− ورتالىق ازيادا سۋ جانە ەنەرگەتيكا رەسۋرستارى ءبولىنبەيتىندىكتەن, وسى رەسۋرستاردى بىرگە رەتتەۋ – ايماقتىڭ ورنىقتى دامۋىندا, كەدەيلىكتى قىسقارتىپ, كليمات وزگەرىسىنە قارسى تۇرۋ قابىلەتىن نىعايتۋدا شەشۋشى مانگە يە. ەۋرووداق CAWEP-كە ۇلەس قوسا وتىرىپ, سۋ جانە ەنەرگەتيكا قاۋىپسىزدىگى ءماسەلەلەرىندە ەلدەردىڭ ايماقتىق ديالوگى مەن ءوزارا بايلانىسىن كەڭەيتۋگە ىقپال ەتەدى. بۇل ولارعا تۇراقتى ينۆەستيتسيا مەن الەۋمەتتىك-ەكونوميكالىق دامۋعا ارنالعان جاعدايلاردى جەتىلدىرۋگە كومەكتەسەدى, – دەدى قازاقستانداعى ەۋرووداق دەلەگاتسياسىن باسقارۋشى, ەلشى سۆەن-ولوۆ كارلسسون. ونىڭ ايتۋىنشا, ورتالىق ازياداعى ەكونوميكالىق دامۋ, حالىق سانىنىڭ ءوسۋى, قالالاردىڭ ءوسۋ ۇردىستەرى مەن تابيعي اپاتتارعا اپارىپ سوعاتىن كليماتتىڭ وزگەرۋى سۋعا دەگەن سۇرانىستىڭ ارتۋىنا ىقپال ەتۋدە. ەگەر ەلدەر سۋدى پايدالانۋ سالاسىنداعى قازىرگى ساياساتى مەن ءتاجىريبەسىن وزگەرتپەسە, سۋ تاپشىلىعى ايماقتىڭ ەكونوميكالىق دامۋىن باسەڭدەتۋى مۇمكىن.
− كليمات وزگەرىپ جاتقاندا, سۋ رەسۋرستارىن ۇتىمدى پايدالانۋ الەمدەگى باسقا ەلدەرمەن سالىستىرعاندا ورتالىق ازيا مەملەكەتتەرى ءۇشىن ايتارلىقتاي ديۆيدەندتەر اكەلە الادى. ءبىزدىڭ باعالاۋىمىزشا, سۋدى پايدالانۋدىڭ قالىپتاسقان ۇلگىسى بولاشاقتا ورتالىق ازيانىڭ ەكونوميكالىق دامۋىنا شەشۋشى ىقپال ەتەدى, – دەدى ورتالىق ازياداعى دۇنيەجۇزىلىك بانكتىڭ ايماقتىق ديرەكتورى ليليا بۋرۋنچۋك.
ايتا كەتەرلىگى, سۋ رەسۋرستارىن باسقارۋ سالاسىنداعى ءتيىمدى ستراتەگيالار مەن ينۆەستيتسيالار, قازىرگى تاڭدا وسى ماسەلەلەردى شەشۋگە جۇمسالىپ جاتقان ەكونوميكالىق شىعىنداردان ارزان ءتۇسۋى مۇمكىن. CAWEP باعدارلاماسى بولاشاقتا سۋ-ەنەرگەتيكا رەسۋرستارى قاۋىپسىزدىگىن ءارى قاراي ارتتىرۋ ءۇشىن ورتالىق ازيا ەلدەرىنە تەحنيكالىق ساراپتاما ۇسىنۋدى, اناليتيكالىق جانە ينۆەستيتسيالىق قولداۋ كورسەتۋدى جالعاستىرا بەرەدى. قازاقستاندا CAWEP باعدارلاماسى شەڭبەرىندە تەحنيكالىق زەرتتەۋلەر جۇرگىزىلىپ, ارال تەڭىزىن قالپىنا كەلتىرۋگە ىقپال ەتەتىن جاڭا ينۆەستيتسيالىق جوبالاردى جاساۋعا قولداۋ كورسەتىلەدى. ەۋرووداق ۇلەسىمەن بىرگە, باعدارلاماعا شۆەيتساريا ۇكىمەتى مەن ۇلىبريتانيانىڭ حالىقارالىق دامۋ دەپارتامەنتى كومەك كورسەتەدى.