۇستالدى. «Nike» جازۋى بار سپورتتىق قىزىل-قارا ءتۇستى سومكەسىنەن كيىكتىڭ 12 دانا كەسىلگەن ءمۇيىزىن تاپتى. وقيعا ورنىنا جانىبەك اپب جتق شاقىرىلدى. بۇل فاكت بقو جانىبەك اپب-دە قر قك 339 ب. 1 ب. 03.02. 2020 ج. تىركەلدى».

باتىس قازاقستان وبلىستىق ورمان شارۋاشىلىعى جانە جانۋارلار دۇنيەسى اۋماقتىق يسنپەكتسياسىنىڭ دەرەگىنشە, ورال كيىك پوپۋلياتسياسى كيىكتەرىنىڭ مەكەندەۋ, كوشىپ-قونۋ ورنى باتىس قازاقستان وبلىسىنىڭ 6 اۋدانىن قامتيدى. بۇل دەگەنىڭىز اقجايىق, قازتالوۆ, جانىبەك, بوكەي وردا, جاڭاقالا جانە تاسقالا اۋداندارىنىڭ جالپى اۋماعى 4 ميلليون گەكتار جەرى. دەگەنمەن, كيىكتىڭ ەڭ كوپ بولىگى وبلىستىڭ جانىبەك, بوكەي وردا جانە قازتالوۆ اۋداندارىندا ءجۇر. سوندىقتان براكونەرلەر دە وسى توڭىرەكتى تورلايتىنى تۇسىنىكتى.

- ساناق مالىمەتتەرىنە قاراعاندا سوڭعى جىلدارى بىزدە كيىك سانى جاقسى ءوسىپ كەلەدى. ونى قورعاۋ ءۇشىن ءبىزدىڭ ينسپەكتسيانىڭ جانۋارلار دۇنيەسى جانە اڭشىلىق شارۋاشىلىعى ءبولىمى قىزمەتكەرلەرى «وحوتزووپروم» ءوب» باتىس ايماقتىق فيليالىنىڭ ينسپەكتورلارىمەن بىرگە كيىك جايلاعان ايماقتى قورعاپ, كۇزەتۋ ماقساتىندا بىرلەسكەن 34 رەيدتىك ءىس-شاراعا قاتىستى. ناتيجەسىندە كيىكتى زاڭسىز اتۋ بويىنشا 6 براكونەرلىك فاكتى انىقتالدى. 2019 جىلى باتىس قازاقستان وبلىسى بويىنشا كيىك جانۋارلارىن زاڭسىز اتۋ, دەريۆاتتارىن تاسىمالداۋمەن 26 فاكتى انىقتالدى. قۇقىق بۇزۋشىلاردان كيىك جانۋارىنىڭ 22 توشكەسى جانە 733 ءمۇيىزى تاركىلەندى, - دەيدى باتىس قازاقستان وبلىستىق ورمان شارۋاشىلىعى جانە جانۋارلار دۇنيەسى اۋماقتىق يسنپەكتسياسى باسشىسى قايرات قادەشەۆ.

قازىرگى تاڭدا انىقتالعان 26 قىلمىستىق ءىستىڭ 7-ءۋى سوتتا قارالىپ, 9 ادامنىڭ باس بوستاندىعى 1-3 جىلعا دەيىن شەكتەلگەن ەكەن. 1 ءىس بويىنشا قىلمىستىق تەرگەۋ امالى قىسقارتىلسا, 1 ءىس ۋاقىتىنىڭ ءوتىپ كەتۋىنە بايلانىستى توقتاتىلعان. 17 ءىس بويىنشا ءالى تەرگەۋ ءجۇرىپ جاتىر. سوت شەشىمىمەن 2 دانا اڭشى قارۋى, 1 اۆتوكولىك جانە 1 كۆادراتسيكل تاركىلەنگەن.

- كيىك اۋلاۋشىلارعا قارسى بۇكىل حالىق بولىپ كۇرەسۋىمىز قاجەت. ءبىزدىڭ ءبولىم ماماندارى حالىق اراسىندا جۇيەلى ۇگىت-ناسيحات جۇرگىزىپ, تۇرعىندارمەن, وقۋشىلارمەن كەزدەسۋلەر وتكىزەدى. ورال قالاسى كوشەلەرىنە كيىك ءمۇيىزىن ساتۋ, ساقتاۋ, تاسىمالداۋ قىلمىستىق جاۋاپكەرشىلىككە تارتىلاتىندىعى جونىندەگى 45 ستيكەر قويىلدى. باق بەتتەرىندە دە زاڭسىز كيىك اۋلاۋشىلار تۋرالى اقپارات تۇراقتى تۇردە جاريالانىپ تۇرادى. اۋماعىندا اقبوكەن مەكەندەيتىن اۋدان اكىمدىكتەرىنە براكونەرلىك فاكتىلەردىڭ اشىلۋىنا كومەكتەسكەن جەرگىلىكتى تۇرعىندارعا ماتەريالدىق كومەك كورسەتۋ تۋرالى ۇسىنىس حات جولدادىق, - دەيدى قايرات قادەشەۆ.

باتىس قازاقستان