قىرعىزستان مەن تاجىكستان شەكاراسىنداعى كيكىلجىڭ قىركۇيەكتىڭ 15-دە باستالىپ, 18-دە اياقتالدى. الايدا كىسى قانى توگىلىپ, «ازيا-پليۋس» اقپاراتتىق اگەنتتىگىنىڭ حابارىنا قاراعاندا, ءبىر قىرعىز, ءۇش تاجىك شەكاراشىسى قازا تاپقان.
قىرعىز-تاجىك شەكاراسىنىڭ جالپى ۇزىندىعى 976 شاقىرىم, سونىڭ ىشىندە دەليميتاتسيا مەن دەماركاتسيادان ءوتىپ, بەكىتىلگەنى تەك 504 شاقىرىم عانا. دەمەك, بۇل ەكى ەلدىڭ ورتاق شەكاراسىنىڭ تەك جارتىسى عانا بەلگىلەنگەن دەگەن ءسوز. بۇل – شەكارا ماڭىنداعى كيكىلجىڭدى, سۋعا, جەرگە دەگەن تالاستى ۇنەمى تۋىنداتىپ تۇراتىن جاعداي. ەتنوسارالىق كيكىلجىڭدەر دە بولىپ تۇرادى. كەيدە اشىنعان حالىق ءبىر-بىرىنە تاس اتىپ, ءتىپتى وق جاۋدىرىپ, جاعدايدى قاندى تارتىسقا ۇلاستىرىپ جىبەرەدى. مىنا وقيعا دا سوندايدىڭ ءبىرى بولىپ وتىر.
بۇل جولعى كيكىلجىڭ قىرعىزستاننىڭ باتكەن وبلىسى مەن تاجىكستاننىڭ سوعدي وبلىسى تۇرعىندارىنىڭ اراسىندا 15 قىركۇيەكتە باستالدى. باتكەن وبلىسىنىڭ لايلەك اۋدانىنداعى ماقسات شەكارالىق بەكەتىنىڭ ماڭىندا تاجىكتەر تالاس اۋماققا قۇرىلىس جۇرگىزە باستاعاندىقتان كيكىلجىڭ تۋدى دەگەندى قىرعىز جاعى ايتادى. ال تاجىك جاعى قۇرىلىستى الدىمەن قىرعىز جاعى باستادى دەپ ايىپتايدى.
قالاي دەسەك تە قازىر كيكىلجىڭدى ناقتى قاي جاعى بۇرىن باستاعانى تالاس تۋدىرىپ تۇر. ايتەۋىر ەكى جاقتىڭ تۇرعىندارى دا ءوز تۋلارىن تىگىپ, تالاس ايماقتا قۇرىلىس جۇمىستارىن جۇرگىزۋدى باستاعان. ءبىر-بىرىنە قارسى تاس اتۋدان باستالعان كيكىلجىڭ كەلەسى كۇنى اتىسقا ۇلاسقان.
ەكى جاق تا وزدەرىنىكىن دۇرىس, قارسىلاستارىن ارانداتۋشىلار, اتىستى باستاعان سولار دەپ ايىپتايدى, بىراق ناقتى كىم ەكەنىن انىقتاۋ قيىن. «فەرگانا News» باسىلىمى دا جوعارىداعى «ازيا-پرەسستىڭ» دەرەكتەرىن قايتالاپ, تاجىك جاعىنان ءۇش, قىرعىز جاعىنان ءبىر شەكاراشىنىڭ قازا بولعانىن جاريالادى. سونىمەن قاتار وسى باسىلىمنىڭ جاريالاۋىنا قاراعاندا, قىرعىز جاعىنان جارالانعاندار سانى 13, تاجىك جاعىنان جارالانعاندار 12 ادام بولىپتى.
جوعارىدا ايتقانىمىزداي, بۇل ەكى ەلدىڭ شەكاراسىنداعى ءجيى بولىپ تۇراتىن شيەلەنىستى وقيعانىڭ ءبىرى. وسى جىلدىڭ شىلدە ايىندا عانا قىرعىزدىڭ اقساي ايىلىنىڭ ماڭىندا وسىنداي كيكىلجىڭ بولىپ, ءبىر ادام ءولىپ, 14 ادام جارالانعان.
«ينتەرفاكس» اگەنتتىگىنىڭ حابارىنا سۇيەنسەك, قىرعىزستان پرەزيدەنتى سوورونباي جەەنبەكوۆ قىرعىز-تاجىك شەكاراسىنداعى كيكىلجىڭدى حالىقارالىق قۇقىق شەڭبەرىندە شەشىپ, تەزىرەك رەتتەۋ قاجەتتىگىن مالىمدەگەن. سونداي مالىمدەمە تاجىكستاننىڭ ورتالىق بيلىگى تاراپىنان دا جاريالاندى.
وسىدان ون جىلداي بۇرىن قىرعىزستان مەن تاجىكستان تالاس تۋدىرعان شەكارالىق اۋماقتارعا قۇرىلىس جۇرگىزبەۋ تۋرالى كەلىسىمگە قول قويعان. بىراق وسى جىلدار ىشىندە ەكى جاق كەلىسىمدى بۇزدى دەپ ءبىر-ءبىرىن ايىپتاۋمەن كەلەدى.
بۇل جولعى كيكىلجىڭ ەكى ەلدىڭ پرەمەر-مينيسترلەرىنىڭ كەلىسسوز جاساۋىمەن 18 قىركۇيەكتە شەشىلدى. ەكى ەل اتىس جاسالعان جەردەن قارۋلى كۇشتەردى اۋلاق اكەتۋگە كەلىستى. سونىمەن قاتار قىرعىزستان جاعى بۇرىن تۇرعىزعان باقىلاۋ مۇناراسىن بۇزۋعا, ال تاجىكستان جاعى قۇرىلىس تۇرعىزباۋعا كەلىستى.
ارينە بۇل تۇپكىلىكتى شەشىم ەمەس, كيكىلجىڭدى رەتتەۋدىڭ ءبىر امالى عانا. وسىعان قاراپ قازاقستاننىڭ ءوز شەكاراسىن تۇپكىلىكتى بەكىتىپ, رەتتەپ العانىنا ريزا بولاسىڭ. ارينە وندايعا مەملەكەتتەر باسشىلارىنىڭ ساياسي ەرىك-جىگەرى كەرەك ەدى, قىرعىزستان مەن تاجىكستان ليدەرلەرىنىڭ ونداي شەشىمگە بارا الماعانى وكىنىشتى-اق. سوندىقتان تالاس اۋماقتاعى شەكارالىق كيكىلجىڭدەر دە جالعاسا بەرەرى ءسوزسىز. ول ءالى تالاي ادامنىڭ ولىمىنە سوقتىرۋى دا مۇمكىن.