امانگەلدى تولەەۆ - كۇتپەگەن جەردەن رسفسر پرەزيدەنتتىگىنە ۇمىتكەر اتانعان قازاق.
«ەشكىمنىڭ قولداۋىنسىز, ءبىلىمى مەن شەبەرلىگى, اقجارقىن ادالدىعى,ادامدارمەن ءتىل تابىسا بىلەتىن قاسيەتى ارقاسىندا وتكەن جىلدىڭ ساۋىرىندە وبلىستىق كەڭەستىڭ توراعاسى بولىپ سايلانعان. قايلاسىن قويا سالىپ, ساياساتقا ەلەڭدەگەن شاحتەرلەرى ەكونوميكالىق ەرەۋىلدى قارۋ ەتكەن, بۋىرقانعان كۋزباستى باسقارۋ وڭاي دەپ كىم ايتار. ءالجۋاز, قابىلەتسىز بىرەۋ بولسا الدەقاشان ورنىن تاستاپ جۇرە بەرەر. كەتكىسى كەلمەسە دە, نارازىلار دەگەنىنە جەتەر. ال امانگەلدى ونداي بولماي شىقتى. كوكتەمدەگى ەرەۋىلدىڭ سانى جاعىنان ءۇشىنشى بولۋى مۇمكىن ەدى. وعان دەيىن شاحتەرلەر تولقىپ بارىپ, ەكى رەت رايىنان قايتتى. كۋزباسس تىنىسىمەن جاستايىنان تانىس باسشى ەڭبەك ادامدارىن قاۋىپتى قادامنان ساقتاندىرا ءبىلدى. سوڭعى ەرەۋىلدىڭ ءجونى باسقا. وعان يتەرمەلەۋشىلەر دە, تامىزدىقتى ۇرلەۋشىلەر دە كوپ بولعان….
سوعان قاراماستان كۋزباستىقتاردىڭ ەلدەگى احۋالعا نارازىلىعى ادەتتەگىدەي وبلىس باسشىسىنا دەگەن سەنىمسىزدىككە ۇلاسقان جوق. قايتا ولكەنى, بىلاي قويعاندا, بۇكىل رەسەيدى ەكونوميكالىق جانە ساياسي تۇيىقتان شىعارۋدىڭ باعدارلاماسىن باتىل ۇسىنعان امانگەلدى مولداعازى ۇلىن قولداۋشىلار قاتارى كوبەيە ءتۇستى».
«سوتسياليستىك قازاقستان» گازەتىنىڭ 1991 جىلعى 1 ماۋسىمداعى سانىنا شىققان ماقالا. اۆتورى تىلەكقابىل بورانعالي ۇلى.