ەقىۇ قىسقا مەرزىمدى بايقاۋشىلارىنىڭ باسشىسى جانە ارنايى ۇيلەستىرۋشىسى:
– سايلاۋداعى زاڭ بۇزۋشىلىقتاردىڭ كولەمى مەن دەڭگەيى ماڭىزدى. كەيدە بىزگە بەلگىلى ءبىر دەڭگەيدەگى زاڭسىزدىقتار تۋرالى مالىمەت كەلىپ ءتۇسۋى مۇمكىن, الايدا ولاردىڭ سانى بولماشى عانا. قالاي دەگەندە دە دۇرىستاپ تەكسەرۋ كەرەك. ءبىزدىڭ ماقساتىمىز – بولعان جاعدايدى سول كۇيى بەرۋ, ماسەلەنىڭ ماڭىزى مەن تەرەڭدىگىنە قاراۋ. ەگەر زاڭسىزدىقتار بولعان بولسا, كىنالىلەردى جازالاۋ كەرەك. كەيىن دە ونداي جاعدايدىڭ بولۋىنىڭ الدىن الۋ قاجەت.
حالىقتىڭ جاڭا پرەزيدەنتكە تالابى كۇشتى. حالىق ودان الەۋمەتتىك رەفورما مەن دەموكراتيالىق ينستيتۋتتار مەن ازاماتتىق قوعامنىڭ دامىتىلۋىن كۇتىپ وتىر. ونى حالىقارالىق قوعامداستىق تا قولدار ەدى. ۇكىمەت ساياسي كۇشتەرمەن ديالوگقا كەلۋى كەرەك. ازاماتتىق قوعام قازىر بەلسەندى, بۇل – جاقسىلىقتىڭ بەلگىسى. قازاقستان – وڭىردەگى ەڭ ءىرى ەلدەردىڭ ءبىرى. بولاشاعىنان دا مول ءۇمىت كۇتتىرەدى. جاڭا پرەزيدەنت ەقىۇ-مەن تىعىز جۇمىس ىستەيدى دەپ ۇمىتتەنەمىز.
سايلاۋ قازاقستاندىق قوعام ءۇشىن وتە ماڭىزدى ەكەنىن كورسەتتى. ونىڭ ءبىر سەبەبى, تۇڭعىش پرەزيدەنتتىڭ قاتىسپاۋىنان دا بولسا كەرەك. سايلاۋ جالپى زاڭ اياسىندا ءوتتى. بىراق باسەكەلەستىك تە شەكتەۋلى بولدى, ويتكەنى تالاپ كۇشتى بولدى. سايلاۋ پروتسەسىنىڭ ءوزى قالىپتى جانە ەركىن ءوتتى دەۋگە بولادى. بايقاۋشىلارىمىز كەيبىر زاڭ بۇزۋشىلىقتارعا جول بەرىلگەنىن حابارلادى. سايلاۋدىڭ وزىنە كەلەر بولساق, ەقىۇ-نىڭ تاۋەلسىز مەملەكەتتىڭ سايلاۋىن زاڭدى نەمەسە زاڭسىز دەپ تانۋىنا قۇزىرەتى جوق.
مارگارەتا كينەر نەللەن,
ەقىۇ پارلامەنتتىك اسسامبلەياسى دەلەگاتسياسىنىڭ باسشىسى:
– سايلانعان پرەزيدەنت قاسىم-جومارت توقاەۆ سايلاۋالدى ناۋقان كەزىندە ءبىزدى ديالوگقا شاقىردى. سول سەبەپتى دە ەسىگىمىز ارقاشان اشىق.
ەقىۇ ميسسياسى قازاقستانداعى 10 مىڭداي سايلاۋ ۋچاسكەسىنىڭ شامامەن 1 مىڭ شاقتىسىن ارالاپ شىقتى. 130 ۋچاسكەنىڭ اشىلۋىندا بولدىق. 1350 ۋچاسكەدە جالپى داۋىس بەرۋ بارىسىن بايقادىق. ءبىز ستاتيستيكالىق تالداۋعا ەرەكشە ءمان بەرەمىز. ءويتكەنى قازاقستاندا اۋىل مەن قالالىق جەرلەردە ايتارلىقتاي ايىرماشىلىق بار. ءبىز تەرريتوريالىق كوميسسيالاردىڭ شامامەن جارتىسىندا بولدىق. ال بارماعان جەرلەردىڭ ستاتيستيكاسىن تەكسەرۋدەن وتكىزدىك.ۋرشۋلا گاتسەك,
دەموكراتيالىق ينستيتۋتتار مەن ادام قۇقىعى بيۋروسىنىڭ سايلاۋدى بايقاۋ ميسسياسىنىڭ باسشىسى:
– دەموكراتيالىق ينستيتۋتتار مەن ادام قۇقىعى بيۋروسى ميسسياسى ءبىر اپتا ەلدە بولادى. ويتكەنى ءبىز ارىز-شاعىمدار بولا قالعان جاعدايدا ولاردىڭ قالاي قارالاتىنىن بايقاۋىمىز كەرەك. الايدا بيۋرو قازاقستاننىڭ نە ىستەۋى كەرەك ەكەنىن بۇيىرا المايدى. باستى ماقساتىمىز – بايقاۋ مەن ۇسىنىستار دايىنداۋ. سايلاۋ نەگىزىنەن دۇرىس ۇيىمداستىرىلدى. الايدا ادامداردىڭ قولىن انىقتاۋدا ءبىز كەيبىر سايكەسسىزدىكتەردى كوردىك. بايقاۋشىلاردىڭ كەيبىرىنىڭ داۋىستى ساناۋ پروتسەسىنە كوڭىلدەرى تولماعانىن دا جاسىرمايمىن. ارينە, مۇنداي ۇلكەن ساياسي ناۋقاننىڭ كەمشىلىكسىز بولمايتىنىن, بارشانىڭ كوڭىلىنەن شىعۋ قيىننىڭ قيىنى ەكەنىن دە جاقسى تۇسىنەمىز.دايىنداعان باۋىرجان مۇقان,
«Egemen Qazaqstan»