اسكەري ابىروي مەن قاھارماندىقتىڭ ۇلگىسى بولا بىلگەن اۋعان سوعىسىنىڭ ارداگەرى, پولكوۆنيك, بوريس كەرىمباەۆ بيىل ءتىرى بولعاندا 72 جاسقا تولار ەدى. الماتىدا قالالىق اسكەري-پاتريوتتىق كلۋبتىڭ وقۋشىلارى باتىر رۋحىنا تاعزىم جاساپ, 28 پانفيلوۆشىلار ساياباعىنداعى ەسكەرتكىشكە گۇل شوقتارىن قويدى.
جاس ورەندەر سونداي-اق, «قارا مايوردىڭ» ءجۇرىپ وتكەن ەرلىك جولدارى مەن اسكەري-تاريحي مۇراجايعا قويىلعان جەكە زاتتارىمەن تانىستى. «ول ءادىل, شىنشىل, سەنىمدى اسكەري ادام بولعان ەدى» دەيدى قاھارماننىڭ ارىپتەستەرى.
«بوريس توكەن ۇلىنىڭ جاساعان تاكتيكالارىن قازىر بىزدە اسكەري-پاتريوتتىق كلۋبتىڭ وقۋشىلارى بايقاپ كورىپ, تاجىربيە جيناپ جاتىر. ول كىسىنىڭ اتىن, ەرلىگىن مەكتەپتە وقىتىلاتىن تاريح پانىنە كىرگىزەدى دەگەن ويىمىز بار» - دەيدى قالالىق قورعانىس ىستەرى جونىندەگى دەپارتامەنت باسشىسى امانتاي ۇسەرباەۆ.
داڭقتى ساردار بوريس كەرىمباەۆ بۇرىنعى كەڭەس اسكەرىنىڭ قۇرامىنداعى ارنايى جاساقتىڭ كومانديرى رەتىندە وتان الدىنداعى بورىشىن ابىرويمەن وتەپ, ەرجۇرەك كوماندير, تاماشا تاكتيك, قاراماعىنداعى جاۋىنگەرلەردىڭ شىنايى قامقورشىسى, تالىمگەر ۇستازى بولا ءبىلدى. وسىنداي قاسيەتتەرى ءۇشىن ونى اسكەري قولباسشىلىقتا قاراماعىنداعى جاۋىنگەرلەر ەرەكشە قۇرمەت تۇتسا, قارسىلاسۋشى دۇشپاندار قازاق ساردارىنىڭ ەرلىگى مەن تاپقىرلىعىنا ءتانتى بولدى. بوريس توكەن ۇلى ەلگە ورالعان سوڭ ءوزىنىڭ اسكەري ءبىلىمى مەن باي تاجىريبەسىن تاۋەلسىز قازاقستان اسكەرىنىڭ جاس ساربازدارىنا بەرۋمەن اينالىستى. ونىڭ ەرلىگى مەن ەلگە سىڭىرگەن ەڭبەگى ءوز وتانىن سۇيەتىن ءاربىر جاسقا جاقسى ۇلگى.