مەملەكەت باسشىسى قاسىم-جومارت توقاەۆ مۇعالىمدەردىڭ ءداستۇرلى تامىز كەڭەسىندە سويلەگەن سوزىندە ءۇش اۋىسىمدى جانە شاعىن جيناقتى مەكتەپتەر ماسەلەسى ءوز شەشىمىن تابۋى كەرەك ەكەنىن اتاپ كورسەتتى. مۇنداي جاعدايدا ءبىلىم ساپاسىن كوتەرۋ مەن جەتى ءتۇرلى ءىلىم بىلەتىن ۇرپاق تاربيەلەۋ ەش مۇمكىن ەمەس. ءبىلىم بەرۋ ىسىنە قاتىستى پرەزيدەنت پايىمداۋىنان تۋعان ءتۇيىننىڭ ءبىرى – قوردالانعان ماسەلەلەردى دەر كەزىندە انىقتاپ, ونى شەشۋدىڭ وڭتايلى جولدارىن ۇسىنۋ بولماق.
وسى ورايدا ءۇش اۋىسىمدى مەكتەپتەردى جويۋ ماسەلەسى بۇگىندە اقتوبە وبلىسىندا وتكىر كۇيىندە تۇرعانىن اتاپ ءوتۋ كەرەك. تاياۋدا بۇل ماسەلە وبلىستىق ءماسليحاتتىڭ الەۋمەتتىك-مادەني دامۋ جونىندەگى تۇراقتى كوميسسياسىنىڭ كەڭەيتىلگەن ماجىلىسىندە تالقىلاندى. وسى وتىرىستا وبلىستىق ءبىلىم باسقارماسى باسشىسىنىڭ مىندەتىن اتقارۋشى گۇلناز سۇلەيمەنوۆا وبلىستا ءۇش اۋىسىمدا وقىتاتىن 13 مەكتەپ بار ەكەنىن مالىمدەدى. ءبىر ءوڭىر ءۇشىن مۇنى از دەۋگە بولمايدى.
سالا جەتەكشىسىنىڭ ايتۋىنشا, بيىل ءۇش اۋىسىممەن جۇمىس ىستەيتىن جەتى مەكتەپتىڭ ماسەلەسى ءوز شەشىمىن تاپپاق. ياعني, العا قويىلعان جۇمىس جوسپارى بويىنشا اتالعان مەكتەپتەردەگى وقۋ ۇدەرىسى ەكى اۋىسىمعا كوشىرىلمەك. قالعان التاۋىنا كەلسەك, تۇراقتى كوميسسيانىڭ وتىرىسىندا بۇل ساۋالداردىڭ جاۋابى ايتىلماي قالدى.
اقتوبە تابيعي ءوسىم تۇرعىسىنان, سونداي-اق سىرتقى جانە ىشكى كوشى-قون ەسەبىنەن جىل سايىن تۇرعىندار سانى ءوسىپ كەلە جاتقان ءوڭىر. سونىڭ ىشىندە وتكەن جىلدار مەن كەيىنگى كەزەڭدە دە وبلىسپەن شەكارالاس قونىستانعان وزبەكستاننىڭ قاراقالپاقستان رەسپۋبليكاسىنان اقتوبەگە قونىس اۋدارۋشىلار لەگى ءۇزىلىپ كورگەن ەمەس. مۇنداي جايت ءوز كەزەگىندە وبلىس ورتالىعىنداعى جالپى ءبىلىم بەرەتىن مەكتەپتەردىڭ جۇكتەمەسىن كوتەرىپ, كۇردەلەندىرىپ جىبەرەتىنى تاجىريبەدە ءجيى بايقالىپ ءجۇر.
وسىنداي قاۋىپ الداعى وقۋ جىلىندا دا بايقالاتىن سىڭايلى. اتاپ ايتقاندا, قازىرگى كەزدە اقتوبە قالاسىنداعى №63, №64 جانە №68 مەكتەپتەردىڭ ءۇش اۋىسىمدىق رەجىمگە كوشۋ ءتارتىبى انىق بايقالىپ وتىر. ياعني, بۇگىنگى ىقتيمالدىق پەن بولجام ەرتەڭگى ناقتى كورىنىسكە اينالىپ كەتۋى ابدەن مۇمكىن.
دەگەنمەن, ءبىر جىلعا قويان تەرىسى دە شىدايدى دەگەندەي, ءبىر جىلعا وقۋشىلار مەن مەكتەپ ۇجىمدارى شىداپ, ءتوزىپ كورەر. وسى ارالىقتا جەرگىلىكتى اتقارۋشى ورگاندار مەن ءبىلىم جانە عىلىم مينيسترلىگى تاراپىنان قوسىمشا جاڭا مەكتەپتەر قۇرىلىستارى شۇعىل جوبالانعانى ءجون دەپ سانايمىز. تاعى ءبىر جول – جۇكتەمەسى ورتاشا مەكتەپتەرگە ءۇش اۋىسىمدىق مەكتەپتە وقيتىن وقۋشىلاردى اۋىستىرۋ بولماق. سونداي-اق اتالعان ساناتتاعى مەكتەپتەردىڭ جانىنان قوسىمشا قۇرىلىس سالۋدى قولعا الۋ ءىسى دە ءتۇيىندى تارقاتۋدىڭ ءبىر جولى بولماق.
بۇگىنگى تاڭدا وبلىس اۋماعىندا رەسپۋبليكالىق جانە جەرگىلىكتى بيۋدجەت ەسەبىنەن 6470 ورىنعا ارنالعان 21 مەكتەپتىڭ قۇرىلىسى جۇرگىزىلۋدە. ونىڭ 15-ءى بيىلعى جىلدىڭ اياعىنا دەيىن پايدالانۋعا بەرىلمەك. مۇنداي جاعىمدى جاعداي ءۇش اۋىسىمداعى مەكتەپتىڭ ازايا تۇسۋىنە ىقپالىن تيگىزەرى انىق. وسى ورايدا وبلىستا ءۇش اۋىسىمدى مەكتەپتەرگە قوسا اپاتتى جاعدايداعى ءۇش مەكتەپ بار ەكەنىن دە ايتا كەتكەن ءجون.
مۇنىڭ شەشىمى قانداي بولار ەكەن دەگەن ماسەلەگە كەلسەك, اتالعان ءۇش مەكتەپتىڭ بىرەۋىن بيىلعى جىلدىڭ سوڭىنا دەيىن جويۋ بەلگىلەنگەن. قالعان ەكەۋى جاڭادان تۇرعىزىلاتىن مەكتەپ عيماراتتارى جانە كۇردەلى جوندەۋ جۇرگىزىلىپ جاتقان مەكتەپتەر ەسەبىنەن جويىلماق. قازىرگى كەزدە وبلىستاعى 33 ءبىلىم بەرۋ نىسانىنا جاي جانە كۇردەلى جوندەۋلەر جۇرگىزىلىپ جاتقانىن ەسكەرسەك, ونىڭ شەشىمى تابىلاتىنى تالاسسىز. بۇل ءۇشىن وبلىس بيۋدجەتىنەن 845 ملن تەڭگە بولىنگەن.
پرەزيدەنتتىڭ تامىز كەڭەسىندە وكىلەتتى ورگاندارعا قويعان تاپسىرماسىنىڭ ءبىرى – شاعىن جيناقتى مەكتەپتەردىڭ جاعدايىن جاقسارتۋ. الداعى ۋاقىتتا بۇل ىستە ءوز شەشىمىن تابۋعا ءتيىستى ماسەلەلەر از ەمەس. شاعىن جيناقتى مەكتەپتەر كوپ جاعدايدا تۇرعىندار سانى از شالعاي اۋىلداردا بولاتىنى بەلگىلى ءارى باسىم كوپشىلىگى كەزىندە قارادۇرسىن, شارۋاشىلىق ءادىس بويىنشا كادىمگى سامان كىرپىش پەن اعاشتان تۇرعىزىلعانى ەشكىمگە دە قۇپيا ەمەس. وبلىستا ءدال وسىنداي 45 مەكتەپ بار ەكەن. ءارى ونىڭ كەيبىرەۋى ءالى كۇنگە دەيىن پەشپەن جىلىتىلاتىن كورىنەدى. مۇنداي جاعدايدا ونى قىس كەزدەرىندە كومىرمەن جانە قيمەن قامتۋ قاجەتتىگى تۋىندايدى. ونى جەتكىزۋ قازىرگى كۇننەن باستاپ ويلاستىرىلماسا شاعىن مەكتەپتىڭ شاعىن بولمەسىندە وقۋشىلار قىس كەزدەرىندە دىردەك قاعىپ وتىرماسىنا كىم كەپىل؟! سونىمەن بىرگە كوپ جاعدايدا شاعىن جيناقتى مەكتەپتەردىڭ ابدەن ەسكىرىپ, توزىعى جەتىپ تۇرعانى دا ۇدايى نازاردا بولۋى ءتيىس. وكىنىشكە قاراي وبلىستا بۇعان بايلانىستى ماسەلە قوزعاپ جۇرگەن ەشكىمدى ەستىمەپپىز. وسى ورايدا مەملەكەت باسشىسىنىڭ شاعىن جيناقتى مەكتەپتەرگە قاتىستى پايىمدى پىكىرى وڭىردەگى ءبىلىم بەرۋ سالاسىنىڭ جەتەكشىلەرىنە وي سالسا, قانەكي.
اقتوبە