قازاقستان وليمپيادالىق كوميتەتىنىڭ پرەزيدەنتى تيمۋر ق ۇلىباەۆ قازاقستاندىق موگۋلشى يۋليا گالىشەۆانى الەم چەمپيوناتىنداعى جەڭىسىمەن قۇتتىقتادى. بۇل تۋرالى ۇوك ءباسپاسوز قىزمەتى حابارلادى.
قۇتتىقتاۋ جەدەلحاتىندا بىلاي دەلىنگەن:
«قۇرمەتتى يۋليا!
ءبىزدىڭ وليمپيادالىق وتباسى جانە جەكە ءوز اتىمنان ءسىزدى دير-ۆەلليدەگى الەم چەمپيوناتىنىڭ التىن مەدالىمەن قۇتتىقتايمىن!
فريستايلداعى ەڭ تانىمال بوكتەرلەردىڭ بىرىندەگى جەڭىس ءسىزدىڭ قورىتىندى ەسەپتە ءبىرىنشى ورىنعا شىعۋىڭىزعا سەبەپكەر بولىپ وتىر. بۇل ءسىزدىڭ الەمدىك موگۋلداعى جەتىستىكتەرىڭىز كەزدەيسوق ەمەستىگىن كورسەتەدى. ءسىزدىڭ جەڭىسىڭىزدىڭ ارقاسىندا قازاقستان الەمدىك فريستايلدا ۇزدىكتەر قاتارىنا ەنۋدە.
فريستايلدان تاريحي مەدال يەلەنگەن پحەنچحانداعى وليمپيادا ويىندارىنان سوڭ اراعا ءبىر جىل سالىپ تاعى دا جەڭىس تۇعىرىنان كورىندىڭىز. بۇگىنگى التىن مەدالدىڭ وتاندىق سپورت تاريحىنداعى ورنى ەرەكشە. ءسىز تىنىمسىز ەڭبەكتىڭ ارقاسىندا سپورتتاعى بيىكتەردى باعىندىرۋعا بولاتىنىن دالەلدەدىڭىز.
ءسىزدى جانە ءسىزدىڭ باپكەرىڭىز ەلەنا اناتولەۆنا كرۋگلىحينا مەن بارلىق كوماندا مۇشەلەرىن ۇلكەن جەتىستىكپەن قۇتتىقتايمىن. ماۋسىمدى ءساتتى اياقتاپ, الماتىدا وتەتىن فريستايل-موگۋلدان الەم كۋبوگىنىڭ فينالدىق كەزەڭىندە جانكۇيەرلەرىڭىزدى قۋانتۋىڭىزعا تىلەكتەسپىن!»
ەستەرىڭىزگە سالساق, امەريكانىڭ پارك-سيتي قالاسىنداعى الەم چەمپيوناتىندا موگۋلدان ايەلدەر اراسىنداعى چەمپيون انىقتالدى. قازاقستاندىق يۋليا گالىشەۆا الەم چەمپيونى اتاندى