24 جىل بۇرىن جۇبايىنان ايىرىلعان جۇپار يسانوۆا وتباسىنىڭ ۇيىتقىسىن ساقتاپ, جولداسى يسانوۆ اسيسانىڭ ۇرپاعىن تاربيەلەپ, قازىرگى تاڭدا 3 بالادان تاراعان 7 نەمەرەسىنىڭ سۇيىكتى اجەسى اتانىپ وتىر.
- يسانوۆ اسيسا قوشمۇحان ۇلى 1960 جىلى 3 ناۋرىزدا تۇركمەنستان رەسپۋبليكاسى اشحاباد قالاسىندا تۋعان. ميليتسيا كاپيتانى. 1979 جىلى وزبەكستان رەسپۋبليكاسى شوماناي سوۆحوز تەحنيكۋمىن بىتىرگەن. ەڭبەك جولىن 1979 جىلى «ماڭعىشلاقۆودستروي» مەكەمەسىندە بۇرعىشىنىڭ كومەكشىسى بولىپ باستاعان. 1981-1983 جىلدار ارالىعىندا № 61591 اسكەري بولىمشەسىندە وپەراتور بمپ رەتىندە اسكەري مىندەتىن اتقارعان. ىشكى ىستەر ورگانداعى قىزمەتىن 1980 جىلى قاڭتار ايىندا ماڭعىشلاق وبلىستىق اتقارۋ كوميتەتىنە قاراستى ءىىب № 48 اسكەري ءورت ءسوندىرۋ بولىمىندە ءورت ءسوندىرۋشى لاۋازىمىنان باستاعان, كەيىنگى جىلدارى ءار ءتۇرلى قىزمەتتەردە جۇمىستار اتقارعان. «ءمىنسىز قىزمەتى ءۇشىن» مەدالىمەن كسرو ءىىم № 225 بۇيرىعىمەن ماراپاتتالعان. 1995 جىلدىڭ 8 ماۋسىمىندا قىزمەت بارىسىندا وندىرىسىندەگى قىلمىستىق ءىستى تەرگەۋ بارىسىندا قارسىلىق كورسەتكەن قىلمىسكەردىڭ قولىنان قازا تاپقان.
- بەيبىت كەزەڭدە ءوز ءومىرىن وتانىن قورعاۋدىڭ كۇردەلى ماماندىعىنا ارناعان جانە بۇگىنگى كۇنى ەلىمىزدىڭ اسكەري كۇشى مەن قورعانىس قابىلەتىن ارتتىرۋ جولىندا قىزمەت اتقاراتىن بارلىق ازاماتتارىمىزدى الدا كەلە جاتقان 23 ماۋسىم قازاقستان پوليتسياسى كۇنى مەرەكەسىمەن شىن جۇرەكتەن قۇتتىقتاپ, العىس ءبىلدىردى, -دەپ اياقتادى ءسوزىن جۇپار يسانوۆا.
سونىمەن قاتار, پوليتسەيلەر 2001 جىلدىڭ 25 ناۋرىزىندا قىزمەت بابىندا قازا بولعان باتىرحانوۆ قالدىباي بايرامقۇل ۇلىنىڭ اناسى باتىرحانوۆا ورازحانمەن كەزدەسىپ, وتباسىنىڭ جاعدايىمەن دە تانىستى.
باتىرحانوۆ قالدىباي بايرامقۇل ۇلى 1978 جىلى تۇركمەنستان رەسپۋبليكاسى گەوك-تەپە كەنتىندە تۋعان, پوليتسيا كىشى سەرجانتى 1996 جىلى اقتاۋ قالاسىنداعى № 4 مكتۋ بىتىرگەن. ەڭبەك جولىن اقتاۋ قالاسىنداعى مەحانيكا-جوندەۋ زاۋىتىندا باستاعان. 1997-1999 جىلدار ارالىعىندا زايسان قالاسى № 2017 اسكەري بولىمشەسىندە كاۆالەريست رەتىندە اسكەري مىندەتىن اتقارعان. ىشكى ىستەر ورگانداعى قىزمەتىن 2000 جىلى مامىر ايىندا كۇزەت بولىمشەسىنىڭ كىشى ينسپەكتورى لاۋازىمىنان باستاپ, ەڭبەك جولىندا ۇزدىك قىزمەتكەر بىرنەشە ماراپات يەسى اتانعان.
- بۇل قىزمەتكەرلەر – قىزمەت بابىندا قايتىس بولعان, سونىمەن قاتار قاسكويلەردىڭ قولىنان مەرت بولعان جاندار. ولار – ەلدىڭ تىنىشتىعىن كۇزەتىپ, قىلمىستى اشۋ مەن ونىڭ الدىن الۋ بارىسىندا پوليتسيا قىزمەتكەرلەرى ءوزىنىڭ بار كۇش-جىگەرلەرىن جۇمساپ, ەڭبەك ەتكەن. كەلەشەك ۇرپاققا قىزمەتكەرلەرىمىزدىڭ قايسارلىقتارى ۇلگى بولارى انىق, دەدى ماڭعىستاۋ وبلىسى پوليتسيا دەپارتامەنتىنىڭ كادر جۇمىسى ساياساتى باسقارماسى باسشىسىنىڭ مىندەتىن اتقارۋشى, پوليتسيا پودپولكوۆنيگى ا.كوشەۆ.
جوعارىدا اتالعان وتباسىلاردىڭ جاس بۋىندارى 13 جاسار ناسيحات پەن 5 جاسار مانسۇر ءبىرى اتاسى, ەندى ءبىرى اعاسى سەكىلدى بولاشاقتا ءتارتىپ ساقشىسى بولعىلارى كەلەتىنىن ايتىپ, وسى سالادا قىزمەت ەتىپ جۇرگەن پوليتسەيلەردىڭ قىزمەتىنە قىزىعاتىندىقتارىن اڭگىمەلەدى.
بەيبىت ادامداردىڭ ءومىرى ءۇشىن جاندارىن پيدا ەتكەن پوليتسەيلەردىڭ ەرلىگى ۇمىتىلماۋى ءتيىس.