جاڭعىرۋدىڭ جاڭا كەزەڭىندە الەۋمەتتىك سالانى جاڭعىرتۋدىڭ ماڭىزدىلىعىن ەسكەرگەن پرەزيدەنت وسى سالاداعى باسىم باعىتتارعا ءمان بەرۋ قاجەتتىگىن وتە ورىندى ايتىپ ءوتتى. ءبىلىم بەرۋ ساپاسى جاستار اراسىندا جۇمىسسىزدىقتان ايقىن كورىنەدى. سونىڭ ىشىندە بىلىكتى پەداگوگ كادرلاردىڭ تاپشىلىعىن جويۋ ماقساتىندا «ديپلوممەن – اۋىلعا!» باعدارلاماسىنىڭ اياسىن كەڭەيتىپ, جۇمىستى جاڭا دەڭگەيدە جالعاستىرۋ قاجەتتىگىن قاسىم-جومارت توقاەۆ باسا ايتتى.
جاستاردى جۇمىسپەن قامتىپ, ولارعا الەۋمەتتىك قولداۋ كورسەتەتىن بۇل باعدارلاما باتىس قازاقستان مەملەكەتتىك ۋنيۆەرسيتەتىندە وڭ ناتيجە بەرىپ كەلەدى. 2015 جىلدان بەرى 560-تان اسا تۇلەگىمىز وسى باعدارلاما بويىنشا جۇمىسقا ورنالاستى. تۇلەكتەردى جۇمىسپەن قامتۋ ءۇشىن جەرگىلىكتى اۋدان اكىمدىكتەرىمەن ەكى جاقتى مەموراندۋمدار جاساپ, ماسەلەنى بولاشاقتا دا باسا نازاردا ۇستايتىن بولامىز.
ەل پرەزيدەنتى ءوز تۇلەكتەرىن جۇمىسپەن قامتۋ جاعىنان ەلىمىزدەگى جوو-لاردىڭ جارتىسى عانا 60 پايىزدىق دەڭگەيگە قول جەتكىزىپ وتىرعانىن ايتتى. ءيا, بۇل وتە ماڭىزدى ماسەلە. ءبىلىم جانە عىلىم مينيسترلىگى ءبىلىم ساپاسىن قامتاماسىز ەتۋ ماقساتىندا تالاپكەرلەر مەن ستۋدەنتتەردىڭ مۇددەلەرىن قورعاۋ ءۇشىن بۇعان دەيىن دە جوو-نىڭ قىزمەتىنە جوسپاردان تىس تەكسەرۋلەر جۇرگىزە باستاعان ەدى.
وتكەن وقۋ جىلىندا ۋنيۆەرسيتەتىمىزدى 1348 تۇلەك ءبىتىردى. بۇگىنگى تاڭدا وسى تۇلەكتەردىڭ 65%-ى جۇمىسپەن قامتىلىپ وتىر. ارينە پەداگوگيكالىق ماماندىقتار بويىنشا بىتىرگەن تۇلەكتەردىڭ جۇمىسقا ورنالاسۋ كورسەتكىشى تەحنيكالىق ماماندىقتارمەن سالىستىرۋعا كەلمەيدى. دەگەنمەن جاس پەداگوگ مامانداردى جۇمىسقا ورنالاسۋ كورسەتكىشىن جوعارى دەڭگەيگە جەتكىزۋ ماقساتىندا جۇمىلا ەڭبەك ەتۋىمىز قاجەت. بۇعان 2020 جىلدان باستاپ مۇعالىمدەردىڭ جالاقىسى 25 پايىزعا وسەتىندىگى تۋرالى بۇگىنگى قۋانىشتى حابار دا سەپ بولارى انىق. ەندى «پەداگوگ مارتەبەسى» تۋرالى زاڭ جوباسى دا ماقۇلدانىپ, بەكىتىلۋىن كۇتۋدەمىز.
نۇرلان سەرعاليەۆ,ماحامبەت وتەمىس ۇلى اتىنداعى بقمۋ رەكتورى