كەشەن قۇرامىندا «بوكەي ورداسى تاريحى مۋزەيى», «تاۋەلسىزدىك مۋزەيى», «حان سارايىنىڭ قارۋ-جاراق پالاتاسى», «قازاقستانداعى العاشقى مەكتەپ تاريحى مۋزەيى», «ءباسپاسوز تاريحى مۋزەيى» سەكىلدى بىرنەشە مۋزەي كىرەتىن. ەندى, مىنە, ولاردىڭ قاتارىنا قازاق ادەبيەتىنىڭ كورنەكتى وكىلى, اقىن شاڭگەرەي بوكەەۆتىڭ مۋزەيى قوسىلدى.
جاڭا مۋزەيدىڭ اشىلۋ سالتاناتىنا باتىس قازاقستان وڭىرىنە جۇمىس ساپارىمەن كەلگەن سەنات دەپۋتاتتارى بىرعانىم ءايتىموۆا, باقىتجان جۇماعۇلوۆ, سەرگەي ەرشوۆ, مۇرات باقتيار ۇلى قاتىستى.
- ەلىمىزدىڭ تاريحىندا وسى وڭىردە حان بولىپ, قاراماعىنداعى حالقىن وركەنيەتكە جەتەلەگەن جاڭگىردىڭ ورنى ايرىقشا. ونىڭ تۇرعان جەرىن, ايشىقتى ءىزى قالعان سارايىن, تۇڭعىش قارۋ-جاراق مۋزەيى مەن مەشىتىن, باسقا دا عيماراتتارىن كوزبەن كورۋ – كەز كەلگەن قازاق ءۇشىن قۋانىش. ەندى سوعان جاڭگىر حاننىڭ نەمەرەسى شاڭگەرەي بوكەەۆتىڭ ادەبي-مەموريالدىق مۋزەيى قوسىلىپ وتىر. اقىن تۋرالى دەرەكتەر, ءتۇرلى جازبالارى مەن فوتوسۋرەتتەرى ارقىلى كيەلى مۇرانى كەيىنگى ۇرپاققا دارىپتەۋگە تولىق بولادى, - دەدى ءوز سوزىندە بىرعانىم سارىقىزى.
بوكەي حاننىڭ شوبەرەسى, جاڭگىر حاننىڭ نەمەرەسى شاڭگەرەي سەيىتكەرەي ۇلى (1847-1920) – ءوز زامانىنان وزىپ تۋعان ەرەكشە تۇلعالاردىڭ ءبىرى. استراحان رەالدى ۋچيليششەسىن, ورىنبور كادەت كورپۋسىن ءبىتىرىپ, سامار گۋبەرنياسىندا ءبىتىمشى سوت بولىپ قىزمەتكە ەرتە ارالاسقانىمەن, مانساپ باسپالداعىنان تەز باس تارتادى. جاڭگىر حاننىڭ جازعى جايلاۋى – كولبورسىدا قاراعاي ءۇي سالىپ, قالا تۇرمىسىمەن كۇن كەشەدى. ونىڭ مال تۇقىمىن اسىلداندىرىپ, سايات قۇرىپ, ءسان-سالتاناتپەن عۇمىر كەشكەنى, اينالاسىنا تالاپتى جاستاردى, اقىن-كۇيشى ونەرپازداردى جيناپ, ادەبي ورتا قۇرعانى بەلگىلى. فوتوعا ءتۇسىرۋ, فونوگرافپەن وتەتىن ساۋىق كەشتەرى – ءدال وسى كولبورسىداعى ەرەكشە ورتادا قالىپتاسقان داعدى ەدى. 1911 جىلى قازاق زيالىلارى باس قوسىپ, «قازاقستان» اتتى گازەت شىعارعان كەزدە دە ونىڭ باسى-قاسىندا اقىلشى ءارى باس دەمەۋشى بولىپ شاڭگەرەي بوكەەۆ جۇرگەن بولاتىن. ونىڭ جانىندا جۇرگەن اعارتۋشى, اقىن عۇمار قاراش قازاق اقىندارى شىعارمالارى مەن اۋىز ادەبيەتى ۇلگىلەرىن جيناقتاپ, 1911-1912 جىلدارى «شايىر» جانە «كوكسىلدەر» اتتى كىتاپتار شىعارعان كەزدە دە قارجىسىن شاڭگەرەي كوتەرگەن ەكەن. بولشەۆيكتەر كەلىپ, بەرەكەسىن كەتىرگەن جىلدارى جىلى ورنىن سۋىتىپ, ۇدەرە كوشۋگە تۋرا كەلگەن شاڭگەرەي 1920 جىلى قاراتوبەدە قايتىس بولدى. سوۆەت وكىمەتى جىلدارى ەسىمى ۇمىتىلىپ, تەك سوڭعى جىلدارى عانا قايتا جاڭعىرعان شاڭگەرەي مۇراسىن ناسيحاتتاپ, اقىن ەڭبەگىن تىرىلتۋگە جاڭا مۋزەي قىزمەت قىلارى ءسوزسىز.