قوستانايلىق كاسىپكەر ەۆگەنيا دومباەۆا قازاقستان ىسكەر ايەلدەرى دەلەگاتسياسىنىڭ قۇرامىندا بىرىككەن اراب امىرلىكتەرىنە بارىپ ايتتى. قوستانايداعى ايتۋلى اتەلەنىڭ جەتەكشىسى ەۆگەنيا اراب امىرلىكتەرىنە ءوز ۇجىمى تىككەن بۇيىمدارىن الا باردى. ءباا ايەلدەر كاسىپكەرلىگى ءۇشىن قىزىقتى دا, قولايلى ەل ەكەنى بەلگىلى. قازاقستان ىسكەر ايەلدەرىنىڭ كەڭەسى بىرىككەن اراب امىرلىكتەرى ءبىراز جىلدان بەرى ىنتىماقتاسا جۇمىس ىستەپ كەلەدى.
«ەگەر ايەل وسى ەلدە ءوزىنىڭ ءىسىن اشقىسى كەلسە, بىرىككەن اراب امىرلىكتەرىنىڭ ۇكىمەتى ونى كەز كەلگەن ەلگە جىبەرىپ وقىتادى, ونىڭ قارجىسىن تولەيدى. سونىمەن قاتار ايەل-كاسىپكەرلەرگە سالىق جەڭىلدىكتەرى جاسالعان. وسى مەنى قىزىقتىردى» دەيدى ەۆگەنيا.
قوستانايلىق كاسىپكەر ايەل قاتىسقان فورۋمعا ارابتىڭ بيزنەس-حانىمى, ميلليونەر ريد ءال-دحاحەري دەمەۋشىلىك جاسادى. ەۆگەنيا وعان ءوزىنىڭ اتەلەسىندە تىگىلگەن ساۋكەلەنى سىيلادى. قوستانايلىق شەبەرلەردىڭ قولىنان شىققان قازاق ايەلىنىڭ ۇلتتىق باس كيىمىنىڭ ساندىلىگى فورۋمعا قاتىسۋشىلاردى تاڭ قالدىردى. ەۆگەنياعا اراب ايەلدەرىنىڭ تىككەن كيىمدەرى دە ۇنادى.
«بۇل ەر ادامدار قاتىسپاعان, ايەلدەر پاراجا كيمەگەن جابىق شارا بولدى. ولار تىككەن كويلەكتەر وتە ءساندى ەكەن. مەن وندا ۇلتتىق ستيلدەگى كيىمدەردىڭ بىرىككەن كورمەسىنە شاقىرتۋ الدىم. بۇل بولاشاق ىسكەر بايلانىسىمىزدىڭ باسى بولار دەپ ۇمىتتەنەمىن» دەيدى ەۆگەنيا.
وسى ساپاردا بىرىككەن اراب امىرلىكتەرىنىڭ ىسكەر ايەلدەرى كەڭەسى مەن قازاقستان ىسكەر ايەلدەرى كەڭەسى ىنتىماقتاستىق مەموراندۋمىنا قول قويدى. ونىڭ اياسىندا بولاشاقتا بىرىككەن جوبالار مەن باعدارلامالار جاسالاتىن بولادى. ارينە, ودان قوستانايلىق كاسىپكەر ايەلدەر دە سىرت قالمايدى.
ءنازيرا جارىمبەت,
«ەگەمەن قازاقستان»
قوستاناي