باۋىرجان بايبەك: ناعىز پاتريوت بولساڭ, تەرىڭدى توگىپ ەڭبەك ەت

جاستارمەن وتكەن بەيرەسمي كەزدەسۋ بارىسىندا باۋىرجان بايبەك ولاردى تولعاندىرىپ جۇرگەن ءتۇرلى سۇراقتارعا جاۋاپ بەرىپ, ءوزىنىڭ ومىرلىك تاجىريبەسىمەن ءبولىستى. ول ءوز سوزىندە پارتيا ليدەرى, ەلباسى نۇرسۇلتان نازارباەۆ «قازاقستاننىڭ بولاشاعى – بۇگىنگى جاستار» دەپ جاس بۋىنعا ۇلكەن سەنىم ارتىپ وتىرعانىن جەتكىزدى.

– ەلباسى پارتياعا ەل بولاشاعىنا شىن جانى اشيتىن, بەلسەندى جاستاردى توپتاستىرۋدى, ولارعا ارناپ الەۋمەتتىك ليفت قۇرىپ, جاس بۋىندى تولعاندىراتىن ەڭ وزەكتى ماسەلەلەردى شەشۋدى تاپسىردى. سونىمەن قاتار, ەل پرەزيدەنتى قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا جاستارعا بەرىلەتىن ءبىلىم ساپاسىنا ايرىقشا نازار اۋدارىلىپ وتىر. «ديپلوممەن – اۋىلعا» باعدارلاماسىنىڭ اياسىن كەڭەيتىپ, جۇمىستى جاڭا دەڭگەيدە جالعاستىرۋ ءۇشىن پرەزيدەنت ۇكىمەتكە وسى باعدارلامانى قارجىلاندىرۋدى 20 ملرد تەڭگەگە جەتكىزۋدى تاپسىردى, - دەدى باۋىرجان بايبەك. 

قازىرگى تاڭدا «Jas Otan» 2020 جىلعا دەيىنگى «جاستار وتانعا!» جاستاردىڭ تابىسقا جەتۋ جولى» باعدارلاماسىنىڭ جۇزەگە اسىرىلۋىن ەگجەي-تەگجەيلى تالداۋ جۇمىستارى جۇرگىزىلۋدە. العاشقىسى تولىقتاي قورىتىندىلانعاننان كەيىن 2025 جىلعا دەيىنگى جاڭا باعدارلاما جاسالادى. جاستار قاناتىنىڭ قولدانىستاعى جارعىسىنا سايكەس جاڭا باعدارلاما كەلەسى جىلدىڭ كوكتەمىندە «Jas Otan» جاستار قاناتىنىڭ V سەزىندە قابىلدانادى.

«Nur Otan» پارتياسى توراعاسىنىڭ ءبىرىنشى ورىنباسارى جاستار قاناتىنىڭ نەگىزگى مىندەتى – ەلىمىزدىڭ بارلىق ايماقتارىنداعى قۇرداستارىنا پارتيانىڭ جاستار ساياساتىن, «Jas Otan»-نىڭ جوبالارىن ىسكە اسىرۋداعى جاڭا تاسىلدەردى جەتكىزۋ, سونداي-اق 2025 جىلعا دەيىنگى جاڭا باعدارلاما ءۇشىن ۇسىنىستار جيناۋ جانە ولاردى تالقىلاۋدى ۇيىمداستىرۋ ەكەنىن اتاپ ءوتتى.

ءوز كەزەگىندە لاگەرگە كەلگەن جاستار قوعامدىق قۇندىلىقتار, جاتاقحانا, جۇمىسقا ورنالاسۋ, الەۋمەتتىك جەلىلەردىڭ ىقپالى جانە بالا تاربيەسى, وتباسىلىق قۇندىلىقتارعا قاتىستى ويلارىمەن ءبولىسىپ, ساۋالدارىن قويدى.

–– مەملەكەت جاستارعا قولداۋ كورسەتۋدى جالعاستىرا بەرەدى. ول ءۇشىن ءارتۇرلى مەحانيزمدەر جاسالىپ تا جاتىر. دەگەنمەن, جاستار كەز كەلگەن جەتىستىككە ەڭ الدىمەن ءوزى تاباندىلىق تانىتىپ, تالماي ەڭبەك ەتكەندە عانا جەتۋگە بولاتىنىن ءتۇسىنۋى ءتيىس. كەدەرگىلەر ادامنىڭ ءوز باسىندا. ناقتى ماقسات قويىپ, العا ۇمتىلۋ كەرەك جانە جاڭا نارسەلەردى جاساۋدان, كوپشىلىكتىڭ سىنىنا ۇشىراۋدان قورىقپاۋ قاجەت. ەڭبەك ەتەمىن دەگەن ادامعا ەلدە جۇمىس جەتكىلىكتى. بىلىكسىز زاڭگەر بولعانشا, مىقتى دانەكەرلەۋشى بولعان دۇرىسىراق ەمەس پە؟ ەگەر ادام شىن مانىندە تابىستى بولۋدى قالاپ, سول جولدا تاباندىلىق تانىتسا, ناتيجەگە قول جەتكىزەتىنى انىق. وزىندىك ويى بار, تىڭ باستامالاردان قورىقپايتىن, ەڭبەكقور ادامعا ءوز ەلىمىزدە دە مۇمكىندىك كوپ. «Nur Otan»-نىڭ قاتارىندا ەلگە شىن جانى اشيتىن, ەلدىڭ ەرتەڭىن جاقسى جاققا وزگەرتۋگە قۇلشىنعان ازاماتتار بولۋى كەرەك, - دەدى پارتياسى توراعاسىنىڭ ءبىرىنشى ورىنباسارى.

ايتا كەتەيىك, «Jas Otan» جاستار قاناتىنىڭ مۇرىندىق بولۋىمەن 2009 جىلدان باستاۋ العان «جاستار وتانعا!» رەسپۋبليكالىق جاستار ساياسي لاگەرى وسىمەن قاتارىنان ون ءبىرىنشى رەت ۇيىمداستىرىلدى. بيىل بۇل شارا اقمولا وبلىسىنداعى «بالداۋرەن» وقۋ-ساۋىقتىرۋ ورتالىعىندا 4-9 قىركۇيەك ارالىعىندا ءوتتى. وندا ەلىمىزدىڭ تۇكپىر-تۇكپىرىنەن كەلگەن 170-كە جۋىق بەلسەندى جاس ءوزارا تاجىريبەلەرىمەن الماسىپ, ءتۇرلى سەمينار, ترەنينگتەر مەن ترەند-سەسسيالارعا جانە سپورتتىق, ويىن-ساۋىق شارالارىنا قاتىستى.