2019 جىلعى 17-19 قازانعا ارنالعان بولجام. اۋا رايىنىڭ بۇزىلۋىنا بايلانىستى سينوپتيكتەر بىرنەشە وڭىردە ەسكەرتۋ جاريالادى. بۇل تۋرالى ەنەرگەتيكا مينيسترلىگىنىڭ ءباسپاسوز قىزمەتى حابارلادى.
اتموسفەرالىق پروتسەستەردىڭ تەز اۋىسۋى قازاقستان بويىنشا اۋا رايىنىڭ قولايسىزدىعىن تۋدىرادى. الداعى ءۇش تاۋلىكتە قازاقستان تەرريتورياسى بويىنشا ۇلكەن جىلدامدىقپەن سۋىق اتموسفەرالىق فرونتتار جىلجيدى, الايدا ونىڭ ارتىنان انتيتسيكلون كەلەدى, بىراق ول دا ءوز كەزەگىندە 19 قازاندا كەزەكتى تسيكلونمەن جانە اركتيكالىق فرونتتارمەن ىعىستىرىلاتىن بولادى.
سوندىقتان كوپتەگەن وبلىستاردا بۇلتتى جانە جاۋىن-شاشىندى (جاڭبىر, قار) اۋا رايى كۇتىلەدى. سولتۇستىك وبلىستاردا كوكتايعاق بولجانادى, سولتۇستىك-باتىستان قاتتى جەل سوعادى, سوعان بايلانىستى بوراننىڭ بولۋى مۇمكىن.