ونەگەلى ءومىر جولىندا ەلىنە زور ەڭبەگىن ءسىڭىرىپ, حالقىنىڭ تۇلعالى ازاماتىنا اينالعان, كسرو مەملەكەتتىك قاۋىپسىزدىك كوميتەتىندە, قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ توراعاسى لاۋازىمىندا, قازاقستان رەسپۋبليكاسى قورعانىس مينيسترلىگىندە جاۋاپتى باسشىلىق قىزمەتتەر ىستەپ, كەيىن قازاقستان رەسپۋبليكاسى ۇلتتىق قاۋىپسىزدىك اكادەمياسىن باسقارعان, ورتالىق ازياداعى حالىقارالىق ەسىرتكىگە قارسى كۇرەس ورتالىعى ديرەكتورىنىڭ ورىنباسارى قىزمەتىن اتقارىپ جۇرگەن كاسىبي مامان, پاراساتتى باسشى ءادىل شاياحمەت ۇلى تۋرالى اتالمىش مەكتەپتە « ۇلى دالا قىرانى» اتتى كىتاپتىڭ تۇساۋى كەسىلىپ, گەنەرال-لەيتەنانت ءادىل شاياحمەتوۆ اتىنداعى العاشقى اسكەري دايىندىق كابينەتى اشىلدى.
بۇل ءىس-شاراعا ەلىمىزگە تانىمال مەملەكەت جانە قوعام قايراتكەرى, گەنەرال-پولكوۆنيك ءسات توقپاقباەۆ, مەملەكەت جانە قوعام قايراتكەرى ءشامشا بەركىمباەۆا, قازاقستان رەسپۋبليكاسى گەنەرالدار كەڭەسىنىڭ توراعاسى, ادىلەت گەنەرال-مايورى رۇستەم قايداروۆ, ۇقك الماتى قالاسى بويىنشا ارداگەرلەر كەڭەسىنىڭ توراعاسى, پولكوۆنيك ابدىمالىك رايىمقۇلوۆ, كوپتەگەن ارىپتەس گەنەرالدار, وفيتسەرلەر قاتىسىپ, قوناق بولدى. سونىمەن قاتار كەزىندە ءادىل شاياحمەت ۇلىنا ساباق بەرگەن ۇلاعاتتى ۇستازدارى, ونىڭ ىشىندە ورىنشا قارابالينا-قازىباەۆا, گۇلجاۋھار جەكسەمبينا, ناعيما بەكماعامبەتوۆا جانە باسقا دا مۇعالىمدەر, ازاماتتىڭ وتباسى, تۋىستارى, بىرگە وسكەن جەرلەستەرى, سىنىپتاس, ينتەرناتتا بىرگە وقىعان دوستارى جانە ارىپتەستەرى جينالدى.
«ءادىل شاياحمەتوۆ ۇلتتىق قاۋىپسىزدىك كوميتەتىندە ۇزاق جىلدار بويى ءمىنسىز قىزمەت ەتىپ كەلەدى. بۇل – ەلىمىزدىڭ قاۋىپسىزدىگىن, شەكاراسىنىڭ بەرىك بولۋىن قامتاماسىز ەتەتىن مەملەكەتتىك ورگان. ءادىل شاياحمەت ۇلىنىڭ جوعارى دەڭگەيدەگى مەملەكەت قايراتكەرى دارەجەسىنە جەتۋى ونىڭ ءبىلىمىنىڭ تەرەڭدىگى مەن دايىندىعىنىڭ جوعارى دەڭگەيدە بولعاندىعىنىڭ ارقاسى دەپ ويلايمىن.
وسى شارانى ۇيىمداستىرعان مەكتەپ-ينتەرنات ديرەكتورى روزا ەربوزىمقىزىنا, يگى ىستەرگە اتسالىسقان وقىتۋشىلار مەن وقۋشىلارعا ريزاشىلىعىمدى بىلدىرگىم كەلەدى», – دەدى مەملەكەت جانە قوعام قايراتكەرى, گەنەرال-پولكوۆنيك ءسات توقپاقباەۆ.
«ءوزىم ۇستاز بولعاندىقتان, وسى ءىس-شارانىڭ, اسىرەسە بالالارعا ءۇلكەن اسەر بەرگەنىن بايقادىم. ءادىل شاياحمەتوۆ ءوزى وقىعان وسى مەكتەپكە ىلعي كەلىپ, بارلىق وزەكتى پروبلەمانى ءبىلىپ, ونى شىن پەيىلىمەن شەشۋگە اتسالىسادى. سونىمەن قاتار ءادىل شاياحمەتوۆ ساۋرىق باتىر اۋىلىنداعى باستاۋىش كلاستا وقىعان, مەكتەبىنە كۇردەلى جوندەۋ جاساۋعا, سپورت كەشەنىن سالعىزۋعا ىقپال ەتتى. وسىنداي ازاماتتاردىڭ قاتارى كوبەيىپ, جاستارعا قامقورلىق كورسەتسە, كاسىپكەرلەر بايلىقتارىنان مادەنيەت سالاسىنا, وقۋ ورىندارىنا قارايلاسسا, ۇلتىمىزعا ۇلكەن قىزمەت جاساعان بولار ەدى», دەدى مەملەكەت جانە قوعام قايراتكەرى ءشامشا بەركىمباەۆا تەبىرەنىسپەن ءوز پىكىرىن ءبىلدىردى.
ءوز كەزەگىندە گەنەرال-لەيتەنانت ءا.شاياحمەتوۆ: «تالانتتى ۇستازدىڭ شاكىرتى تالاپتى بولادى» دەپ حالقىمىز بەكەر ايتپاعان عوي. كەزىندە ءبىزدى ءبىلىم نارىمەن سۋسىنداتقان ورىنشا قارابالينا-قازىباەۆا اپايىمىز باستاعان ۇلاعاتتى ۇستازدارىمىزدىڭ ءبىرازى بۇگىندە زەينەت دەمالىسىندا, ولارعا شەكسىز العىسىمدى بىلدىرەمىن. ءبىلىم ورداسىندا ۇستازداردىڭ ۇيعارۋىمەن مەنىڭ اتىما ارناپ اسكەري دايىندىق سىنىبىن اشىپ, ماعان ارناپ « ۇلى دالا قىرانى» كىتابىن شىعارعاندارى مەن ءۇشىن وتە ۇلكەن قۇرمەت», دەپ اتاپ ءوتتى.
مەكتەپ-ينتەرناتقا وقۋشىلار قازاقستاننىڭ تۇكپىر-تۇكپىرىنەن جينالعان. ولار ءبىلىم ورداسىنا ءار وبلىستاردان ۇلكەن سىننان ءوتىپ قابىلدانادى. ولارعا قوياتىن تالاپ تا وتە جوعارى. سوندىقتان جوعارى دەڭگەيدەگى تالاپتىڭ, جاستاردىڭ ءوزدەرىنىڭ تالپىنىستارىنىڭ ارقاسىندا مەكتەپ ۇجىمى ۇلكەن ءناتيجەلەرگە قول جەتكىزىپ وتىر.
ءسوز سوڭىندا, التىن ۇيا مەكتەبىمىزدىڭ, حان سارايىنا بەرگىسىز اق وردامىزدىڭ «ەل ءۇشىن ەمىرەنىپ, جۇرت ءۇشىن جۇگىنىپ قىزمەت ەتەر» (ب.مومىش ۇلى) ءادىل شاياحمەتوۆتەي شاكىرتتەرى جىل ساناپ ارتا بەرسىن دەگىمىز كەلەدى. قازاقستاننىڭ كوك بايراعىن بيىك ۇستار ازاماتتارىمىز وسى مەكتەپتەن تاربيەلەنىپ, الدا تالاي بەلەستەرگە جەتىپ, اسقار شىڭداردى باعىندىرسىن دەگەن جۇرەكجاردى لەبىزىمىزدى بىلدىرەمىز.
روزا سەكسەنوۆا,
اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن ورتا مەكتەپ-ينتەرناتىنىڭ ديرەكتورى