جەتىسۋ ولكەسىندەگى جىلىجاي ءوندىرىسى جاقسى جولعا قويىلعان ءوڭىردىڭ ءبىرى – ۇيعىر اۋدانى. بۇگىندە اۋداندا زامانعا ساي تەحنولوگيامەن جابدىقتالعان 5 جىلىجاي جۇمىس ىستەپ تۇر. جالپى اۋماعى 10,4 گەكتار اۋماقتى الىپ جاتقان وندىرىستە وتكەن 6 اي ىشىندە 1200 توننادان استام ءونىم جينالعان.
قارادالادا وسكەن كوكونىس ونىمىنە سۇرانىس جوعارى ەكەن. قازىر جىلىجايدان جينالعان قىزاناقتىڭ 500 تونناسى رەسەيگە جونەلتىلىپتى. كورشى ەلدىڭ نارىعىنا جاسالعان قادام ءساتتى بولىپ, الداعى كۇندەرى تاپسىرىس كولەمى ارتا تۇسەدى دەگەن سەنىم بار. ويتكەنى, قىزاناق ءونىمى جىلىجايدا وسكەنىمەن, تابيعي ناردەن اجىراماعان, ياعني, جاساندى قوسپا سىڭبەگەن. نارىقتا قازىر وسىنداي تابيعي ونىمگە قىزىعۋشىلىق جوعارى.
ايتپاقشى, قارادالا توسىندە باۋ-باقشا كولەمى جىل سايىن جايقالىپ ءوسىپ, كوبەيۋدە. بۇگىندە اۋداندا 623 گەكتار باق بار. ونىڭ ىشىندە 513 گەكتارعا ابريكوس اعاشى, 40 گەكتارعا الما اعاشى وتىرعىزىلعان ەكەن. جالپى, جەمىس-جيدەك باقتارىنىڭ كولەمى 4532 گەكتارعا جەتسە, 1860 گەكتارىنان ءونىم الىندى. سونداي-اق اۋداندا المانىڭ «اپورت» سورتىن ءوسىرۋ جولعا قويىلىپتى, قازىر 380 گەكتاردى قۇرايتىن باقتا تەك وسى جەمىس ءتۇرى وسەدى. ءجۇزىم باعىنىڭ كولەمى 635 گەكتارعا جەتكەن. كۇتىپ, باپتاۋ ءىسىنىڭ ءبارى جاڭا تەحنولوگيادا جۇرەدى. ونىڭ ىشىندە 473 گەكتار باقتا تامشىلاتىپ سۋارۋ ءادىسى قولدانىلادى.
- اۋدانىمىز اۋىل شارۋاشىلىعىنا يەك سۇيەگەنىمەن, قايتا وڭدەۋ ءوندىرىسىن دە دامىتىپ وتىرمىز. قازىر ەلدە 15 ونەركاسىپ ونىمدەرىن وندەيتىن كاسىپورىن بار. وتكەن 9 ايدا 1 ملرد 585 ملن تەڭگەلىك ءونىم ءوندىرىلىپ, بىلتىرعى جىلدىڭ سايكەس كەزەڭىمەن سالىستىرعانداعى تابىس كولەمى 100,2 پروتسەنتتى قۇرادى. ال شاعىن جانە ورتا كاسىپ باعىتىندا 7639 ادام كاسىپكەرلىكپەن اينالىسىپ, ەسەپتى مەرزىمدە 5 ملرد 702 ملن 214 مىڭ تەڭگەلىك تاۋار ءونىمىن ءوندىردى. ياعني, اۋدان بيۋدجەتىنە 402 ملن 576 مىڭ تەڭگە وسى شاعىن كاسىپتەن ءتۇستى, - دەيدى ۇيعىر اۋدانىنىڭ اكىمى شۋحرات نۇراحۋنوۆ.
جالپى ۇيعىر اۋدانىندا بيىلعى جىل قورىتىندىسى بويىنشا الەۋمەتتىك-ەكونوميكالىق دامۋدىڭ بارلىق باعىتتارى بويىنشا وڭ ءوسىم بايقالدى. اتاپ ايتقاندا, اگرارلىق سەكتوردا عانا وتكەن 9 ايدا ارالىعىندا جالپى قۇنى 18 ملرد تەڭگەدەن استام ءونىمى ءوندىرىلىپتى.