قازاقستاننىڭ بەس دۇركىن چەمپيونى «استانا» چەمپيوندار ليگاسىنىڭ العاشقى ىرىكتەۋ كەزەڭىندە ەلورداداعى «استانا ارەنا» ستاديونىندا رۋمىنيانىڭ بەس دۇركىن چەمپيونى چفر (كلۋج) كلۋبىن قابىلدادى. 2013/2014 جىلعى ماۋسىمنان بەرى ەۋروكۋبوك باسەكەلەرىنە تۇراقتى تۇردە قاتىسىپ كەلە جاتقان «استانا» العاشقى جىلى عانا ءبىرىنشى قارسىلاسىنان جەڭىلىپ قالعان. ال سوڭعى بەس ماۋسىم بويى العاشقى قارسىلاسىن ەش قيىندىقسىز جەڭىپ كەلەدى. بيىل دا داستۇردەن جاڭىلماي 20 مىڭعا جۋىق جانكۇيەر جينالعان ستاديوندا رۋمىنيادان كەلگەن قارسىلاستارىنان 1:0 ەسەبىمەن باسىم ءتۇستى.
جاسىراتىنى جوق, ءبىرىنشى تايمنىڭ العاشقى 10 مينۋتىندا قارسىلاستار ويىن تىزگىنىن ءوز قولدارىنا الۋعا تىرىستى. ءتىپتى, العاشقى قاۋىپتى شابۋىلدى دا رۋمىندار جاسادى. دەگەنمەن, ستاديونعا جينالعان قالىڭ جانكۇيەردىڭ قولداۋىن سەزىنگەن «استانا» فۋتبولشىلارى نامىسقا تىرىسىپ, ويىن اۋانىن وزدەرىنە اۋدارا ءبىلدى. «استانا» ساپىنان دورين روتاريۋ مەن مارين توماسوۆ چفر قاقپاشىسىن ءبىراز ابىگەرگە سالعانىمەن, گول سوعا المادى.
ەكىنشى تايمدا دا قوناقتار ويىندى قارقىندى باستادى. ەريچ قاقپاسىنىڭ ماڭىندا بىرقاتار قاۋىپتى شابۋىل ۇيىمداستىرىپ, ەسەپتى اشىعۋ ۇمىتىلدى. دەسە دە ويىنداعى جالعىز گولدى ماتچتى 68-مينۋتىندا «استانا» قورعاۋشىسى ەۆگەني پوستنيكوۆ سوقتى. كوزىقاراقتى جانكۇيەرلەردىڭ ەسىندە بولسا, پوستنيكوۆ وتكەن ماۋسىمداردا دا فينليانديانىڭ حيك, چەحيانىڭ «يابلونەتس» كلۋبتارىنىڭ قاقپاسىنا ماڭىزدى گول سوققان بولاتىن.
ايتا كەتەيىك, «استانا» – چفر كلۋج اراسىنداعى قارىمتا ماتچ ءبىر اپتادان سوڭ, 17 شىلدەدە رۋمىنيادا وتەدى. ەگەر ەلوردا كومانداسى سىرت الاڭداعى ويىندا دا جەڭىسكە جەتەتىن بولسا, چەمپيوندار ليگاسىنىڭ ەكىنشى كەزەڭىندە ءيزرايلدىڭ «ماككابي تەل-اۆيۆ» كومانداسىمەن كەزدەسەدى. ەستەرىڭىزدە بولسا, «استانا» كومانداسى «ماككابيمەن» 2017/2018 جىلعى ەۋروپا ليگاسىنىڭ توپتىق كەزەڭىندە سىنعا ءتۇسىپ, ەكى ويىندا دا «استانا» (4:0, 1:0) جەڭىسكە جەتكەن بولاتىن.