كەشە قاراعاندى وبلىسىنا قاراستى جايرەم ەلدى مەكەنىندەگى كەن-بايىتۋ كومبيناتىنىڭ جۇمىسشىلارى نارازىلىق ءبىلدىرىپ, وسى كاسىپورىندا جۇمىس ىستەيتىن شەتەلدىك ازاماتتارمەن قاقتىعىسىپ قالدى.
ءىستىڭ ارتى ناسىرعا شابا جازداپ, ابىروي بولعاندا اشۋدى اقىل مەن سابىر جەڭدى. دەگەنمەن, ارادا بولعان كيكىلجىڭنىڭ سالدارىنان بىرنەشە شەتەل جۇمىسشىسى جاراقات الىپ, ولارعا دەر كەزىندە مەديتسينالىق كومەك كورسەتىلدى.
قالىپتاسقان جاعدايدى رەتتەۋ ءۇشىن اتالعان ەلدى مەكەنگە وبلىس اكىمى ەرلان قوشانوۆ جەدەل جەتىپ, جايرەم كەنتى تۇرعىندارىمەن جانە جەرگىلىكتى كەن-بايىتۋ كومبيناتىنىڭ جۇمىسشىلارىمەن كەزدەسۋ وتكىزدى. ءوڭىر باسشىسىمەن بولعان اڭگىمەدەن سوڭ, اشۋ مەن وكپە-رەنىش باسىلىپ, جاعداي ءوزىنىڭ قالىپتى ارناسىنا ءتۇستى.
قازىرگى تاڭدا جايرەمدەگى جاعداي وبلىس باسشىلىعىنىڭ تىكەلەي باقىلاۋىنا الىنعان.
قاراعاندى وبلىسى