اۋىلدان شىققان الەم چەمپيونى

مۇز ايدىنىندا جاسىنداي جارقىلداعان كريستينا باي­راقتى باسەكەدە تەڭدەسسىز ونەر كور­سەتىپ, جەكەلەي سىنداعى ءۇش بىر­دەي قاشىقتىقتا (500, 1 000, 1 500 مەتر) توپ جاردى. 1 500 مەترلىك قاشىقتىقتا 1.56.06 ۋاقىت كورسەتكىشىمەن مۇز ايدى­نىنىڭ جاسوسپىرىمدەر اراسىن­داعى رەكوردىن جاڭارتتى. ەڭ اۋىر سانالاتىن 3 000 مەترلىك سا­يىستا كۇمىس جۇلدە يەلەندى.

وسىلايشا, ءتورت قاشىق­تىق­تىڭ قورىتىندىسى بويىن­شا كوپسايىستا جەڭىسكە جەتىپ, ەل تاريحىندا العاش رەت كونكي­مەن جۇگىرۋدەن ءابسوليۋتتى الەم چەمپيونى (ISU Junior World Champion) اتاندى. بۇعان قوسا, ۇلتتىق قۇرامامەن بىرگە كوماندالىق سپرينتتە دە التىننان القا تاعىپ, بەس دۇركىن الەم چەمپيونى اتاندى.

سپورتشىنىڭ ءومىر جولى دا كوپكە ۇلگى. كريستينا سولتۇستىك قازاقستان وبلىسى, شال اقىن اۋدانىنا قاراستى پوۆوزوچنوە اۋىلىندا, سپورتشىلار وتباسىندا دۇنيەگە كەلگەن. اناسى يۋليا كەزىندە جەڭىل اتلەتيكا, جۇزۋمەن اينالىسسا, بۇگىندە كريستينا ءوزىنىڭ سىڭارى الينا, اپكەسى ينەسسامەن بىرگە ۇلتتىق قۇراما ساپىندا ەل نامىسىن قورعاپ ءجۇر. انالارى ءمالىم ەتكەندەي, بالالارى جاس كەزىندە سپورتتىڭ ءار تۇرىمەن, اتاپ ايتقاندا, ۆولەيبول, جەڭىل اتلەتيكا, شاڭعى سىندى تۇرلەرىمەن شۇعىلدانعان ەكەن. تەك 5-سىنىپتان باستاپ كونكيگە ءبىرجولا دەن قويعان. جالپى, يۋليا ميحاي­لوۆنا 10 جىل­دان بەرى جاتتىق­تى­رۋ­شى­لىق­پەن تۇراقتى شۇعىل­دانادى. بۇگىندەرى بىرنەشە بالانى جاتتىقتىرىپ ءجۇر, ولاردىڭ اراسىندا ءوزىنىڭ 8 جاسار ۇلى بوگدان دا بار.

ايتا كەتەيىك, 2024 جىلى وڭ­تۇس­تىك كورەيادا وتكەن جاس­وسپىرىمدەر وليمپيا­دا­سىندا كريستينا ەلىمىزدىڭ تۋىن ۇستاپ شىققان بولاتىن.

بۇل جەڭىس – تەك ءبىر سپورت­شىنىڭ عانا ەمەس, بۇكىل ەلدىڭ مەرەيىن ۇستەم ەتكەن تولايىم تابىس. ايدىندا الاۋلاعان جاس جۇلدىزدىڭ الداعى ەرەسەكتەر باسەكەسىندە دە تالاي اسۋلاردى باعىندىراتىنىنا سەنىم مول.