شەكارا قىزمەتى ءىرى كولەمدەگى كيىك ءمۇيىزىن الىپ وتپەك بولعان ازاماتتىڭ جولىن كەستى. بۇل تۋرالى قىزمەتتىڭ ءباسپاسوز قىزمەتى حابارلادى.
«2019 جىلعى 13 قاراشادا ورال شەكارا جاساعىنىڭ «اقساي» شەكارالىق باقىلاۋ پۋنكتىندە قازاقستاننان رەسەيگە «رەنو» اۆتوماشيناسىمەن كەتىپ بارا جاتقان 1983 جىلعى تۋعان رف ازاماتى ۇستالدى. شەكارا ناريادى اۆتوكولىكتىڭ جۇك سالعىشىن تەكسەرۋ بارىسىندا جالپى سالماعى 29 كگ جاڭا كەسىلگەن 128 دانا كيىكتىڭ ءمۇيىزى تابىلدى. الدىن الا بولجامدى باعاسى 242 400 000 تەڭگەنى قۇرايدى» دەلىنگەن حابارلامادا.
اتالعان فاكتى «جوعالىپ كەتۋ قاۋپى بار جانە سيرەك, سونداي-اق قولدانۋعا تىيىم سالىنعان وسىمدىكتەر مەن جانۋارلاردى زاڭسىز اۋلاۋ» بويىنشا قر قك 339-بابىمەن قاراستىرىلادى.