وسى جىلدىڭ 10 ايىندا بارلىعى 1878 ەسىرتكى قىلمىسى تىركەلىپ, ونىڭ ىشىندە 1118 ەسىرتكى وتكىزۋ دەرەگى جانە 323 اسا ءىرى كولەمدە ەسىرتكى ساقتاۋ ءىسى انىقتالعان. جالپى 19,4 ت ەسىرتكى زاتتارى, ونىڭ ىشىندە 19 كگ گەروين, 370 كگ گاشيش جانە 9 كگ سينتەتيكالىق ەسىرتكى تاركىلەنىپ الىنعان. وسىعان وراي ىشكى ىستەر مينيسترلىگىندە وتكەن بريفينگتە «كوكنار-2019» الدىن الۋ شارالارى مەن سينتەتيكالىق ەسىرتكىمەن كۇرەس ناتيجەسى جاريا ەتىلدى.
وندا ىشكى ىستەر مينيسترلىگىنىڭ ەسىرتكى قىلمىسىنا قارسى ءىس-قيمىل دەپارتامەنتىنىڭ باستىعى تىلەگەن ماتكەنوۆ ەلىمىزدەگى ەسىرتكى جاعدايى تۋرالى ءمالىم ەتتى. ونىڭ ايتۋىنشا, 31 قازاندا جىل سايىن ماۋسىمنان قازانعا دەيىن ەلدە قاراسورا پىسەتىن كەزەڭدە وتكىزىلەتىن رەسپۋبليكالىق وپەراتسياسى اياقتالعان.
«كوكنار-2019» وتكىزۋ كەزەڭىندە 3000-عا جۋىق ەسىرتكى قۇقىق بۇزۋشىلىعى تىركەلگەن. سونىڭ ىشىندە 900-گە جۋىق ەسىرتكى قىلمىسى بەلگىلى بولسا, ونىڭ ىشىندە 411 – وتكىزۋمەن بايلانىستى, اسا ءىرى مولشەردە ەسىرتكى ساقتاۋ – 156, كونتراباندا – 84, ۇيىمداسقان قىلمىستىق توپتار قۇرۋ – 5 جانە 187 ەسىرتكى ءوسىرۋ ءىسى انىقتالعان. زاڭسىز اينالىمنان 17,5 توننادان استام ءتۇرلى ەسىرتكى, ونىڭ ىشىندە شامامەن 8 كگ گەروين, 220 كيلودان اسا گاشيش جانە 4,7 توننا ماريحۋانا تاركىلەندى.
ماسەلەن, قوستاناي وبلىسىندا وسى ايماقتا ەسىرتكى ساتاتىن ۇيىمداسقان قىلمىستىق توپ قۇرىقتالدى. قىلمىستىق توپ 10 ادامنان تۇرىپ, وندا اركىمنىڭ ءوز اتقاراتىن رولدەرى بولعان. ولاردى ۇستاۋ جانە ىزدەستىرۋ ءىس-شارالارىن جۇرگىزۋ كەزىندە وتكىزۋگە دايىندالعان 400 گرامم گەروين, 3,5 ميلليون تەڭگە جانە 6,5 مىڭ اقش دوللارى, التىن بۇيىمدار تاركىلەنىپتى. سول سياقتى «اتامەكەن» شەكارا بەكەتىنەن وزبەكستان اۋماعىنان قازاقستان رەسپۋبليكاسىنا ءوتىپ كەلە جاتقاندا تاجىكستان ازاماتىنىڭ باسقارۋىنداعى «نەكسيا» ماركالى اۆتوكولىك توقتاتىلادى. كولىك قۇرالىن تەكسەرۋ كەزىندە سالماعى 2 كگ گەروين تابىلعان. ال جامبىل وبلىسىندا شۋ اۋدانىنداعى اقتوبە اۋىلىنان 30 شاقىرىم جەردە ىشىندە سالماعى 275 كگ بولاتىن 24 قاپ «كەپتىرىلگەن ماريحۋانا» تيەلگەن كولىك ۇستالدى.
سوڭعى بىرنەشە جىلدا ۇيىمداسقان قىلمىستىق توپتاردىڭ جوعارى كونتسەنتراتسيالانعان ء«ۇندى قاراسوراسىن» ءوسىرۋ ارەكەتتەرى قىزىلوردا وبلىسىندا جانە وعان جاقىن اۋدانداردا تۇراقتى تۇردە تىركەلىپ, جولى كەسىلۋدە. قىزىلوردا وبلىسىنىڭ ارال قالاسىنان 300 شاقىرىم جەردە ەن دالادا قارا سورا ەگىستىك القابى انىقتالىپ, جالپى سالماعى 1,3 توننا بولاتىن 2,5 مىڭعا جۋىق قاراسورا بۇتالارى تابىلىپ, تاركىلەندى. قۇرامىندا ەسىرتكى بار وسىمدىكتەردى وسىرگەنى ءۇشىن قىزىلوردا وبلىسىنىڭ تۇرعىندارى ۇستالىپ, ولاردان جالپى سالماعى 1 توننا بولاتىن 2 مىڭنان استام قارا سورا بۇتاسى تاركىلەنگەن. ارال قالاسىنان 300 شاقىرىم جەردە ارال اۋدانى پب قىزمەتكەرلەرى 3000 بۇتا مولشەرىندە قارا سورا القابىن تاپتى. سول جەردە قارۋدى پايدالانىپ وقيعا ورنىنان قاشىپ كەتۋگە تىرىسقان 6 ادام ۇستالدى. وقيعا ورنىنان پوليتسەيلەر 2 مىلتىق تاركىلەدى. قازىرگى ۋاقىتتا وسىعان بايلانىستى تەرگەۋ شارالارى جۇرگىزىلۋدە. بارلىعى, ياعني قىزىلوردا, جامبىل, الماتى, اقتوبە جانە قاراعاندى وبلىستارىنىڭ اۋماعىندا 200 گەكتاردان اساتىن 24 قارا سورا القابى تابىلىپتى. وندا سالماعى 7 توننادان اساتىن 30 مىڭنان استام جابايى وسەتىن قارا سورا بۇتالارى تاركىلەنىپ, جويىلعان.
الماتى قالاسىندا ءبىر كولىكتى تەكسەرۋ كەزىندە 502 گرامم سينتەتيكالىق ەسىرتكى سالىنعان ەكى پوليەتيلەن پاكەت تابىلىپ, تاركىلەندى. شىعىس قازاقستان وبلىسىندا جەدەل ىزدەستىرۋ شارالارى بارىسىندا وبلىس ورتالىعىنىڭ بۇرىن سوتتالعان تۇرعىنى ۇستالىپ, ونىڭ پاتەرىن ءتىنتۋ كەزىندە سالماعى 400 گرامنان اساتىن «سكوروست» رەتىندە تانىلعان 216 پوليمەرلى ەسىرتكى بۋماسى شىقتى. سولتۇستىك قازاقستان وبلىسىندا سينتەتيكالىق ەسىرتكىلەردى ازىرلەگەن جاسىرىن زەرتحانا انىقتالعان. وسى ەسىرتكى ازىرلەگەن كۇدىكتىنىڭ ءۇيىن ءتىنتۋ بارىسىندا (كونتسەنترات بولىپ تابىلاتىن) 20 پاكەت «جالبىز», 15 پاكەت «تۇيمەداق», 17 بوتەلكە ەتيل ءسپيرتى («دامدەۋىشتەردى» وندىرۋگە ارنالعان كومپونەنت), اق ۇنتاقتى زات – كونتسەنترات, 5 ليترلىك 2 پوليمەرلى بوتەلكە جانە سينتەتيكالىق كاننابينويدى بار يۋنيكا (سوڭعى سينتەتيكالىق «دامدەۋىش» پرەپاراتىن دايىنداۋ ءۇشىن كونتەينەر رەتىندە پايدالانىلعان), ەلەكتروندى تارازىلار جانە 19 گرامم دامدەۋىش دەپ اتالاتىن تۇتىنۋدىڭ تۇپكىلىكتى ءونىمىن وندىرۋگە ارنالعان زات تابىلىپ, تاركىلەندى.
پەتروپاۆل قالاسىندا جەدەل قىزمەتكەرلەر مەن اقپاراتتىق كوممۋنيكاتسيالىق جۇيەلەر سالاسىنداعى مامانداردىڭ جۇمىسىنىڭ ناتيجەسىندە ەلەكتروندىق كوممۋنيكاتسيالار جۇيەسى – مەسسەندجەرلەر مەن ەلەكتروندى تولەم جۇيەلەرى ارقىلى ەسىرتكى وتكىزۋمەن اينالىسقان قىلمىستىق توپ ۇستالدى. وسى توپتاعى ەسىرتكى بيزنەسىندەگى «ەڭبەك» جولىن ينتەرنەت-دۇكەندەگى كۋرەر-تىعۋشى رەتىندە باستاعان ادامننان سالماعى 6 گرامم كاننابيستىڭ سينتەتيكالىق تەكتەس زاتى «سپايس», سالماعى 70 گرامم (قارا نارىقتاعى باعاسى 1 400 000 تەڭگە بولاتىن, 700-دەن استام ءبىر رەتتىك ولشەمدى قۇرايتىن) «سول» دەگەن اتاۋى بار زات تابىلدى. ەسىرتكى قولدانۋعا ارنالعان مەتالل جانە شىنىدان جاسالعان تۇتىكشەلەر, بۋىپ-تۇيۋگە ارنالعان ماتەريالدار شىقتى. پەتروپاۆلدا 9 جاسىرىن ورىن تابىلدى. ونداعى تىعىلعان ەسىرتكىلەر دە تاركىلەندى.
اتالعان فاكتىنى اشۋ بارىسىنىدا سينتەتيكالىق ەسىرتكىلەردى ىزدەستىرۋ ءۇشىن قىزمەتتىك يتتەر پايدالانىلعان. وسىنداي يتتەر ەلىمىزدىڭ بارلىق وڭىرلەرىندە ۇيرەتىلەدى. وسىلايشا, «كوكنار-2019» بارىسىندا جاڭا پسيحواكتيۆتى زاتتاردىڭ زاڭسىز اينالىمىمەن بايلانىستى 240 ەسىرتكى قىلمىسى تىركەلىپ, ونىڭ ىشىندە 70 ەسىرتكى قىلمىسى, 64 ساتۋ, 6 ساقتاۋ, 170 تەرىس قىلىق انىقتالدى. زاڭسىز اينالىمنان 2 كگ 190 گرامم ءارتۇرلى جاڭا پسيحوبەلسەندى زاتتار الىندى.