2019 جىلعى 16 قازان - سىرتقى ىستەر مينيسترلىگىندە قازاقستاننىڭ سىرتقى ىستەر ءمينيسترى مۇحتار تىلەۋبەردى, كورەيا رەسپۋبليكاسىنىڭ - كان گەن حۆا, قىرعىزستاننىڭ - چينگيز ايداربەكوۆ, تاجىكستاننىڭ - سيرودجيددين مۋحريددين مەن وزبەكستاننىڭ - ابدۋلازيز كاميلوۆتىڭ قاتىسۋىمەن «ورتالىق ازيا-كورەيا رەسپۋبليكاسى» فورۋمىنىڭ (واكر) 12-ءشى وتىرىسى ءوتتى. تۇرىكمەن تاراپىنان وسى ەلدىڭ قازاقستانداعى ەلشىسى تويلى كومەكوۆ قاتىستى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
فورۋم وتىرىسىن اشقان مينيستر م.تىلەۋبەردى اتاپ وتكەندەي, «قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆ پەن قازاقستان پرەزيدەنتى قاسىم-جومارت توقاەۆ ايماق ەلدەرىمەن باۋىرلاس تاتۋ كورشىلىك قارىم-قاتىناستاردى نىعايتۋعا ەرەكشە كوڭىل بولەدى. سونداي-اق واكر شەڭبەرىندەگى ديالوگ اتالعان ۇدەرىسكە تولىعىمەن ىقپال ەتەدى».
قازاقستاننىڭ سىرتقى ساياسي ۆەدومستۆوسىنىڭ باسشىسى فورۋم الاڭى ورتالىق ازيانىڭ كورەيا رەسپۋبليكاسىمەن قارىم-قاتىناسىن جانە ايماقتىق ءوزارا ءىس-قيمىلدى نىعايتۋدىڭ ءتيىمدى تەتىگىنە اينالاتىنىن اتاپ ءوتتى.
فورۋم اياسىندا مەملەكەتتىك ورگاندار, ۇلتتىق كومپانيالار جانە قاتىسۋشى ەلدەردىڭ ساراپشىلار قاۋىمداستىعى وكىلدەرىنىڭ قاتىسۋىمەن ءتورت پانەلدىك سەسسياسى ءوتىپ, ونىڭ بارىسىندا سۋ رەسۋرستارىن باسقارۋ, تەحنيكالىق ستاندارتتاۋ, «جاسىل» ەنەرگەتيكا جانە اقپاراتتىق تەحنولوگيالار سالالارىنداعى ورتالىق ازيا ەلدەرى مەن كورەيا رەسپۋبليكاسىنىڭ ىنتىماقتاستىعىن دامىتۋ پەرسپەكتيۆالارى تالقىلاندى.
پانەلدىك سەسسياعا قاتىسۋشىلار كورەيا رەسپۋبليكاسىنىڭ وزىق تاجىريبەسىن قولدانا وتىرىپ, وسى سالالارداعى بىرلەسكەن جوبالاردى ىسكە اسىرۋعا قىزىعۋشىلىق تانىتتى.
سونداي-اق ەكى ەلدىڭ ىسكەر توپتارى وكىلدەرىنىڭ قاتىسۋىمەن سۋ شارۋاشىلىعى سالاسىنداعى ىنتىماقتاستىق بويىنشا قازاقستان-كورەيا بيزنەس-كونسۋلتاتسيالارى ءوتتى.
ءىس-شارا ناتيجەسىندە سىرتقى ىستەر مينيسترلەرى ورتالىق ازيا ەلدەرى مەن كورەيا رەسپۋبليكاسى اراسىنداعى ءوزارا ءتيىمدى ىنتىماقتاستىقتى ودان ءارى تەرەڭدەتۋگە ىقپال ەتۋ نيەتىن راستادى.
فورۋم حاتشىلىعىنىڭ 2020 جىلعا ارنالعان جۇمىس جوسپارى ماقۇلدانىپ, وعان كولىك جانە لوگيستيكا, دەنساۋلىق ساقتاۋ, ءبىلىم بەرۋ, مادەنيەت جانە تۋريزم سالالارىنداعى ىنتىماقتاستىق جوبالارى كىردى.
«ورتالىق ازيا – كورەيا رەسپۋبليكاسى» فورۋمى 2007 جىلى كورەيا رەسپۋبليكاسىنىڭ باستاماسىمەن قۇرىلعان. ونىڭ قىزمەتىنىڭ نەگىزگى باعىتتارى ەنەرگەتيكا جانە مينەرالدىق رەسۋرستار, قۇرىلىس, كولىك جانە اقپاراتتىق-تەلەكوممۋنيكاتسيالىق تەحنولوگيالار, مادەنيەت جانە ءبىلىم سالالارىنداعى ىنتىماقتاستىقتى نىعايتۋ بولىپ تابىلادى.