بۇگىندە ارمانىنا ادال, ماقساتىنا بەرىك قىز-كەلىنشەكتەر كوك جۇزىندە دە ءبىراز بەلەستى باعىندىرىپ ءجۇر. اۋە كەمەسىن تىزگىندەپ, بيىكتە ەركىن قالىقتاعان سونداي ارۋدىڭ ءبىرى – دانا قىلىشباەۆا. ۇشقىش قىز بۇگىندە حالىقارالىق رەيستەردى ورىنداپ, ەلىمىزدىڭ اۆياتسيا سالاسىندا جەمىستى ەڭبەك ەتىپ كەلەدى.
دانانىڭ زاڭعار كوككە دەگەن قىزىعۋشىلىعى بالا كەزدەن باستالعان. ەس بىلگەلى عارىشقا, جۇلدىزدار الەمىنە قىزىعىپ, ارمانى اسپانمەن استاسقان. ۋاقىت وتە كەلە قىزىعۋشىلىعى ماقساتقا ۇلاسىپ, ومىرلىك جولىن اۆياتسيامەن ۇشتاستىردى.
«اكەم پوليتسيادا, انام اسكەري سالادا قىزمەت ەتتى, قازىر زەينەتكەر. ولار تاڭداۋىمدى ءار كەز قولداپ, قوستانايداعى نازارباەۆ زياتكەرلىك مەكتەبىندە وقىتتى. كەيىن ءبىلىم ۇياسىنداعى بازا ماجارستان ۇكىمەتىنىڭ Stipendium Hungaricum گرانتىن يەلەنۋگە ىقپالداستى. بۇل باعدارلاماعا ىرىكتەۋ بارىسىندا تالاپكەرلەردىڭ اعىلشىن ءتىلىن مەڭگەرۋ دەڭگەيى, فيزيكا مەن ماتەماتيكا پاندەرىنەن ءبىلىمى, سونداي-اق وقۋ ۇلگەرىمى مەن جەتىستىكتەرى ەسكەرىلدى. ءسويتىپ, دەبرەتسەن ۋنيۆەرسيتەتىنە «كاسىبي ۇشقىش» باعدارلاماسىنا قابىلداندىم», دەدى دانا.
ۇشقىش ماماندىعىنا وقۋ بارىسىندا ستۋدەنتتەر الدىمەن ترەناجەرلىق ۇشاقتاردا جاتتىعىپ, ۇشۋدىڭ بارلىق قيمىل-قوزعالىسىن مەڭگەرەدى. ۇشاقتىڭ كوتەرىلۋى, قۇلديلاۋى, بۇرىلۋى سەكىلدى ارەكەتتەر شىنايى جاعدايعا بارىنشا جاقىن كورسەتىلەدى. ءار جاتتىعۋدان كەيىن كۋرسانتتار جىبەرگەن قاتەلىكتەرىن تالداپ, كەلەسىدە تۇزەتۋگە تىرىسادى.
دانانىڭ ايتۋىنشا, ادەتتە اۆياتسيا سالاسىنا بەت بۇرعان كادەتتەردىڭ شامامەن 40%-ى وقۋىن اياقتامايتىن كورىنەدى. جالپى, الەمدىك ستاتيستيكانى بايقاساق تا ايەل ۇشقىشتار سانى شامامەن 5 پايىزدى عانا قۇرايدى. اشىق دەرەككوزدەردە ەلىمىزدە 34 ايەل ۇشقىش قىزمەت ەتەتىنى جازىلعان. ساراپشىلار مۇنى اۆياتسيا سالاسىنا قويىلاتىن جوعارى فيزيكالىق جانە پسيحولوگيالىق تالاپتارمەن بايلانىستىرادى. وعان قوسا قوعامداعى ءداستۇرلى كوزقاراس پەن وتباسىلىق مىندەت تە اسەر ەتەتىنى ءسوزسىز.
«وقۋعا ءتۇسۋ, ماماندىقتى تولىق مەڭگەرۋدىڭ ءوز قيىندىعى بار. بارلىق تەكسەرىس پەن ەمتيحانداردى شاماڭ كەلگەنشە العاشقى مۇمكىندىكتە تاپسىرۋعا ۇمتىلۋ ماڭىزدى. مۇنداي جاۋاپكەرشىلىك پەن دايىندىق كەيىن جۇمىسقا ورنالاسۋ مۇمكىندىگىن دە ەداۋىر ارتتىرادى. ودان بولەك ۇشقىش رەتىندە ەڭبەككە ارالاسۋ دا جان-جاقتى دايىندىقتى تالاپ ەتەدى. شەتەلدىك نەمەسە وتاندىق كومپانيادا بولسىن, كانديداتتار كەشەندى تۇردە باعالانادى. پسيحوموتورلىق, پسيحوتەحنيكالىق قابىلەت, تۇلعالىق ەرەكشەلىك مەن ىنتا-جىگەرى, ۇشۋ داعدىلارى, سترەسس جاعدايىندا ارەكەت ەتۋ, كۇتپەگەن جاعدايدى شەشۋ قابىلەتى ەسكەرىلەدى. دەنساۋلىعىڭىزدى سكانەرلەپ, لۋپامەن قاراعانداي قاداعالايدى. مەن دە وقۋ اياقتالىسىمەن, وسىنداي تەكسەرىستەن ءوتىپ, قازىر «Air Astana» كومپانياسىندا ەكىنشى ۇشقىش رەتىندە جۇمىسقا ورنالاستىم. ەلدەگى اۋقىمدى اۋە كومپانياسىنىڭ قۇرامىندا بولعانىما شامامەن ءبىر جىلدان استى», دەدى د.قىلىشباەۆا.
«ۇشقىش قىز العاش رەت 2021 جىلى شاعىن «Cessna–172» ۇشاعىنىڭ شتۋرۆالىنا وتىرعان. ۇشاق كوككە كوتەرىلگەندە ول ەرەكشە قۋانىش پەن تولقۋدى قاتار سەزىنگەنىن ايتادى. ال قازىر دانا حالىقارالىق باعىتتار بويىنشا جولاۋشىلاردى تاسىمالداپ ءجۇر. كوبىنە جيددا, ساۋد ارابياسىنا جول تۇسەدى», دەيدى كەيىپكەرىمىز.
نەگىزىنەن ۇشقىشتاردىڭ ءار رەيسى ۇلكەن دايىندىقتى تالاپ ەتەدى. ۇشۋ الدىندا ەكيپاج اۋا رايى بولجامىن زەرتتەپ, ۇشۋ جانە قونۋ جوسپارلارىن قارايدى. بريفينگ وتكىزىلىپ, رەيس بارىسىنداعى بارلىق ءراسىم تالقىلانادى.
الداعى ۋاقىتتا دانا كاسىبي تاجىريبەسىن ودان ءارى ارتتىرىپ, كۇردەلى حالىقارالىق باعىتتا جولاۋشىلار تاسىمالداۋدى ماقسات ەتىپ ءجۇر. ءسوز اياعىندا اسپاندى سەرىك ەتكەن ارۋ قىز-كەلىنشەكتەرگە ءوز ارماندارىنان قورىقپاي, العا ۇمتىلۋعا كەڭەس بەردى.
«ارماندارىڭىز بيىك بولسىن. ومىرلەرىڭىز كوك اسپان سەكىلدى شەتسىز, شەكسىز ءارى اشىق بولسىن», دەيدى جاس ۇشقىش.