بۇل تۋرالى elbasy.kz حابارلادى.
كەزدەسۋ بارىسىندا قازاقستاننىڭ تۇڭعىش پرەزيدەنتى مارتەبەلى مەيمانعا ەۋرازيا ەلدەرى سپيكەرلەرىنىڭ كەڭەسىنە قاتىسقانى ءۇشىن العىس ءبىلدىردى.
– تاۋەلسىزدىك جىلدارى كورەيامەن ەڭ جىلى قارىم-قاتىناس ورناتۋعا تىرىستىم. بىزدە ەكونوميكالىق ىنتىماقتاستىقتىڭ ۇلكەن باعدارلاماسى بار. قازاقستاندا 100 مىڭ كارىس ۇلتى تۇرادى. بۇل - ءبىزدىڭ ەلدەرىمىزدىڭ اراسىنداعى التىن كوپىر. ءبىز ەكونوميكالىق جانە ساياسي ىنتىماقتاستىقتى جالعاستىرۋعا مۇددەلىمىز, - دەدى نۇرسۇلتان نازارباەۆ.
سونداي-اق ەلباسى وڭتۇستىك جانە سولتۇستىك كورەيا اراسىنداعى ديالوگ ورناتۋ ۇدەرىسىنە قولداۋ ءبىلدىردى.
ءوز كەزەگىندە مۋن حي سان ەۋرازيا ەلدەرى سپيكەرلەرى كەڭەسىنىڭ جوعارى دەڭگەيدە وتكەنىن اتاپ ءوتتى.
– الەم حالقىنىڭ 75 پايىزى ەۋرازيا قۇرلىعىندا تۇرادى. الەمدىك ءجىو-ءنىڭ 60 پايىزى ەۋرازياعا تيەسىلى. وزدەرىڭىز بىلەتىندەي, ەۋرازيانىڭ ەڭ شىعىس شەتى – ول كورەيا رەسپۋبليكاسى. قازاقستان وسى كونتينەنتتىڭ قاق ورتاسىندا. ءبىزدىڭ العاشقى وتىرىسقا 19 مەملەكەت, ەكىنشىسىنە - 27, ۇشىنشىسىنە - 39 مەملەكەت قاتىستى. بۇگىنگى باسقوسۋعا 55-تەن استام مەملەكەت قاتىسۋدا. بۇل جەتىستىك – ءسىزدىڭ ەڭبەگىڭىز, - دەدى كورەيا رەسپۋبليكاسى ۇلتتىق اسسامبلەياسىنىڭ سپيكەرى.