كەشە رەسەيدىڭ ەكاتەرينبۋرگ قالاسىندا بوكستان ەرلەر اراسىندا الەم چەمپيوناتىنىڭ جالاۋى كوتەرىلدى. جيىرماسىنشى رەت ءوتىپ جاتقان جاھاندىق دودادا 91 مەملەكەتتەن 488 ساڭلاق باق سىنايدى.
جاھاندىق جارىس 52 كيلو سالماقتا باق سىنايتىن ساكەن بيبوسىنوۆقا زور مۇمكىندىك. سەبەبى ول ءىرى تۋرنيرگە العاش رەت قاتىسقالى تۇر. 22 جاستاعى بوكسشى الەم بىرىنشىلىگىندە جۇلدە الىپ جاتسا, توكيو وليمپياداسىنىڭ ليتسەنزيالىق جارىسىنا قاتىسۋى ابدەن مۇمكىن. ال ەگەر دە سەنىمدى اقتاماسا, كەزەگىن كۇتىپ تۇرعان بىرنەشە ارىپتەسى بار. سولاردىڭ ءبىرى – كادەتتەر, جاستار اراسىنداعى ەكى دۇركىن ازيا چەمپيونى, الەم بىرىنشىلىگىنىڭ قولا جۇلدەگەرى ماحمۇت سابىرحان. پرەزيدەنت كۋبوگىنىڭ فينالىندا ەكەۋى قولعاپ ءتۇيىستىرىپ, ساكەن 19 جاستاعى ماحمۇتتان 3:2 ەسەبىمەن باسىم تۇسكەن ەدى. سونداي-اق تىزىمگە سوڭعى سارى قۇرلىق دوداسىندا ەل نامىسىن قورعاعان ءانۋار مۇزاپپاردى قوسىڭىز. ساكەن تۋرالى بوكستان قازاقستان قۇراماسىنىڭ باس باپكەرى عالىم كەنجەباەۆ بىلاي دەيدى: «ساكەن تالانتتى بوكسشىلاردىڭ ءبىرى. ول قىزىلوردادا وتكەن سپارتاكيادادا توپ جاردى. پرەزيدەنت كۋبوگىندا قارسىلاس شاق كەلتىرمەدى. ءوز سالماعىندا ءنومىرى ءبىرىنشى بوكسشىسىنىڭ الەم چەمپيوناتىنا قاتىسۋى زاڭدى».
56 كيلو. قۇراما ساپىنداعى جالعىز الەم چەمپيونى – قايرات ەراليەۆ. سوڭعى كەزدە ساقا بوكسشى جونىندە كوپتەگەن سىن ايتىلسا دا, باپكەرلەر ءىرى تۋرنيرگە قايراتتى الىپ بارۋدان شارشاعان جوق. سەبەبى الەمنىڭ التىن مەدالىن ەكىنىڭ ءبىرى الا بەرمەيدى. جاقىندا جاتتىعۋىن بارىپ كورگەنىمىزدە, ونىڭ دايىندىعى ويداعىداي ءوتىپ جاتقانىن بايقادىق. ەگەر دە جەرەبە جولداس بولىپ, تورەشىلەر ءادىل تورەلىك جاساسا, قايرات سەرىك ساپيەۆ اعاسى سياقتى ەكى دۇركىن الەم چەمپيونى بولارى ءسوزسىز.
63 كيلو. 2015 جىلى دوحادا وتكەن الەم بىرىنشىلىگىندە سايىسقا تۇسكەن زاكىر ءسافيۋلليندى كوپشىلىك جاقسى تانيدى. باپكەرلەر بۇل جولى ازيانىڭ ەكى دۇركىن كۇمىس جۇلدەگەرىنە سەنىم ارتىپ وتىر. بيىلعى پرەزيدەنت كۋبوگىندا كۇمىسپەن كۇپتەلگەن 33 جاستاعى بوكسشى ەندى الەمدىك سىندا ولجا سالادى دەپ سەنەيىك.
«قازاقتىڭ سالماعى» اتانىپ كەتكەن 69 كيلودا الەم چەميوناتىنىڭ قولا جۇلدەگەرى ابىلايحان ءجۇسىپوۆ ايقاسادى. ءبىز ونىڭ جەكپە-جەگىن 2017 جىلى تاشكەنتتە وتكەن سارى قۇرلىق جارىسىندا تاماشالاعان ەدىك. فينالدا جەرگىلىكتى بوكسشى شاحرام گياسوۆتان جەڭىلدى. جەكپە-جەكتەن كەيىن جەرلەسىمىزدى اڭگىمەگە تارتقانىمىزدا, قاباعى قاتۋلى ابىلايحان: «اعا, توكيو – مەنىڭ وليمپيادام بولادى» دەگەنى ەسىمىزدە. بيىل اتىراۋداعى حالىقارالىق تۋرنيردە, ەلوردادا وتكەن پرەزيدەنت كۋبوگىندا توپ جارعان 22 جاستاعى ورەن الەم بىرىنشىلىگى الدىندا: «قۇدايعا شۇكىر, دايىندىعىمىز ويداعىداي. جاراقاتتان امانبىز. ءبىر عانا ارمان بار. ول – الەم چەمپيونى بولۋ. ءساتىن سالسا, ۇزدىكتەر قاتارىنان كورىنەمىن», – دەدى.
جاقىندا «Egemen Qazaqstan» گازەتىنىڭ 100 جىلدىعى اياسىندا شاعىن فۋتبولدان باق ليگا تۋرنيرىندە ءابىلحان امانقۇلمەن كەزدەسىپ قالدىق. 75 كيلودا كوشباسشى ءابىلحان بۇگىندە جاراقاتىنان تولىق ايىقپاپتى. ەندى قاتارعا قوسىلعاننىڭ وزىندە مىقتى ەكەنىن تاعى ءبىر دالەلدەۋ كەرەك. سەبەبى بۇل سالماقتا تاياۋدا عانا ازيا چەمپيونى اتانعان تۇرسىنباي قۇلاحمەت بار. قىزىلوردالىق بوكسشى شەبەرلىگىن تەك ازيادا ەمەس, پرەزيدەنت كۋبوگىندا دا دالەلدەدى. وعان يسلام ويىندارىنىڭ جەڭىمپازى اتاعىن قوسىڭىز. تۇرسىنباي رەسەيگە جاي بارا جاتقان جوق, جەڭىمپاز بولسام دەيدى: «بۇگىندە بوكس بارلىق ەلدە دامىپ كەلەدى جانە وڭاي شاعىلار قارسىلاس جوق. بۇرىن ازيا نەمەسە الەم چەمپيوناتىنا قاتىسسام دەپ ارماندايتىنمىن. ازيادا ۇزدىك اتاندىم, ەندى الەمدە دارا شىقسام دەيمىن».
81 كيلودا تالانتتى بوكسشىلار جەتەرلىك. ولاردىڭ ىشىندە كوشباسشى – تۇركىستاندىق بەك نۇرماعامبەت. بىراق, جاراقاتىنا بايلانىستى ول ەكاتەرينبۋرگتە ەل نامىسىن قورعاي المايدى. بەكتىڭ ورنىنا بەكزات نۇرداۋلەتوۆ بارادى. ماڭعىستاۋلىق بوكسشى دا قارا جاياۋ ەمەس. بۇعان دەيىن 91 كيلو سالماقتا باق سىناعان مارات جاكيەۆتىڭ شاكىرتى جاستار اراسىندا الەم بىرىنشىلىگىنىڭ قولا جۇلدەگەرى, قازاقستان چەمپيوناتىنىڭ ءفيناليسى, سپارتاكيادانىڭ قولا جۇلدەگەرى. شىلدە ايىندا پرەزيدەنت كۋبوگىندا 81 كيلودا باق سىناپ, كۇمىس مەدال ەنشىلەدى.
«81 كيلودا باسەكە وتە كۇشتى. ازيا چەمپيونى بەك نۇرماعامبەت, پرەزيدەنت كۋبوگىنىڭ ءفيناليسى بەكزات نۇرداۋلەتوۆ جانە جاستار اراسىندا الەم چەمپيونى نۇربەك ورالباي قۇراما ساپىندا جاتتىعىپ ءجۇر. بۇل جولعى تاڭداۋ بەكزاتقا ءتۇسىپ وتىر», دەدى قۇرامانىڭ باس باپكەرى عالىم كەنجەباەۆ.
91 كيلودا ايقاسىپ جۇرگەن ۆاسيلي لەۆيتتىڭ قورجىنىندا بارلىق ءىرى حالىقارالىق ءتۋرنيردىڭ مەدالى بار. ول ازيانىڭ ءۇش دۇركىن جەڭىمپازى, الەم چەمپيوناتىنىڭ قولا جۇلدەگەرى جانە ريو وليمپياداسىنىڭ ءفيناليسى. ۆاسيانىڭ باستى ارمانى – توكيودا توپ جارۋ. مارات ماناشەۆتىڭ شاكىرتى الەم بىرىنشىلىگىندە ۇزدىك شىقسا, وليمپيادا جولداماسى ءۇشىن تالاسا الاتىنىن بىلەدى. سەبەبى ونىڭ وكشەسىن باسقان ارىپتەس ءىنىسى, جاستار اراسىندا وليمپيادا چەمپيونى جانە الەم بىرىنشىلىگىنىڭ كۇمىس جۇلدەگەرى ايبەك ورالباي بار. جاقىندا پرەزيدەنت كۋبوگىنىنىڭ فينالىندا ەكەۋىنىڭ جولى ءتۇيىستى. تارتىستى وتكەن جەكپە-جەكتە لەۆيت ءسال عانا باسىمدىقپەن جەڭىسكە جەتتى.
«ماقسات بىرەۋ, ول – ءار جەكپە-جەكتە جەڭىسكە جەتۋ. سوندىقتان ءاربىر جەكپە-جەككە تىڭعىلىقتى دايىندالىپ, جاقسى ناتيجە كورسەتكىم كەلەدى», دەدى ۆ.لەۆيت.
اسا اۋىر سالماقتا (+91 كيلو) ايقاساتىن قامشىبەك قوڭقاباەۆقا بۇگىندە ەلىمىزدە تەڭ كەلەر ەشكىم جوق شىعار. ويتكەنى وليمپيادانىڭ ەكى دۇركىن قولا جۇلدەگەرى يۆان دىچكو كاسىپقوي بوكسقا اۋىسقالى, قۇرامانىڭ №1 بوكسشى بولۋ قامشىبەكتەن وزگەگە بۇيىرماي كەلەدى. ەگەر دە باپكەرلەر قامشىبەكتى جاقسىلاپ قامشىلايتىن بولسا, ەكى جىل بۇرىنعى كۇمىس مەدالىن التىنعا ايىرباستاۋى بەك مۇمكىن.
سونىمەن ەكاتەرينبۋرگتە ەل نامىسىن قورعايتىن بوكسشىلاردىڭ شاما-شارقىن سارالاپ كوردىك. 2017 جىلعى الەم بىرىنشىلىگىنىڭ ناتيجەسىنە كوز جۇگىرتسەك, وندا جىگىتتەر 1 التىن, 2 كۇمىس جانە 3 قولا مەدال جەڭىپ الدى. ال سول جۇلدەگەرلەردىڭ اراسىنان بۇگىندە ءتورت بوكسشى – قايرات ەراليەۆ (التىن), قامشىبەك قوڭقاباەۆ (كۇمىس), ابىلايحان ءجۇسىپوۆ (قولا) جانە ۆاسيلي لەۆيت (قولا) رەسەيگە اتتاندى. ولاردىڭ قاتارىنا ءوز سالماقتارىندا ۇزدىك شىققان ءتورت وعلانىمىزدى قوسار بولساق, وندا جىگىتتەردىڭ كەم دەگەندە 5 مەدال جەڭىپ الۋعا مۇمكىندىكتەرى بار. سوندا عانا قازاقستان قۇراماسى جالپىكوماندالىق ەسەپتە ۇزدىك ۇشتىكتەن كورىنە الادى. ال ونىڭ ىشىندە قانشا مەدال التىن بولارى تەك ءبىر جاراتقانعا ايان. بوكسشىلاردىڭ جولى بولىپ, رەسەي تورىندە الاشتىڭ ءانۇرانى ءبىر ەمەس, بىرنەشە مارتە ورىندالسىن دەپ تىلەيىك.
الماس ماناپ